Nantiweite Nan Doadoahk Erein Ahnsoun Rahk!
“Irail kan me sengiseng nin dokon arail weuwa kohwei ar werentuhke kan re en koul oh ngisingiski peren ni arail pahn pwurodo, wa kohdo wahnsapwarail.”—MELKAHKA 126:5.
1. Rahnwet, dahme kahrehda kitail anahne “peki rehn Kaunen rahket pwe en ketin kadarodo tohndoadoahk tohto?
MWURIN Sises Krais wia kasiluhn pak me e kalohkseli nan sapwen Kalili, e mahsanih ong sapwellime tohnpadahk kan: “Mehlel pwe rahket me inenen laud, a tohndoadoahk kan me malaulau.” (Madiu 9:37) Irair wet kin pil duwehte nan sapwen Sudia. (Luk 10:2) Pwehki iei irair wet me wiawi mpen sounpar 2,000 samwalahro, iaduwen rahnwet? Eri, erein sounpar en kalohk me ahpwtehn nekier, Sounkadehdehn Siohwa kan me tohtosang 6,000,000 kin nantihong en wia doadoahk en rahket wasa koaros nan sampah wet me aramas 6,000,000,000 kin kousoanla loale, oh tohto rehrail me “rasehng sihpw kei me sohte silepahr.” Sises kangoange irail en “kapakap oh peki rehn Kaunen rahket pwe en ketin kadarodo tohndoadoahk tohto” oh pekipek wet kin wia pekipek kesempwal nan atail ahnsou duwehte e kesempwal sounpar epwiki kan samwalahro.—Madiu 9:36, 38.
2. Dahme kahrehda aramas akan kin nok esehkin kitail?
2 Siohwa Koht, Kaunen rahket, kin ketin karonge pekipek wet en kadarodo tohndoadoahk tohto. Ia uwen kaperen en iang wia doadoahk en rahket me Koht kin ketin apwalih! Edetehn kitail me malaulau sang irail tohn wehi kan, atail kin ngoangki iang doadoahk en kalohki Wehio oh katohnpadahk kin kahrehong sampah wet kin esehla kitail nin duwen pwihn ehu me kin wia doadoahk wet. Nan sahpw tohto nuhs oh TV kan kin kalapw koasoiahki kitail. Ngilen pehl en prokram nan TV kin kalap kihong madamadau me Sounkadehde kan kin uhehr ni wenihmw. Ei, nan senturi 21, aramas tohto esehki Sounkadehdehn Siohwa kan arail doadoahk en kalohk nin duwen tohndoadoahk kan en rahk.
3. (a) Iaduwen kitail ese me tohnsampah kan kin ese duwen doadoahk en kalohki Wehio me wiawi nan keieun senturi? (b) Dahme kahrehda kitail kak nda me irail tohnleng kan kin utungada atail doadoahk en kalohk?
3 Tohnsampah kan nan keieun senturi esehla duwen doadoahk kan en irail aramas akan me kin kalohki Rongamwahu en Wehio oh irail ahpw kin kaloke irail. Ihme kahrehda, wahnpoaron Pohl ntingihdi met: “Pwe likamwete Koht ketikihong kiht wahnpoaron kan dehu me keieu sekeniken rehn aramas akan, pwe se rasehng aramas me pahn ale kalokolok en mehla pwe tohnleng kan koaros iangahki tohn sampah kan en uduhdiahl.” (1 Korint 4:9) Ni soangen ahlohte, atail kin nantihweite nan doadoahk nin duwen sounkalohk kan en Wehio mendahki kalokolok kin kahrehong tohn sampah kan oh tohnleng kan en uduhdiahl. Kaudiahl 14:6 mahsanih: “Mwuri, [wahnpoaron Sohn] I ahpw pil kilangada pil emen tohnleng me pipihr nan wehwe, me weuwa rongamwahu poatopoat ehu me e pahn lohkihong tohnsampah kan, wehi koaros, kadaudok koaros, lokaia koaros, oh sahpw koaros.” Ei, tohnleng kan kin utungada atail doadoahk—atail doadoahk en rahk!—Ipru 1:13, 14.
“Aramas Koaros Pahn Kailongkinkumwailla”
4, 5. (a) Kaweid dahieu me Sises ketikihong sapwellime tohnpadahk kan? (b) Dahme kahrehda aramas akan kin “kailongkin” sapwellimen Koht ladu kan en rahnpwukat?
