Prokram Kapw en Kapokon en Rahn Tohrohr
Ma kitail kilang de rong kilel ehu me kin kasalehda me mehkot keper pahn kereniong wiawi, ahpw kitail sohte wia mehkot, e kak imwikihla apwal laud. E pil inenen kesempwal en kapwaiada kaweid en pali ngehn kan me Siohwa kin ketikihda. Met pahn sansal mwahu nan prokram en Kapokon en Rahn Tohrohr me pahn wiawi nan pahr en kalohk en 2005. Oaralap en kapokono iei “Tehk Kanahieng Iaduwen Ahmw Kin Rongorong.”—Luk 8:18.
Nan tepin padahk, brother pahn kasalehda iaduwen tepin irelaud kan en sapwellimen Pohl kisinlikou ong mehn Ipru kan kin kadoadoahk ong kitail rahnwet. Nan kaimwiseklahn padahk en rahno me oaralap koasoia: “Rong Kanahieng Kaweid Sang Koht,” brother me wia padahk wet pahn sewese kitail en kasawihada pein kitail pwehn wehwehki ma kitail kin rong mwahu Siohwa, sapwellime Ohl, oh “ladu lelepek oh loalokong.”—Madiu 24:45.
Ekei wasa kan nan prokram pahn inenen mwahu ong peneinei kan. Padahk me oaralap koasoia: “Peneinei kan me kin Rong Kanahieng Mahsen en Koht oh Sohte Mweidohng Mehkot en Kerempwa Irail Sang Met” pahn sewese kitail en dehr mweidohng soahng kan me pid sampah wet en kaluwetala de kauwehla atail pali ngehn. Nann padahko, brother pahn interview irail me wiahda wekidekla kan pwehn kihong soahng ngenin kan en keieu nan arail mour. Padahk me oaralap koasoia: “Iaduwen Rong Kanahieng Mahsen en Koht kin Kakehlada me Pwulopwul kan” oh brothero pahn interview irail me pwulopwul kan me kasalehdahr arail lelepek ong padahk mehlel nan sukuhl, rehn iengerail tohnsukuhl kan, de nan kalohk. Padahk me oaralap koasoia: “Seri kan me Kin Rong Koht oh Sukuhliki Sang Ih” pahn sewese kitail en tamataman me seri kan kin mwadang sukuhliki soahng tohto ma mie me kin kasukuhlih irail. Brothero pahn interview ekei seri oh arail pahpa oh nohno kan me pahn sewese kitail en wehwehki kamwahupen kasukuhlih seri kan sang ni arail pwelel en kekeid nan elen Siohwa.
Mendahki Sehdan kin nantihong “pitipitih sampah pwon,” Siohwa kin ketin kasalehong sapwellime ladu lelepek kan ahl me irail pahn kekeid loale. (Kaudiahl 12:9; Aiseia 30:21) Rong kanahieng kaweid kan oh mwadang kapwaiada kaweid pwukat nan atail mour kin sewese kitail en loalokong, kin wahdohng kitail peren, oh kin kahluwalahng mour soutuk.—Lepin Padahk 8:32-35.