Kitail Kin Kalohkihong Meteikan Atail Koapworopwor en Wehio
1 Ni imwin rahn apwal pwukat, aramas tohto nan sampah sohla arail koapworopwor. (Ep. 2:12) Tohto me soaloalokong ni ar kin koapworopworki kepwehpwehn sampah, kaundahn aramas, palien sains oh soahng teikan. Ia uwen atail nsenamwahu pwe kitail ahneki koapworopwor mehlel ong ahnsou kohkohdo, koapworopwor ehu me “rasehng peipwung ehu nan kapehditail kan, me teng, kehlail!”—Ipru 6:19.
2 Pahnangin kaundahn Koht, sampah pahn wekidekla wiahla paradais. Kompoakepatail melahr akan pahn kaiasada. (Wiewia 24:15) Semwehmwe, kopwung sapwung, soumwahu, mahla, oh mehla pahn solahr. (Mel. 9:18; Mad. 12:20, 21; Kaud. 21:3, 4) Iei ekei inou kan en Koht me pahn keren pweida. Soahng dah kan nan atail koapworopwor wet me ke kin kasikasik?
3 Pakairki Rongamwahu: Kitail en dehr kolokolete koapworopwor en Wehio ong pein kitailte. Limpoakohng Koht oh mehn mpatail kamwakid kitail en kahlemengih Sises oh “kapahrengkihong me semwehmwe kan rongamwahu . . . en lohkihong me sensel kan ar saledek, oh ong me maskun kan ar kakehr kilangada wasa, oh pwe I en kasaledekala irail kan me mihmi nan apwal.” (Luk 4:18) Wahnpoaron Pohl kin kalohkihong aramas rongamwahwo nan wasahn netinet kan oh sohte lipilipil wasa aramas kak dierek ie. E kihong eh ahnsou laud ong doadoahk en kalohk. (Wiewia 18:5) Alasang eh mehn kahlemeng en ngoang nan doadoahk en kalohk pahn perehsang kitail “pwunod en mouren sampah kan, noahrok en dipwisou kan”en katikitikla atail koapworopwor en Kristian.—Mark 4:19.
4 Atail koapworopwor en Wehio sohte pahn sohla ni atail tuhwong irail me sohte kin nsenohki met, de sohte perenkihda rongamwahu en Wehio, de me kin pelian kitail. Kitail kin “kolokol tengeteng koapworopwor me kitail kin kadehdehda.” (Ipru 10:23) Kitail sohte kin “namenengki rongamwahwo.” (Rom 1:16, NW) Mwein kasalepen atail pwoson teng oh atail dadaurete met me pahn kamwakid ekei en men rong.
5 Kitail kin ni ahl konehng kamwakid meteikan en tehk pweidahn kokohp kan en Paipel me pid mwomwen susuwedlahn irair kan nan sampah, ahpw mendahki met kitail kaidehn sounkalohk rongsuwed. Weksang met, atail kalohk kin keieu pid duwen koapworopwor en Wehio—rongamwahu en Wehin Koht. Kitail en padahkihong rongamwahu wet lel ni imwi ni ahl me pahn kasalehda atail ngoangki oh kamehlele met pwe me kitail “kin koapworopworki en kak pweida.”—Ipru 6:11.