4 Ni ahnsou me sapwellimen Sises wahnpoaron akan me pekederala nin duwen tohndoadoahk kan en rahket, irail kin kapwaiada sapwellime kaweid wet en “kanahieng duwehte sineik kan, oh pil mpahi duwehte mwuroi kan.” Sises pil kapataiong met: “Kumwail mwasahn pwe aramas akan pahn salihkumwaildi oh pangkumwaillahng ni mwoalen kopwung kan, oh re pahn wokihkumwail nan arail sinakoke kan. Kumwail pahn wisikiong mwohn kaun oh nanmwarki kan pwehki ngehi, pwe kumwail en kadehdehiong irail oh mehn liki kan duwen Rongamwahu. . . . Aramas koaros pahn kailongkinkumwailla pwehki ngehi. A me pahn dadaurete lel ni imwi, ih me pahn mourla.”—Madiu 10:16-22.
5 Rahnwet aramas akan kin “kailongkinkitailla” pwehki “sampah unsek mih pahn manaman en Me Suwedo,” iei Sehdan me Tepil, me wia imwintihti en Koht oh sapwellime aramas akan me keieu suwed. (1 Sohn 5:19) Atail imwintihti kan kin kilang duwen atail kin kepwehpwe ni pali ngehn ahpw irail kin kahng en nda me Siohwa kin kahrehong met en wiawi. Irail me kin uhwong kitail, kin kilang kitail ni pereperen wia doadoahk en rahk. Re kin pwuriamweikihla kilang duwen atail kin wia doadoahk wet ni minimin! Ele irail mwein kahng en nda met ni ahnsou me re kin seiloak ong ehu sahpw oh diarada me Sounkadehdehn Siohwa kan nan wasao pil kin wia doadoahkohte me irail kilangehr nan pein sapwarail kan. Ahpw, kitail ese me ni me ahnsou konehng, atail imwintihti kan pahn wehwehki ihs Siohwa oh Ih me kin sewese kitail oh Ih me utupen atail kin miniminpene oh nsenamwahu.—Esekiel 38:10-12, 23.
6. Likilik dahieu kitail kin ahneki ni ahnsou kitail kin iang doadoahk en rahket, ahpw peidek dahieu kohda?
6 Kaunen rahket me ketikihong sapwellime Ohl, Sises Krais, “manaman koaros . . . en nanleng oh sampah.” (Madiu 28:18) Siohwa kin doadoahngki Sises en apwaliada doadoahk en rahket ki sapwellime tohnleng en nanleng kan oh pwihn en mekeidi kan “ladu lelepek oh loalokong” me kin mih nin sampah wet. (Madiu 24:45-47; Kaudiahl 14:6, 7) Ahpw, iaduwen kitail kak dadaurete pahn kalokolok kan oh pil kolokolte atail peren ni atail pahn nantiong wia doadoahk en rahket?
7. Mehnia irairen madamadau kitail anahne kolokolte ni ahnsou aramas kin uhweng de kaloke kitail?
7 Ni ahnsou me aramas akan kin uhwong kitail de kitail pahn lelong kalokolok, kitail en rapahki sapwellimen Koht sawas pwen sewese kitail en kolokolete soahngen madamadau me Pohl kin ahneki. E ntingihdi: “Ma aramas akan pahn kin kerieikitala, a se pahn kin kapairailda; ma re kalokei kiht, a se kin kanengamahiong; ma re kin kasaroweikitedi, a se kin kasapahlkihong irail lokaia kadek.” (1 Korint 4:12, 13) Soahngen irairen madamadau wet, patehng atail kin kadek koasoiong aramas akan nan doadoahk en kalohk ong wehi pokon, kin ekei ahnsou, kak kawekila madamadau kan en aramas akan me kin uhwong kitail.
8. Kamehlele dahieu ke kak alehdi sang mahsen en Sises me ntingidi nan pwuhken Madiu 10:28?
8 Edetehn aramas akan kin song en kamasepwehki kitail en kemehla kitail, atail ngoang nin duwen tohndoadoahk kan en rahket sohte kin luwetala. Ni eimah, kitail kin kalohkiseli Rongamwahu en Wehio ni uwen me kitail kak. Oh kitail kin alehdi kangoang laud sang mahsen en Sises: “Kumwail dehr masak irail kan me kin kemehla paliwar, re ahpw sohte kak kemehla soul; a kumwail masak Koht me kak ketin kemehla paliwar oh mour oh kesepwekelahn ira koaros nan Gehenna.” (Madiu 10:28) Kitail ese me Samatail nanleng iei Sounketikihda mour. E kin ketin katingih irail akan me kin kolokolte ahr lelepek ong Ih oh ni lelepek nantiong wia doadoahk en rahket.
