Irelaud 7
Mihding Kan Me Kin Sewese Kitail en “Kasalehda Limpoak oh Wiewia Mwahu”
PWUHK STUDY EN MWOMWOHDISO
Tohnmwomwohdiso oh meteikan me kin patehng tohn mwomwohdiso kin paiekihda Pwuhk Study en Mwomwohdiso, mihding me kin wiawi nin duwen pwihn tikitik kan me tikitiksang mihding teikan. Peneinei kei oh me malaulau kei me kin kohpene nan onop pwukat. Kisin pwihn en onop pwukat me wiawihkihda kisehn tohn mwomwohdiso ehu kin kohpene wasa kan me konehng, kin kalapw ni imwen kisehn tohnmwomwohdiso kan. Irail pil kin kak tuhpene nan Kingdom Hall.
Ekei pak Pwuhk Study pwukat kin kak wahdo kamwahu teikan me emen sohte kin alehdi nan koasoandi teikan en mwomwohdiso. Dahme kahrehda? Pwehki met kaidehn ihte kin wia ahnsou mwahu ehu en tehk kanahieng iren Paipel ni oaritik ahpw e pil kin wia ahnsou mwahu en tehk en emenemen tohnmwomwohdiso kan arail kekeirada ni pali ngehn. Soangen sawas wet kin pid kohdahn kaweid kan me kohsang Paipel, kangoang oh sawas kan me pid doadoahk en kalohk, oh pil iangahki sawas en pali ngehn kesempwal akan me pahn pid en emenemen anahn. Soangen sawas wet kin wia kasalepen sapwellimen Siohwa limpoak kadek oh nsenohki sapwellime aramas akan.—Aiseia 40:11.
Sounapwalih en Pwuhk Study kin wiahda eh ahnsou en onop Paipel oh kin sewese meteikan kalaudehla arail loalokongki Paipel oh doadoahngki loalokong wet ni ahl me pwung oh mwahu. Kaidehn ihte e kin apwalih Onop en Pwuhk Study, ahpw e pil kin nsenohki en emenemen tohn Pwuhk Study arail roson en paliwar oh pali ngehn, oh kin sewese irail nan doadoahk en kalohk, oh mwemweitla rehrail (shepherding call) oh pil rehn meteikan nan mwomwohdiso ni ahnsou kan me anahn. Ministerial servant koahiek men kak apwalih Onop en Pwuhk Study ma sohte elder me kak wia met.
Mihding wet kin wia onop ehu me pwihn kan kin kohpene oh wia ni arail kin doadoahngki Paipel oh ehu pwuhk me Sounkadehdehn Siohwa kan wiahda. Onop wet kin wiawi duwehte Onop en Kahn Iroir. Pwuhk Study wet kin tepikihda oh imwikihla kapakap, wadawad en parakrap kan, peidek kan me pid parakrapo kin wiawi, pasapeng kin wiawi, oh iren Paipel kan kin wadawad ma mie ahnsou. Pwe ire kan en kin kak tengedi nan madamadau en emen, ih me kin wia onopo kin kak wia kousapahl kan mwurin onopo. Ni atail kin iang met ehuehu wihk, kitail pahn ahnekihla loalokong oh wehwe. Kitail kak sukuhliki kahrepen ire kan me kin kohda nan pwuhko oh iaduwen arail poahsoanda sang nan Paipel oh pil duwen atail kak ehukihong meteikan duwen ire pwukat nan atail doadoahk en kalohk. (2 Timoty 2:15) Mihding wet kin wia sawas laud pwe kitail en kak wiahla sounpadahk en Paipel mwahu kei.
Nan soangen pwihn tikitik pwukat, e kin kihong kitail ahnsou mwahu en kak iang pasapeng. Kahrehda, kitail koaros, iangahki me kapw akan, ahneki ahnsou mwahu en kak ahnla kasalehda atail pwoson ohng meteikan. (Ipru 13:15) E mwahu kitail en sukuhliki wia pasapeng kan ni pein atail lokaia ah kaidehn wadekasangte nan neitail pwuhk kan.
Mendahki koaros kak iang wadek iren Paipel kan, emente me kin pilipilda pwe en wadek parakrap kan. Sounapwalih en Pwuhk Study pahn kin koasoanehdi mwowe pwe emen brother me papidaislahr oh koahiek en wadawad en wadek parakrap kan. Nan ehuehu wihk, koasoandi pahn kin wiawihda pwe emen brother tohrohr me koahiek en wadek parakrap kan. Ma sohte brother koahiek, Sounapwalih en Pwuhk Study de emen sister koahiek kak wia wadawad.
