Kaiahnehda Noumw Seri kan en Pahpa Koht
1. Dahme Melkahka 148:12, 13 kin kangoange pahpa oh nohno kan en wia?
1 Siohwa kin ketin luke me pwulopwul kan en kapinga ih. (Mel. 148:12, 13) Kahrehda, pahpa oh nohno Kristian kan kin wia laud sang padahkihte neirail seri kan padahk mehlel en Paipel oh sapwellime Koht kosonned akan duwen tiahk. Irail pil kin kasukuhlihkin irail en wiahla sounkalohngki rongamwahwo. Ia duwen arail kak pousehlahte wiewia met?
2. Ia duwen mehn kahlemeng mwahu en pahpa oh nohno eh kak kamwakid seri kan?
2 Mehn Kahlemeng Mwahu: Sounkopwung Kidion padahkihong nah ohl 300 ko: “Kumwail mwasahn ie oh alasang dahme I pahn wia.” (Sounkopwung 7:17) Seri kan kin kilang oh alasang arail pahpa oh nohno kan. Emen pahpa kin doadoahk nipwong ahpw ni eh kin pwurasang doadoahk nimenseng en Rahn Kaunop, e sohte kin meir ahpw e kin wahda nah seri kan kohla kalohk mendahki eh inenen pwang. Mendahki ma e sohte kin lokaia, e sansal ong seri kan me doadoahk en kalohk kesempwal. (Mad. 6:33) Ia duwe, noumw seri kan kin kilang me ke kin perenki kapakap, wadek Paipel, iang pasapeng oh kalohk? Mehlel me ke sohte kak wia mehn kahlemeng mwahu ni unsek. Ahpw noumw seri kan pahn uhdahn men rong duwen mehkan me pid kaudok ong Siohwa ma re pahn kilang omw pwerisekiong papah ih.—Deud. 6:6, 7; Rom 2:21, 22.
3. Mehn akadei dah kan me pid kaudok ong Siohwa me pahpa oh nohno kan en sewesehki neirail seri kan en kak lel?
3 Pousehlahte Wiahda Mehn Akadei kan: Pahpa oh nohno kan sohte kin pwangahkihda kaiahne neirail seri kan en kak alu, lokaia, pein likouda oh soahng teikan. Ni seri kan ar kin kekeirda oh pweida nan soahng kan nan arail mour, mehn akadei kapw kan kin kohwong irail. Ma irail pahpa oh nohno Kristian kei, irail pil kin sewese neirail seri kan en koasoanehdi oh nantihong lel arail mehn akadei kan me pid kaudok ong Siohwa. Re kin wia met ni uwen sounpar oh koahiek en seri kan. (1 Kor. 9:26) Ke kin padahkihong noumw seri kan en wiahda arail pasapeng ni pein arail lokaia oh kaunopada pein arail padahk kan nan Sukuhl ong Sapwellimen Koht Doadoahk? (Mel. 35:18) Ke kin kaiahneirailda en iang pidada soangsoangen wiepen kalohk kan? Ke kin sewese irail en akadeiong en papidaisla oh doadoahngki pali laud en arail ahnsou pwehn pahpa Siohwa? Ke kin sewese irail en werekiong sounkalohk kan me kin peren oh ngoang pwe irail en ale mehn kangoang sang irail?—Lep. Pad. 13:20.
4. Ia duwen seri kan arail paiekihda pahpa oh nohno me kin tepida kaiahneirailda en papah Siohwa sangete arail tikitik?
4 Sounmelkahkao koasoia: “Komw ketin padahkihieier sang ni ei tikitik, oh lel met I pil lohlohkiseli sapwellimomwi wiewia kapwuriamwei kan.” (Mel. 71:17) Tepida kaiahnehda noumw seri kan sangete arail tikitik ren kin papah Siohwa. Ni omw sewese irail kakairada arail nanpwungmwahu rehn Siohwa, e pahn uhdahn sewese irail ni arail lalaudla!—Lep. Pad. 22:6.