Rong en Komour Ehu
9. Iaduwen ekei kin mwekidki mahsen kan en Esekiel, oh iaduwen nan rahnpwukat?
9 Ni ahnsou me soukohp Esekiel ni eimah kalohkiseli sapwellimen Siohwa mahsen kan ong irail “wehi kan me kahngohdilahr oh peliandahr kan”—wehi kan en Israel oh Suda—ekei aramas kin perenki rong dahme e kin nda. (Esekiel 2:3) Siohwa mahsanih: “Re kin wiahkin uhk sounkamweit men me kin wiewia koulen limpoak de kesekesengki arp.” (Esekiel 33:32) Edetehn irail kin perenki rong mahsen kan en Esekiel, re ahpw sohte kin kapwaiada. Dahme wiwiawi nan rahnpwukat? Eri, ni ahnsou me luwen me keidi kan oh iengarail kan kin ni eimah lohkiseli sapwellimen Siohwa mahsen kan, ekei aramas kin perenki rong duwen kapai kan me Wehio pahn wahdohng kitail, ahpw re sohte kin uhdahn kalahnganki, wiahla tohnpadahk kan oh iang doadoahk en rahket.
10, 11. Nan pahr kan en senturi 20, dahme wiawi pwehn kehsehkin aramas akan duwen Rongamwahu en komour, oh met kin imwikihla dah?
10 Ahpw, aramas tohto mwekidkihda doadoahk en rahket ni ahl me mwahu oh irail uhd iangala doadoahk en lohkiseli sapwellimen Koht mahsen kan. Karasepe ieu, erein kapokon kan en Kristian me wiawi sang nan pahr 1922 lel 1928 mahsen en kadeik kan ong koasondi suwed wet en Sehdan me wiawi ni sansal. Radio station kan kin pakairkihda kadeik pwukat me kohda nan kapokon pwukat. Mwurin met, sapwellimen Koht aramas akan kin kihseli nting kan en kadeik pwukat rar kan.
11 Ni imwin pahr akan en 1930, ehu soangen elen kalohk tohrohr pil kin wiawiehr me adaneki “information marches” oh wehwehki kapar en kair. Nin tepio, sapwellimen Siohwa aramas akan kin weuwaseli doaropwe kan me re kin mware oh doaropwe pwukat pakairki oaralap en kapahrek ong wehi pokon kan. Ni ahnsou mwuri, irail kin weuwaseli poster kan me mie nting pwukat “Pelien Lamalam iei lidip ehu oh pisnes likamw ehu” oh “Papah Koht oh Krais me Nanmwarki.” Ni ahr kin kaparseli nanial kan, aramas tohto kin kilikilang irail. Emen brother me kin ahnsou koaros iang doadoahk wet nanial kan en London, England, koasoia met, ‘Doadoahk wet kin kakehle Sounkadehdehn Siohwa kan oh pil kahrehong aramas tohto en esehla ihs irail.’
12. Likin sapwellimen Koht kadeik kan, dahme kitail kin koasoiong aramas akan nan atail doadoahk en kalohk, oh ihs me kin ehupene wia doadoahk en kalohki Rongamwahu?
12 Ni ahnsou me kitail kin kalohkiseli sapwellimen Koht kadeik kan, kitail pil kin koasoia duwen kapai kan me Koht inoukihong kitail nin duwen Rongamwahu en Wehio. Atail kin wia doadoahk wet ni eimah nin sampah wet kin sewese kitail en rapahki irail aramas warohng kan. (Madiu 10:11) Pali moron en aramas akan me kin iang pwihn en mekeidi kan me rongehr eker en rahket nan erein sounpar 1920 samwa lel 1930 samwa. Eri, ni ahnsoun kapokon ehu wiawiehr nan pahr 1935, rong kaselel ehu kohda duwen koapworopwor en paradais nin sampah ehu ong irail pwihn en “pokon kalaimwun” en “sihpw teikan.” (Kaudiahl 7:9; Sohn 10:16) Re kin kapwaiada sapwellimen Koht kaweid en kadeik kan oh irail kin iang pwihn en me keidi kan nan doadoahk en kalohki Rongamwahu en komour.