Ni Pwuhk Study kan kin kohpeseng oh wiawi nan wasa kan me karanih imwen tohn mwomwohdiso kan, e kin mengei ohng kitail oh me kapw akan nan atail wasa en kak iang towehda. Kitail anahne nantihong oh lukehdo meteikan en iang kitail mihding pwe irail en pil kak iang ale iren kangoang ngenin kan me kin kohda oh werek mwahu me kitail kin paiekihda.
Wasa kan me Pwuhk Study kan kin wiawi ie pil kin kak wia wasa me tuhpene en kalohk pil kin wiawi. Nan wasa pwukat, tohn Pwuhk Study pahn kin tuhpene mwohn arail kohla kalohk. Ni arail pahn kin miniminpene nan koasoandi pwukat, tohn Pwuhk Study pahn kin ehupene oh kapwaiada kahrepe riau pwukat en onop oh kalohk.
TUHPENE EN KALOHK KAN
Ekei ahnsou nan wihk kan, pwihn en Sounkadehdehn Siohwa kan kin tuhpene mwohn arail kohla nan wasahn kalohk. Irail kin koasoiapene ehu iren Paipel—keieu mwahu ma irail koasoia iren rahn ma e pid duwen doadoahk en kalohk—irail kin kalapw koasoia iren sawas akan me pid soangen irair akan me emen pahn lelohng nan wasahn kalohk, ekei ire kan sang nan Atail Doadoahk Ong Wehio nan tuhpene pwukat. Koasoandi en kalohk kin wiawi oh emen rehrail kin wiliandi irail oh kapakap. Mwuri, pwihno kin onopada pwehn kohla nan wasahn kalohk. Soangen koasoandi en tuhpene pwukat kin kihda sawas akan oh kin wia mehn kangoang ohng irail akan me kin kohla kalohk. Koasoandi kak wiawi nan tuhpene pwukat pwehn sewese me kapw akan me ele pahn anahne sawas nan doadoahk en kalohk. Soangen tuhpene pwukat kin reireiki minit 10 lel 15.
KOASOANDI EN MIHDING KAN NAN MWOMWOHDISO KAPW DE TIKITIK KAN
Ni tohnpadahk kan kin tohtohla, mwomwohdiso kan kin pil tohtohla. Ma ehu mwomwohdiso kapw kin wiawihkihda tohn ehu mwomwohdiso tohrohr de wiawihkihda sounkalohk kan me kin mih nan ehu wasa me dohsang tohn mwomwohdiso teikan, e kin anahne wiawihkihda irail sounkalohk papidaislahr kan oh meteikan me kin pohnese irail ladu lelepek oh loalokong kan oh kin inengieng idawehn arail kaweid. Circuit Overseer kan kin kihda application kan ohng tepiada ehu mwomwohdiso kapw. Ekei pak kisin pwihn kan kin diarada me e kin wia kamwahu ehu en patehng oh iang wia kisehn ehu mwomwohdiso me karanih irail.
Ekei pak, mwomwohdiso tikitik kan kin wiawihkihda sister tohr. Ni ahnsou kan me soahng wet kin wiawi, emen sister me kin wia kapakap nan mwomwohdiso oh kin apwalih koasoandi en mihdingo ni ah kin koaduhpwalihdi mwahu moange, me pahrekiong koasoandi en Paipel. (1 Korint 11:3-16) Pali laud en ahnsou, irail kin mwohd oh soupeidihla rehn towe ko. Sohte sister kin wia padahk nan mihding kan. Irail kin wadek oh kihda pasapeng ohng ire kan me mih nan pwuhk kan me Sounkadehdehn Siohwa kan kin wiahda, de ekei pak irail kin koasoiapene ire kan ni arail kin wia kamwomwada kan.
Mwomwohdiso kapw ehu kin kairehki Branch Ohpis kan duwen irail brother kan me warohng wia elder kan de ministerial servant kan. Ma sohte me warohng, duwehte pwihn akan me wiawihkihda sister tohr, rahn ohpis pahn pilada emen sister kan en apwalih elen koaskoasoipene nanpwungen rahn ohpis oh mwomwohdiso, oh pil apwalih mihding kan. Oh mwuhr ma mie brother kan me warohng, irail pahn pilipilda pwe irail en apwalih pwukoahn mwomwohdiso kan.
