Pahpa oh Nohno kan—Kaiahne Noumwail Seri kan Sang Ahnsou me Re Tikitik
1 “Padahkihong kisin seri men duwen eh pahn momour, eri, e pahn tamatamante erein eh mour.” (Lepin Padahk 22:6) Pahpa oh nohno kan, ma kumwail sohte men noumwail seri kan en “sohpeisang” padahk mehlel, iahd ke pahn tepida kaiahne irail? Ke anahne tepida mwadang—ahnsou me re wia kisin seri pwelel!
2 Ni ahnsou me Pohl mahsanih me Timoty ale kaiahn en pali ngehn sang ni e wia “kisin seri,” e wehwehki me kaiahn wet tepida sang ahnsou me e wia kisin seri pwelel. (2 Tim. 3:14, 15) Kahrehda Timoty kekeirada oh wiahla ohl men me kehlail ni pali ngehn. (Pilipai 2:19-22) Pahpa oh nohno kan, kumwail pil anahne tepida kaiahne noumwail seri kan sang ahnsou me re wia “kisin seri pwelel” pwehn sewese irail en ‘kekeirada ni [arail] papah Kauno [“Siohwa,” New World Translation].’—1 Sam. 2:21.
3 Kalamwurih Irail Pwehn Ren Kak Kekeirada: Duwehte kisin tuhke kan anahne pihl ahnsou koaros pwehn kekeirada oh wiahla tuhke kehlail kan, seri kan—sohte lipilipil arail sounpahr kan—anahne ale “pilen” padahk mehlel ahnsou koaros pwe ren kak kekeirada oh wiahla ladu en Koht kan me kehlail ni pali ngehn. Ahl me keieu kesempwal pwehn padahkihong seri kan padahk mehlel oh sewese irail en wiahla nanpwung mwahu rehn Siohwa iei onop Paipel nin duwen peneinei ehu oh kaukaule wia met. Ahpw, kumwail pahpa oh nohno kan, tamataman me emenemen noumwail seri kan wekpeseng—ekei kin kak mwohndi oh rong kanahieng werei sang ekei. Ong seri tikitik kan, e pahn keieu mwahu en wia onop kan me mwotomwot ahpw pak tohto sang onop kan me werei ahpw pak malaulau.—Deuderonomi 11:18, 19.
4 Ken dehr lemeleme me noumw seri kan sohte kak sukuhliki mehkot pwe re tikitik. Soai ong irail duwen aramas akan me mihmi nan Paipel. Kihong irail en wia mahlen kan de kamwomwada dahme wiawi nan Paipel. Kasalehong irail video cassette kan me Society wiahda, iangahki audiocassette kan—duwehte audiocassette kan me sipai. Tamataman me seri kan arail sounpahr oh pil arail koahiek en sukuhliki mehkot kin wekpeseng oh tamataman mehpwukat ahnsou me kumwail pahn wiahda amwail onop en peneinei. Nin tepio, kaiahn pahn wiawi ni ahl tikitik kan oh pil soahng kan me sansal oh mengei ong irail en wehwehki; ahpw ni ahnsou me serio pahn laudla, kaiahn pahn pil laudla oh oaritikla. E pahn mwahu ma seri kan pahn perenki arail sukuhliki Paipel. Kumwail mwahuki noumwail seri kan en “inengihada” sukuhliki Mahsen en Koht, eri kumwail anahne wia uwen me kumwail kak en wiahda onop en Paipel mehkot kaperen oh mwomwen “iou” pwe seri kan men wia.—1 Pit. 2:2.
5 Sewese Seri kan en Kekeirada Ong Soahng kan me Pid Mwomwohdiso: Wiahda mehn akadei kan ong noumwail seri kan pwe ren kak kekeirada ong soahng kan me pid mwomwohdiso. Ia mehn akadei me keieu kesempwal ren wia? Pahpa oh nohno en seri tikitik riemen koasoia: “Ira koaros tepida mwadang ale kaiahn en mwomwohd oh nennen nan Kingdom Hall.” Mwuhr, kumwail kak kaiahne seri kan en pasapeng ni pein arail lokaia nan mihding kan oh re pil kak akadeiong iang Theocratic Ministry Sukuhl. Nan kalohk, ekei mehn akadei kan me mwahu en nantihong iei: ekis koasoi oh kihong tohnihmw tract ehu, wadek iren Paipel ehu, ekis koasoi oh kihla makisihn kan, oh wiahda koasoipene nanpwungen serio oh tohnihmwo me wehwe oh katapan.
6 Wiahda Mehn Kahlemeng Mwahu oh Kasalehda me Kumwail Ngoangki Soahng Ngehnin kan: Noumwail seri kan kin rong pein kumwail koasoi duwen Siohwa oh kapakap ong Ih? Re kin kilang uhk wia soahng kan duwehte: onop Mahsen en Koht, iang towehda mihding kan koaros, iang kalohk, oh perenki wia kupwuren Koht? (Mel. 40:8) E kesempwal me irail wia soahng pwukat oh ren iang kumwail, pahpa oh nohno kan, en wia soahng pwukat—koaros miniminpene wia soahng ngehnin kan. Emen lih me koasoia duwen eh nohno, me sewese nah seri wenemen en kekeirada mwahu ni pali ngehn oh met irail koaros Sounkadehde lelepek kan: “Dahme se keieu tamataman duwen nohno iei met: pein ih wia mehn kahlemeng me uhdahn mwahu—eh mehn kahlemeng mwahu en lelepek ong Siohwa kin kamwekid kiht laud sang eh lokaia.” Emen pahpa en seri pahmen koasoia: “ ‘Se kin kihong Siohwa en keieu kesempwal nan aht mour’ oh met wia kaidehn lokaiahte ahpw e wia aht elen mour.”
7 Eri, kumwail pahpa oh nohno kan, tepida mwadang kaiahne noumwail seri kan, padahkihong irail padahk mehlel sang Mahsen en Koht, wiahda mehn akadei ong irail me pahn pil wekila ni arail kekeirada, oh pil wia uwen me kumwail kak en wia mehn kahlemeng mwahu ong irail. Mwuhr, ke pahn perenki me ke nantihong soahng pwukat!