13, 14. (a) Kamweit dahieu pwuhken Melkahka 126:5, 6 kin kihda? (b) Ma kitail kin pousehla kamwarek oh kalamwurehki pihl, dahme pahn wiawi?
13 Mahsen kan en Melkahka 126:5, 6 kin kihda kamweit laud ong sapwellimen Koht tohndoadoahk en rahket, oh keieu ong irail akan me kin lelong kalokolok: “Irail kan me sengiseng nindokon arail kamwakamwarak, re en dolung wahnsapwarail pereperen! Irail kan me sengiseng nindokon arail weuwa kohwei ar werentuhke kan re en koul oh ngisingiski peren ni arail pahn pwurodo, wa kohdo wahnsapwarail.” Mahsen kan en sounmelkahka menet duwen kamwakamwarak oh dolung wahnsahpw akan kin karasaiong sapwellimen Siohwa epwel mwahu oh kapai kan ong luwen aramas akan me sapahldo sang ahr kin selidi nan Papilon en mahs. Irail me inenen peren ni ahnsou re pitsang Papilon, ahpw ele mwein irail kin sengiseng ni ahnsou re kin kamwakamwarak nan pwel me sohte koadoahke erein sounpar 70 me irail kalipilipla. Ahpw, irail akan me pousehla kamwakamwarak oh wia doadoahk kan en onehda sapahl, irail kin paiekihda oh kilangada wahn en arail doadoahk kan.
14 Mwein kitail kin sengiseng ni ahnsou me kitail kin lelohng kalokolok kan de ni ahnsou me kitail de iengatail pwoson akan kin kamakamki atail wiewia pwung kan. (1 Piter 3:14) Ni atail kin wia doadoahk en rahk, mwein nin tepio kitail kin apwalki doadoahk wet pwehki mwomwen sohte mehkot me kitail kak kasalekihda me atail doadoahk kin pweida. Ahpw, ma kitail pahn pousehla kamwarak oh kalamwurehki pihl, Koht pahn ketin kakairada tuhkeo, oh pak tohto, daulihla dahme kitail kin kasik. (1 Korint 3:6) Met kin sansal sang pweidahn atail doadoahk en kihseli Paipel kan oh sawaspen Paipel kan.
15. Kihda karasepe ieu ong iaduwen pwuhken Kristian kan nan doadoahk en rahket kin pweida mwahu.
15 Karasepe ieu, mie ohl emen me adaneki Jim. Ni ahnsou me eh nohno mehla, e diarada ehu pwuhk me nein eh nohno me oaralap koasoia Life—How Did It Get Here? By Evolution or by Creation? a E wadek pwuhko oh perenki audepe kan. Mwurin met emen Sounkadehde tuhwong ih nanial oh ira koasoakoasoiapene, oh Jim pwungki en pwurehng koasoi ong Sounkadehde menet oh mwurin mwo, e tepida onop Paipel reh. Jim mwadang kekeirada ni pali ngehn, oh inoukihda pein eh mour ong Siohwa, oh papidaisla. E padahkiong tohn eh peneinei kan duwen dahme e sukuhliki. Mwurin mwo, rie ohl oh lih wiahla Sounkadehdehn Siohwa kan, oh Jim perenki ale pwais en papah nin duwen tohndoadoahk kan me pein toukihda ahr ahnsou en doadoahk nan Bethel London.
Mih Pahn Kalokolok Ahpw Pereperen
16. (a) Dahme kahrehda doadoahk en rahket pweidaher? (b) Kaweid dahieu me Sises kihda me kin pid dahme Rongamwahu pahn kak wia, ahpw soangen madamadau dahieu kitail kin ahneki ni ahnsou kitail kin tuhwong aramas akan?