KAPOKON EN RAHN TOHROHR KAN OH KAPOKON EN CIRCUIT KAN
Mihding kan en sapwellimen Siohwa ladu kan kin wiawihkihda aramas riemen de silimen de pwihn en kapokon laud ehu me wiawihkihda aramas kid kei. Pahr koaros koasoandi kin wiawi pwe irail pwihn kan me kin mihpene nan circuit ehu en kin kak patpene oh wia kapokon en rahn tohrohr kan me kin wiawihki rahn ehu de rahn riau. Soangen ahnsou kaperen pwukat kin wia ahnsou mwahu en “katehlapala” atail limpoak ong riatail Kristian kan. (2 Korint 6:11-13) Ni ahr kin medemedewe anahn tohrohr kan en mwomwohdiso, “ladu lelepek oh loalokong” kin kaunopada oaralap kan sang nan Paipel oh koasoandi teikan me kin kohda de wiawi nan kapokon kan. Ire pwukat kin kohda ni ahl tohto kan me duwehte padahk kan, koaskoasoipene kan, kamwomwada kan, de sang ni ekei kin sohngada de kamwomwada ekspiriens kan, oh pil sang ni interview kan. Koasoandi en padahk kan me kin wiawi kin kalapw pidada ire kan me konehng wasao, de kaweid kan me pwung ohng nan circuito. Soangen kaweid konehng pwukat pahn sewese irail kan me kin iang towehda.
Kapokon en Rahn Tohrohr oh Kapokon en Circuit pwukat kin kihong irail me kapw akan ahnsou mwahu en papidaisla pwehn wia kasalepen ahr inou ohng Siohwa. Koaros kin ale mehn kangoang sang ripoht kan oh ekspiriens kan me pid doadoahk en kalohki Rongamwahu.
KAPOKON EN DISTRICT
Pak ehu nan pahr ehu, Sounkadehdehn Siohwa kan kin kohpene ni kapokon laud kan. Koasoandi kin kalapw wiawihda pwe kapokon pwukat en wiawi nin duwen kapokon en district me kin reireiki rahn siluh, oh kin kapatapene mwomwohdiso kan me kohsang district tohto kei. Ahpw Branch Ohpis kan me kin apwalih mwomwohdiso malaulau kei kin diarada me e mengei en koasoanehdi pwe mwomwohdiso kan koaros en tuhpene wasatehkis. Koasoandi kan en Kapokon en District kan nan ekei sahpw kan kin poahsoankihda arail irair kan de kaweid en Governing Body. Ekei pak, kapokon laud kan duwehte National Convention kan kin pil wiawi. Nan ekei pahr, International Convention kan kin wiawi ekei wasa kan nan sampah oh Sounkadehde kid kid kei sang sahpw teikan kin iang towehda. Erein pahr tohto me dower powe, tohto me pil esehda duwen Rongamwahuo pwehki Sounkadehdehn Siohwa kan kin pakairkiseli duwen kapokon pwukat.
Kapokon en District, National Convention oh International Convention kin wia ahnsou kaperen kei me sapwellimen Siohwa aramas inoudahr kan kin ehupene ni kaudok. Soangen kapokon pwukat kin wia ahnsou mwahu en kasalehda marain en padahk mehlel me kin wie maramarainla, ahnsou mwahu en kasalehda pwuhk kapw akan me kitail kak doadoahngki ni atail wia atail pein onop de wia onop en mwomwohdiso oh doadoahngki nan kalohk, oh ahnsou mwahu en papidais. Sounkadehdehn Siohwa kan kin kilangwohng Kapokon en District kan nin duwen ahnsou kesempwal ehu en kekeirada atail pali ngehn oh tehk duwen kekeiradahn doadoahk en kalohki Rongamwahu. Nan ekei Branch Ohpis me tikitik kan, Kapokon en District kan kin pil wia arail National Convention. Kapokon laud kan kin inenen kasalehda me sapwellimen Siohwa aramas akan me kohsang wasa koaros kin uhdahn wiahla pirien en Kristian kei me inoudahr kei me kin wia kadehdehpen me irail wia sapwellimen Sises Krais tohnpadahk mehlel kei.—Sohn 13:35.
