Kitail Kin Perenki Kihda Atail Kehl Koaros oh Mehkan Koaros ong Papah Siohwa!
1 Wahnpoaron Pohl kin peren ni eh “netikihla mehkoaros [eh] ahneki oh pil pein [ih]” pwehn kapwaiada eh pwukoa en kalohk. (2 Korint 12:15) Duwehte rahnwet, tohto Kristian kan kin wia doadoahk en pioneer me inenen mwahu. Mehteikan me ahneki pwukoa toutou en peneinei kin kihong ahnsou en kalohk nan arail koasoandi kedirepw en nan wihk kan. Ekei me kin ahneki kahpwal en paliwar kin iang kalaudehla kalohkpen wehio ki wen kehl me re ahneki. Ia wen kangoang kitail alehdi sang ni atail kin kilang sapwellimen Siohwa aramas, mendahki wekpeseng en sounpar oh irair kan kin kihong arail mehkoaros oh kehl ong doadoahk en papah Siohwa.
2 Limpoak ong Mehn Mpomw: En kin wia wen atail kak koaros en papah Koht, ni atail kin kasalehiong limpoak ohng Siohwa oh mehn mpatail kan, kin kihong kitail nsenmwakelekel. Pwehki en Pohl kihda pein moure en iang kalohki rongamwahu, e kak peren en ndahda: “Eri, I kehkehlingkihong kumwail rahnwet, pwe ma mehmen kumwail salongala, I sohte pahn pwukoahki.” (Wiewia 20:24, 26; 1 Deselonika 2:8) Iang towehda doadoahk en kalohk ni wen koaros me atail irair kan kak mweidohng pahn doarehsang kitail en pwukoahki mouren mehteikan.—Esekiel 3:18-21.
3 Doadoahk laud en sewese mehteikan kin wahdohng kitail peren. (Wiewia 20:35) Emen brother koasoia duwen met: “Ahnsou me e kin lel ni soutik kan, mwurin ahi doadoahk en papah Siohwa erein rahno, oh pwurupwur kohla imweio, I kin ni mehlel pwangada. Ahpw I kin peren, oh I kin kalahngankihong Siohwa pwehki e ketikihong ie peren ehu me sohte emen kak kihsang.”
4 Limpoak ong Koht: Kahrepe me keieu kesempwal en kihong atail kehl koaros ong papah Siohwa iei pwe met kin kaperenda samatail nanleng. Limpoak ong Koht kin kamwekid kitail en kapwaiada sapwellime kosonned kan, me iangahki kalohk oh katohnpadahk. (1 Sohn 5:3) Kitail en kasalehda peren en doulahte wia doadoahk laud ong Siohwa mendahki aramas kan kin sohte kasalehda perenki rong de uhwong kitail.
5 Ahnsou wet kaidehn ahnsou en doadoahk wawai. Kitail momour ni ahnsou en dolung. (Madiu 9:37) Soumwet men kin kalap doadoahk awa tohto kan ni ahnsou en rahk pwehki e ahneki ahnsou mwotomwot en rikpene wahnsapw akan mwohn re pahn tepida kiteila. Kitail ahneki ahnsou mwotomwot ong dolung en pali ngehn. Kitail en kin tamataman duwen ahnsou pwukat me kitail kin memour loale, pwe kitail en doulahte kihong wen atail kak koaros en nantiong wia doadoahk en kalohk.—Luk 13:24; 1 Korint 7:29-31.