16 Dahme kahrehda doadoahk en rahket pweidaher? Pwehki Kristian me keidi kan oh iengarail kan kin kapwaiada sapwellimen Sises kaweid akan: “Me I ndaiong kumwail ni rir, kumwail kasalehda ni pokon sansal; oh me I mwengininginkihong kumwail, kumwail lohkiseli sang pohn ihmw kan.” (Madiu 10:27) Ahpw, kitail kak kasik kahpwal akan, pwe Sises kaleke: “Aramas akan pahn pangala riarail kan pwe en kamakamala, oh pahpa kan pil pahn wia duwehte ong nair seri kan. Seri kan pahn pelianda ar pahpa oh ar nohno kan, oh re pahn kemeirahla.” Sises pousehla mahsanih: “Kumwail dehr lemeleme me I kohdohn kamweimwahwihala sampah; soh, kaidehkin meleilei me I wa kohdo, pwe kedlahs.” (Madiu 10:21, 34) Sises sohte kupwurki en katohrohrpeseng peneinei kan. Ahpw Rongamwahu ekei ahnsou kin mwomwen imwikihla met. Met pil kin wiawi ni ahnsou sapwellimen Koht ladu kan en nan rahnpwukat kin wia ahr doadoahk en kalohk. Ni ahnsou me kitail kin kohla rehn peneinei kan, kitail sohte men kahrehong peneinei kan en katohrohrpeseng. Kitail kin inengieng aramas koaros en koledi Rongamwahuo. Ihme kahrehda, kitail kin song en tuhwong koaros tohnpeneinei kan nan peneinei ni kadek, pwehn kahrehong “irail akan me konehng en ale mour soutuk” en perenki rong atail Rongamwahu.”—Wiewia 13:48.
17. Iaduwen irail akan me kin utungada sapwellimen Koht kaunda tohrohrsang aramas teikan, oh kihda karasepe ieu?
17 Rongamwahu en Wehio kin katohrehla irail akan me kin utungada sapwellimen Koht kaunda. Karasepe ieu, medemedewe iaduwen iengatail tohnkaudok akan kin weksang aramas teikan pwehki re kin ‘kihong Sihsar dahme en Sihsar, a ong Koht dahme sapwellimen Koht’ ni mwehin kaunda en National Socialism nan Germany. (Luk 20:25) Irail kin weksang kaun en pelien lamalam akan oh Kristian akan me kin iang pelien lamalam kan en Kristendom, irail sapwellimen Siohwa ladu kan kin kesihnenda teng oh sohte kawehla mour en kosonned akan en Paipel. (Aiseia 2:4; Madiu 4:10; Sohn 17:16) Professor Christine King, nan nah pwuhk me oralape The Nazi State and the New Religions koasoia: “Ihte pwihn en Sounkadehde kan me koperment en [Nazi] sohte kak kalowehdi, edetehn koperment me kamehla aramas kid kei, ahr doadoahk sohte kin uhdi oh nan May 1945 doadoahk en Sounkadehdehn Siohwa kan momourete, ahpw National Socialism sohla mie.”
18. Soahngen madamadau dahieu irail sapwellimen Siohwa aramas akan kin ahneki mendahki kalokolok?
18 Irairen madamadau kan en sapwellimen Siohwa aramas akan kin sansal ni ahnsou me re kin lelohng kalokolok kan. Irail kaun akan en sampah wet kin pwuriamwekihla duwen atail pwoson akan, re pil kin pwuriamwekihla en kilang me kitail sohte kin direkihla kailok de kouimwintihti. Karasepe ieu, irail Sounkadehde kan me pitsang Holocaust kin kalapw koasoia duwen ahr peren oh nsenamwahu ni ahnsou re kin medemedewe duwen dahme re lelong ni ahnsowo. Irail ese me Siohwa me ketikihong irail “manaman lapalap eh uhdahn sapwellimen Koht, a kaidehk ahr.” (2 Korint 4:7) Luwen me keidi kan me kin mih rehtail kin alehdi likilik ehu en kamehlele me “adarail kan eh ntingdier nanleng.” (Luk 10:20) Pwehki arail kin dadaurete, wiewia wet kin kapwarehda arail koapworopwor me sohte kin imwila suwed, oh pil irail tohndoadoahk en rahk wet me arail koapworopwor iei en kousoan nan sampah pil kin ahneki soangen koapworopwor kehlailohte.—Rom 5:4, 5.
