“Ke Pahn Wiahla Pioneer Mwahu Men!”
1. Ia pepehm en emen sister duwen doadoahk en pioneer?
1 Kathe B. Palm nda: “Sohte ehu doadoahk me kak kihong ie nsenamwahu de wadohng ie kapai laud.” E doadoahngki sounpar tohto ong doadoahk en pioneer pwehn kalohk wasa koaros nan Chile nan palieir en Amerika. Mwein mie emen me kin medewe duwen kapai en doadoahngki pali laud en eh ahnsou pwehn papah Koht me ndaiong uhk: “Ke pahn wiahla pioneer mwahu men!”
2. Dahme kahrehda nsenamwahu mehlel kin kohsang atail iang doadoahk kan me kin pid atail kaudok ong Siohwa?
2 Elen Mour me Kansenamwahu: Atail Soun kahlemeng Sises, kin ketin diar nsenamwahu mehlel ni eh kin ketin wia kupwuren Semeo. (Sohn 4:34) Kahrehda, e kin ketin mehlel ni eh kin ketin padahkihong sapwellime tohnpadahk kan me nsenamwahu mehlel kin kohsang atail kin iang doadoahk kan me kin pid kaudok ong Siohwa. Kitail kin nsenamwahu ni atail mour kin audaudki doadoahk kan me kin kaperenda Siohwa. Patehng met, ni atail kin kalaudehla kihong atail ahnsou, kehl oh dipwisou kan pwehn sewese meteikan, met kin kalaudehla atail peren.—Wiewia 20:31, 35.
3. Peren dahieu me kitail kak ahneki ni atail kin kalaudehla atail iang kalohk?
3 Atail kin kalaudehla atail iang kalohk kin kalaudehla ahnsou mwahu en tapiada onop en Paipel kan. Mehnda ma tohnihmw tohto sohte kin perenki rong, mwomwen atail kilangwohng wasahn kalohk kak wekila ni atail kin esehla oh koahiekla nan kalohk. Pioneer kan kak doadoahngki soahng koaros me re sukuhlki sang arail Sukuhl en Pioneer me re kak iang mwurin sounpar ehu en arail pioneer. (2 Tim. 2:15) Ni atail kin nannanti, kitail kakete padokedi weren padahk mehlel me pahn pweida mwuhr.—Ekl. 11:6.
4. Dahme me pwulopwul kan me pahn kereniong kesepwil en medewe duwe?
4 Me Pwulopwul kan: Ni omw pahn kereniong kanekehla sukuhl, ke kin medewe kanahieng dahme ke pahn wia ni ahnsou kohkohdo? Met omw sukuhl me kin kihsang pali laud en omw ahnsou. Ahpw ia duwen omw pahn doadoahngki omw ahnsou mwurin kesepwil? Ke sou pahn kapakap oh medemedewe duwen doadoahk en pioneer a kaidehn doadoahk en mwohni rahn koaros? Soahng kan me ke pahn sukuhlki ni omw kin kalohk ong soangsoangen aramas akan, powehdi omw kahpwal kan, kaiahnehda pein kowe, oh esehla wiepen padahk pahn wia kamwahu ong uhk erein omw mour.
5. Ia duwen pahpa oh nohno kan oh pil mwomwohdiso arail kak kangoange me pwulopwul kan en pioneer?
5 Pahpa oh nohno kan, ia duwe, kumwail kin sewese noumwail seri kan en doadoahngki pali laud en arail ahnsou pwehn papah Siohwa? Amwail lokaia oh mehn kahlemeng mwahu kak sewese irail pwehn keieu kesempwalki Wehio. (Mad. 6:33) Ray me tepida pioneer mwurin highskuhl tamanda oh nda: “Ei nohno kin ahnsou koaros pehm me doadoahk en pioneer kin wia elen mour me keieu mwahu.” Koaros nan mwomwohdiso kak kangoange me pwulopwul kan sang ni arail lokaia oh utung irail en wia doadoahk en pioneer. Jose me mi nan Spain, nda: “Ei mwomwohdiso kin kilangwohng doadoahk en pioneer nin duwen doadoahk me keieu mwahu ong me pwulopwul kan. Arail koasoi kan oh arail kalahngan ong doadoahk wet iangahki arail sawas kahrehiong eh mengei ong ie en tepida pioneer.”