Ni atail pahn iang towehda mihding en Kristian kan oh pil kapokon tikitik oh laud kan en sapwellimen Siohwa aramas akan, kitail kin ale kangoang en wia kupwuren Koht oh kitail kin ale kaweid me kak sewese kitail en liksang madamadau en sampah me kak kauwehla atail pwoson. Kitail kak kalahnganki me Siohwa kin ketikihong sapwellime aramas akan ahnsou mwahu kan en ale kangoang en pali ngehn nan imwin rahn pwukat.
SAKEN SOUTIK EN KAUNO
Pak ehu nan sounpahr ehu ni rahnen katamanpen sapwellimen Sises Krais pwoula, mwomwohdiso koaros en Sounkadehdehn Siohwa kan kin wia Katamanpen Kamatalahn Krais, de Saken Soutik en Kauno. (1 Korint 11:20, 23, 24) Met kin wia mihding me keieu kesempwal nan pahr ehu ong sapwellimen Siohwa aramas akan. Kehkehlik kin kohwong kitail koaros en tamataman rahn en Katamano.—Luk 22:19.
Rahn en Katamano kin pahrekiong rahn en Pahsohpa, me sansalda nan Pwuhk Sarawi. (Eksodus 12:2, 6; Madiu 26:17, 20, 26) Pahsohpa kin wia Katamanpen ahnsou me mehn Israel kan pitsang Isip nan pahr 1513 B.C.E. Siohwa ketin koasoanehdi me, ni kaeisek pahieun rahn en keieun arail sounpwong pwe irail en kang sihmpwul en Pahsohpa oh irail en tangasang arail lidu nan Isip. (Eksodus 12:1-51) Kitail kak ese mehnia rahn me met wiawi sang ni atail pahn wadek rahn 14 sang ahnsou en maram pwul me kin sansal nan Serusalem oh karanih ahnsou me rahn oh pwong kin soangen reirei tehieu (spring equinox). Pali laud en ahnsou, Katamanpen Kamatalahn Krais kin wiawi rahn me keieun maram mat kin wiawi mwurin spring equinox.
Nan Madiu 26:26-28, pein Sises kin kasalehda iaduwen kitail pahn wia Katamano. E sohte wia tiahk ehu me direki tiahk kapwonopwon kan, ahpw e kin mwete ahnsou ehu me irail me pahn iang Sises Krais kakaun Wehin nanleng kin ehupene oh mwengepene. (Luk 22:28-30) Kangoang kohwong Kristian kan koaros me inoukihdahr ahr mour ohng Siohwa oh koaros me men iang en kin iang towehda Sak en Soutik en Kauno. Ni arail kin iang towehda met, re kin kasalehda arail kalahnganki sapwellimen Siohwa Koht kisakis ohng aramas ki Sapwellime Ohl Sises Krais. Sounkadehdehn Siohwa kan kin wiahki rahn en Kataman nin duwen ahnsou tohrohr ehu kahrehda irail kin nantiong iang towehda pahr koaros.
Kereniong pahr koaros ni eh kin kerenlang ahnsou en Kataman, ehu kapahrek tohrohr ohng wehi pokon kin wiawi nan mwomwohdiso en Sounkadehdehn Siohwa kan. Irail kin nantihong wen arail kak koaros en lukehdo koaros me kin men iang towehda Kataman wet. Padahk me kin kohda kin wiawi ni ahnsou konehng ohng irail akan me kin men kaperenihada Koht oh kin wiawi pwehn kalaudehla arail men onop Paipel.
Sounkadehdehn Siohwa kan kin perenki oh kasikasik ahnsou kan me irail kin patpene ni mihding kan, wasa irail kin “nsenoh sawaspene ni kasalepen atail limpoak oh atail wiewia mwahu kan.” (Ipru 10:24) “Ladu lelepek oh loalokong” kin nantiong koasoanehdi mihding pwukat ni ahr kin medemedewe duwen atail anahn akan en pali ngehn. Kangoang kin kohwong sapwellimen Siohwa ladu kan koaros oh irail koaros me perenki en isaneki oh kaukaule iang towehda soangen koasoandi en kapokonpene pwukat. Ni sapwellimen Siohwa ladu kan kin kalahnganki soangen sawas pwukat me kin kohda, e kin kamwekid irail en kin ehupene ni minimin.