Nantihong Nan Doadoahk en Rahk
19. Ia ekei wiepen doadoahk en kalohk en Kristian me kin doadoahk mwahu?
19 Kitail sehse ia uwen werei Siohwa pahn mweidong kitail en wia doadoahk en rahket ni karasaras. Ahpw, ni ahnsouwet, kitail anahne ese me tohndoadoahk en rahk akan kin doadoahngki ekei wiepe kan en wia ahr doadoahk. Kitail pil kak koapworopworki me wiepen doadoahk en kalohk pwukat me sounkalohk kan kin doadoahngki sangete mahs lel met pahn doadoahk mwahu. Pohl padahkiong ienge Kristian akan: “Ihme I pekihki rehmwail, . . . kumwail en kin alasang ie.” (1 Korint 4:16) Ni ahnsou Pohl tuhwong elder kan en Episos nan Miletus, e katamankinirailla me e sohte kin ekihsang irail mehkot ahpw e kin padapadahk ong irail nan “wasahn kapokon kan oh nan ihmw lel ihmw.” (Wiewia 20:20, 21) Iengen Pohl, Timoty, kin sukuhliki duwen wiepen kalohk en wahnpoarono oh ih kahrepe me e kak padahkiong mehn Korint kan duwen wiepe pwukat. (1 Korint 4:17) Koht kin kapaiada wiepen doadoahk en kalohk en Pohl, oh e pil pahn kapaiada kitail ni atail kin nantiong wia doadoahk en kalohki Rongamwahu sang ihmw lel ihmw, pwurehng pwurala rehn aramas akan, onop Paipel rehn aramas akan, oh wasa koaros me kitail pahn kak tuhwong aramas.—Wiewia 17:17.
20. Iaduwen Sises kasansalehda me doadoahk laud ehu en rahk ni pali ngehn pahn wiawi, oh iaduwen mahsen wet kin pweida nan pahr keren kan?
20 Mwurin Sises kalohk ong lihen Samaria men me karanih Sychar nan pahr 30 C.E., e mahsanih duwen rahk en pali ngehn. E mahsanihong sapwellime tohnpadahk kan: “Kumwail sarada oh kilengwohng mwetuwel kan, wahrail kan mahier oh mwahuwongehr en dondol. Me kin dolung, e kin ale pweinen eh doadoahk, oh e kin dolung ong mour soutuk; pwe me kin padokedi oh me kin dolung ira koaros pahn pereperenpene.” (Sohn 4:34-36) Ele mwein Sises kilangada pweidahn e koasoiong lihen Samaria menet, pwe aramas tohto kin tepida pwosonla ih pwehki liho me kadehde ong irail dahme e rongehr sang rehn Sises. (Sohn 4:39) Nan ahnsou kerendo kan, ekei wehi kan kin uhdisang ahr keinapwidi doadoahk en Sounkadehdehn Siohwa kan de, ekei pak, wehi kan kin kamanaiong irail arail sarawi oh mehpwukat kin langadahng irail mwetuwel kapw kan ong doadoahk en dolung rahk nan sahpw pwukat. Ihme kahrehda, doadoahk laud en rahk ni pali ngehn kin wiwiawi. Wasa koaros nan sampah, kitail kin ale kapai laud kan ni ahnsou me kitail kin, ni peren, nantiweite nan doadoahk en rahk.
21. Dahme kahrehda kitail ahneki kahrepe mwahu ehu en nantihong wiahla tohndoadoahk en rahket ni peren?
21 Ni ahnsou me wahn sahpw akan mahier oh mwahuwongehr en dondol, tohndoadoahk kan anahne en mwadangete wia arail doadoahk. Re anahne karuwaru wia arail doadoahk. Rahnwet, kitail anahne ni pwerisek wia atail doadoahk ni karuwaru pwehki kitail kin momour “ni imwin ahnsou.” (Daniel 12:4) Ei, kitail kin lelong kasongosong kan, ahpw mie doadoahk en rahk me laudsang mahs me sapwellimen Siohwa tohnkaudok akan anahne wia. Met iei ahnsoun pereperen. (Aiseia 9:3) Nin duwen tohndoadoahk peren kan, kitail en nantiweite nan doadoahk en rahk!
[Nting tikitik me mi pahs]
a Wiawihda oh kihseli sang rehn Sounkadehdehn Siohwa kan.
Iaduwen Ke Pahn Sapeng?
• Iaduwen Kaun en rahk ketin karonge pekipek ehu en pekederwei tohndoadoahk kan?
• Edetehn aramas akan kin “kailongkinkitailla,” soangen irairen madamadau dahieu kitail anahne en kolokolete?
• Dahme kahrehda kitail kak peren edetehn kitail kin lelohng kalokolok kan?
• Dahme kahrehda kitail anahne nantiweite nan doadoahk en rahk ki madamadau en karuwaru?
[Kilels nan Pali 14, 15]
Irail akan me kin iang doadoahk en rahk en pali ngehn kin alehdi sawas sang rehn tohnleng kan
[Kilel nan Pali 16]
Kapar en kair kan kin kahrehong aramas tohto en rong duwen Rongamwahu
[Kilel nan Pali 16]
Kitail kin padokedi oh kalamwurihki pihl, ahpw Koht me kin ketin kakairada tuhkeo