Kekeid nin Duwen Aramas Erpit kei
1 Ahnsou me Sises mahsanihong sounlaid pahmeno en idawehnla ih, re sohte pwapwand ahpw “ni ahnsowohte . . . ira ahpw iangala Sises.” (Mad. 4:18-22) Ni ahnsou me Sohl mehn Tarsus wiliakapwala oh pwurehng kilangada wasa, e pil sohte pwapwand ahpw “inenwong sinakoke kan en mehn Suhs kan oh tapihada padahk duwen Sises.” (Wiewia 9:20) Ahnsou kin wonlahte mwowe, oh ni eh pahn kin lel oh daulih, e pahn kin solahr kak kapwurpwurdo. Ihme kahrehda e kesempwal kitail en “duwehte me loalokong kan” me pid duwen atail doadoahngki atail ahnsou.—Ep. 5:15, 16.
2 Soahng kan me Sohte Kasikparail: Atail ahnsou en papah Siohwa rahnwet kak sohla mie lakapw. (Seims 4:14) Sohte mehmen rehtail me “paisuwed” sohte kin lelong. (Ekl. 9:11) Patehng met, kitail wia mahmahlahr, oh “sounpar kansensuwed kan” me kin kisehn mahla kin kahrehiong papah Siohwa en apwal pwehki koasoandi suwed wet. (Ekl. 12:1) E sohte elen loalokong en awih oh pwapwand en wiahda inou ong Siohwa de awiawih ehu ahnsou mwahu en pwehn kalaudehla atail doadoahk en kalohk. (Luk 9:59-62) Eipraam diar meleilei oh popohl ni ahnsou me e likeilapala, oh “mahlahr oh nsenamwahu” ni eh mehla pwehki e kin doadoahngki eh mour pwon ong Siohwa ni erpit.—Sen. 25:8, NW.
3 Ahnsou Mwotomwotlahr: Kitail men doadoahngki mwahu atail ahnsou pwe “ahnsou mwotomwotalahr.” (1 Kor. 7:29-31) Ahnsou keren koasoandi mering wet pahn sohrala. Ahnsou mwahu en iang rikrikpenehn irail pwihn en sihpw ni “ahnsou mwahu en dolung wahnsahpw nin sampah” kereniong nek. (Kaud. 14:15) Kitail en kanahieng en dehr mweidohng pwunod en mour en kihsang atail iang doadoahk en kalohk. (Luk 21:34, 35) Ia uwen kaperen en ehu rahn ni atail pahn kak katamanda atail iang pwerisek nan doadoahk en rahk wet!
4 Kitail anahne tetehk mwahu en dehr katihasang soangen pwukoa kaperen kan en papah me pa kakete langada ong kitail. Kitail en wia uwen me kitail kak en papah Siohwa “ahnsou wet, me wehwehki ‘Rahnwet.’” (Ipru 3:13) Ni atail wia met, kitail kasalehda erpit pwehki “me kin kapwaiada kupwur en Koht pahn momour kohkohlahte.”—1 Sohn 2:17.