Wia Uwen Me Ke Kak Nan Doadoahk en Ahnsoun Rahk
1 Sapwellimen Siohwa soukohp kan mahs oh pil pein Sises Krais mahsanih duwen doadoahk en kihpene aramas akan duwehte doadoahk en ahnsoun rahk. (Aiseia 56:8; Esek. 34:11; Sohn 10:16) Doadoahk wet kin wiwiawi ahnsou me doadoahk en kalohki Rongamwahu en Wehin Koht wasa koaros nan sampah wiwiawi. (Madiu 24:14) Wekpeseng en irail me kin papah Koht oh irail me sohte kin papah Koht pahn sansalda. (Mal. 3:18) Dahme met kin wehwehki ong kitail?
2 Pein Atail Pwukoa: Kitail kak sukuhliki sang mehn kahlemeng mwahu en Pohl, me kin wia uwen me e kak nan doadoahk en kalohk mahs. E wehwehki me e sapwellimaniki pwukoa en kalohk pwe aramas akan kak rong duwen Rongamwahu oh ale komourparail. E kin mwekidki pwukoa wet oh ihme kahrehda e kin doadoahk laud pwehn sewese irail. (Rom 1:14-17) Pwehki irair suwed en sampah wet me kin kapilpene aramas akan rahnwet, kitail soh wehwehki duwen atail pwukoa laud en kalohk ong irail me mihmi nan atail wasahn kalohk kan?—1 Kor. 9:16.
3 Ahnsoun Doadoahk Karuwaru: Doadoahk en kalohk kin duwehte doadoahk en irail me kin rapahki aramas akan me keper lelohng irail de mehkot wiawiong irail oh aramas sohte kak diar irail. Kitail anahne rapahki aramas akan lao lel kitail diarada irail oh sewese irail (ni pali ngehn) mwohn e pahn pwandala. Sohte ahnsou laud en wia met. Mour en aramas akan mihlahr nan irair en keper! Ihme kahrehda, Sises kangoange sapwellime tohnpadahk kan en “peki rehn Kaunen rahket pwe en ketin kadarodo tohndoadoahk tohto pwe re en iang doadoahk.”—Madiu 9:38.
4 Pwe kitail pohnese duwen kahrepe kitail anahne wia doadoahk karuwaru nan rahn pwukat, sounkalohk tohto kalaudehla arail doadoahk nan doadoahk en sewese aramas en ale komourparail. Emen mwahnakapw me ede Hirohisa mihmi rehn eh nohno iangahki rie pahmen me tikitik sang ih. E kin sewese eh peneinei ni e kin doadoahk en mwohni—e kin pirida kuloak siluh ni sohrahn oh kihpeseng nuhspepa kan. Ahpw, likin met, Hirohisa men kalaudehla eh doadoahk nan kalohk, eri e tepida Regular Pioneer. Mie ahl kan me ke kak kalaudehla ahmw doadoahk nan doadoahk wet me sohte pahn pwurehng wiawi?
5 “Atail ahnsou mwotomwotlahr.” (1 Kor. 7:29) Ihme kahrehda, kitail men wia uwen me kitail kak nan doadoahk wet me keieu kesempwal nan sampah rahnwet—kalohki Rongamwahu en Wehin Koht oh doadoahk en katohnpadahk. Sises mahsanih me doadoahk en kalohk wet kin rasehng doadoahk en ahnsoun rahk. (Madiu 9:35-38) Ni atail kin wia uwen me kitail kak nan doadoahk en ahnsoun rahk, kitail kakete sewese aramas akan en wiahla kisehn pokon kalaimwun me Kaudiahl 7:9, 10 kin kasalehda.