6. Dahme kitail kak wia ma kitail sohte ahneki ineng en wia doadoahk en pioneer?
6 Powehdi Kahpwal kan: Ahpw ia duwen ma ke nda me, ‘I sohte men iang pioneer’? Ma ih duwen omw pepehm, eri kapakap ong Siohwa duwen omw pepehm oh patohwanohng ih, ‘I sohte wehwehki ma pioneer me I men wia, ahpw I men wia dahme pahn kaperenda komwi.’ (Mel. 62:8; Lep. Pad. 23:26) Mwuri, rapahki kaweid sang sapwellime Mahsen oh pwihn. Pioneer tohto “songadahr” doadoahk wet ni arail iang wia sawaspen pioneer kan oh peren me re ale kin kamwakid irail en men doadoahngki pali laud en arail ahnsou pwehn papah Siohwa.—1 Pit. 2:3.
7. Ia duwen atail kak powehdi pepehm me kitail sohte kak lel awa 70 nan ehuehu sounpwong?
7 Ia duwen ma ke sohte ese ma ke kak lel awa 70 nan ehuehu sounpwong? Ke sou koasoiong pioneer kan me ahneki soangen irairohte? (Lep. Pad. 15:22) Mwuri, wiahda ekei koasoandi kan. Ele ke pahn diar me kalohki ahnsou kan me ke kin doadoahngki ong soahng kan me sohte nohn kesempwal pahn wiahla mehkot mengei ong uhk.—Ep. 5:15, 16.
8. Dahme kahrehda kitail en kin pwurehng kasawih atail irair kan?
8 Pwurehng Kasawih Omw Irair: Atail irair kan kin kalapw wekidekla. E mwahu en kin pwurehng kasawih omw irair kan. Karasepe, ke pahn kereniongehr kommoal sang doadoahk? Randy me mwadang kommoal sang eh doadoahk nda: “Pilipil wet kahrehiong ngehi oh ei pwoud en kak tepida pioneer oh e kihong kiht ahnsou mwahu en keseula wasa me anahn laud mie. I alehdi kapai laud tohto pwehki pilipil wet, ahpw kapai me keieu laud iei ei ahneki nsenmwakelekel.”
9. Dahme pwopwoud kan anahne medewe?
9 Ekei pwopwoud kan kasawih arail irair kan oh diarada me kaidehn ira koaros anahne doadoahk en mwohni. Mehlel me re pahn anahne katikala ara doadoahngki mwohni ahpw mie katepen ara tounmetei. John me eh pwoud ahpwtehn uhdihsang eh doadoahk pwehn kalaudehla eh doadoahk en kalohk nda: “Sohte soangen nsenamwahu me duwehte ei kin ese me ei pwoud kin kedirepwki wia doadoahk en Siohwa erein rahno.”
10. Dahme kin kamwakid Kristian akan en medewe duwen pioneer?
10 Kasalepen Limpoak oh Pwoson: Siohwa ketin koasoanehdi doadoahk en kalohk en wia doadoahk me keieu kesempwal me kitail koaros kak wia. Koasoandi suwed wet pahn kereniong sohrala oh ihte irail kan me kin likweriong mwaren Siohwa me pahn komourla. (Rom 10:13) Atail limpoak ong ih oh kalahnganki dahme e ketin wiahiong kitail pahn kamwakid kitail en peikiong kehkehlik en ngoangki kalohk me kohsang rehn sapwellime Ohlo. (Mad. 28:19, 20; 1 Sohn 5:3) Patehng met, ahneki pwoson me kitail mihmier nan imwin rahn akan pahn kamwakid kitail en wia uwen me kitail kak koaros nan doadoahk en kalohk ni eh miehte ahnsou a dehr nohn doadoahngki dipwisoun sampah wet.—1 Kor. 7:29-31.
11. Ia pahn atail madamadau ma emen nda me kitail pahn wiahla pioneer mwahu men?
11 Doadoahk en pioneer kaidehn ihte en kalaudehla awahn kalohk ahpw e wia kasalepen atail poadidiong Koht. Eri ma emen ndaiong uhk me ke pahn wiahla pioneer mwahu men, kilangwohng met duwehte kaping ehu. Oh kapakap oh medemedewe en iang irail me kin wia doadoahk kansenamwahu wet.
[Kilel nan Pali 4]
Pahpa oh nohno kan, ia duwe, kumwail kin sewese noumwail seri kan en doadoahngki pali laud en arail ahnsou pwehn papah Siohwa?
[Kilel nan Pali 5]
Siohwa ketin koasoanehdi doadoahk en kalohk en wia doadoahk me keieu kesempwal me kitail koaros kak wia.