Pahpa Oh Nohno Kan, Perenkihda Noumw Seri Kan
“Semomw oh inomw pahn perenkihda.”—LEPIN PADAHK 23:25.
1. Dahme pahn kahrehong pahpa oh nohno kan en perenkihda neirail seri kan?
IA wen kasalel en kilang tuhke pwul ehu en kekeirada wiahla tuhke laud ehu me lingan oh mie mweten tehn tuhke kansenamwahu ieu—keieu kaperen ma pein kowe me padokedi oh apwaliahda! Duwehte pahpa oh nohno kan me kin apwaliahda neirail seri kan oh irail wiahla laduhn Koht mah ni pali ngehn, met kin kaperenda irail, nin duwen Lepin Padahk en Paipel mahsanih: “Semen me pwung men pahn pereperen. Ke kak suweiki noumw pwutak loalokong. Kihong semomw oh inomw kahrepen ara pahn suweikin uhk; ih duwen omw pahn kaparanda inomw.”—Lepin Padahk 23:24, 25.
2, 3. (a) Iaduwen pahpa oh nohno kan en liksang dehr lelong nsensuwed oh pahtoula? (b) Dahme tuhke pwulopwul kan oh seri kan anahne pwen ira koaros en kak wiahla utupen peren ieu ehu rahn?
2 Ahpw, seri men sohte kin pein wiahla aramas “pwung” oh “loalokong.” Anahne doadoahk laud en sewese neitail pwulopwul kan en dehr kahrehong “nsensuwed” oh “pahtou” nan peneinei, met duwehte doadoahk laud ong apwaliahda tuhke pwulopwul ehu en kekeirada oh wiahla tuhke lingan ehu. (Lepin Padahk 17:21, 25) Karasepe ieu, duwehte mehkot me kin irerehda kisin tuhke pwulopwul ehu pwen kak wosada inen oh kehlail. Oh pil kesempwal en kalamwurehki pihl, oh kisin tuhke mwein pil anahne perepen sang kisin mahn akan. Oh kaimsekihla, en lopukasang ekei rahn tuhke-o pahn imwikihla tuhke lingan ehu.
3 Sapwellimen Koht Mahsen kasansalehda me seri kan anahne kaiahn ni elen Koht, kalamwureki padahk mehlel en Paipel, ale perepe sang tiahk sapwung kan, oh kaiahn en limpoak pwen kak lopukasang irair suwed akan. Ihme, pahpa kan kin ale kangoang en “kaiahneirailda nan padahk en Siohwa.” (Episos 6:4) Met kin pidada dah?
Kesempwaliki Mahsen en Siohwa
4. Pwukoah dahieu pahpa oh nohno kan kowahki me pid neirail seri kan, oh dahme anahn mwohn re kak kapwaiada met?
4 “Kaiane nan padahk en Siohwa” kin wehwehki en koasonehdi de kawukihla pein atail madamadau kan pwen pahrekiong kupwuren Siohwa. Pahpa oh nohno kan, anahne sewese neirail seri kan en esehla madamadau en Siohwa. Oh pein irail anahne kahlemengih Koht ni eh ketikihda kaian ni elen limpoak. (Melkahka 103:10, 11; Lepin Padahk 3:11, 12) Ahpw mwohn pahpa oh nohno kan kak kapwaiada met, pein irail pahn anahne loalenohng mahsen en Siohwa, nin duwen sapwellimen Koht soukohp Moses kaweidkin Israel en mahs: “Mahsen pwukat [sang Siohwa] pahn anahne mih nan mongiongomwail kan.”—Deuderonomi 6:6.
5. Iahd oh ni ahl dahieu pahpa oh nohno en mehn Israel kan anahne padahki neirail seri kan, oh ia wehwehn lepin lokaia, “padahkiong”?
5 Kaukaule onop Paipel, medemedewe, oh kapakap kin sewese pahpa oh nohno kan en kapwaiada dahme Moses uhd padahkiong en wia: “Padahkiong [mahsen en Siohwa] noumwail seri kan. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” Lepin lokaia “padahkiong,” ni lokaiahn Ipru kin wehwehki “pwurehng,” “kapwukapwurehieng,” “padahk ni ahl sansal.” Pil tehk, iaduwen Moses kin kasansalehda kesempwalpen en mwohniki ahnsou koaros sapwellimen Siohwa mahsen ko: “Salihediong padahk pwukat ni pehmwail oh nin temwamwail pwehn wia mehn kataman ong kumwail. Ntingihediong ni uhren imwamwail kan oh pil ni amwail ewen kehl akan.” Met inenen sansal, Siohwa kupwureki pahpa oh nohno kan en mweidohng neirail seri kan ahr ahnsou, ni ahnsou koaros!—Deuderonomi 6:7-9.
6. Dahme pahpa oh nohno kan anahne padahkiong neirail seri kan, oh imwikihla dah?
6 Dahkot “mahsen pwukat” en Siohwa me pahpa oh nohno kan anahne en padahkiong neirail seri kan? Moses ahpwtehn pwurehng koasoi duwen Kosonned Eiseko, kapataiong kosonned akan en dehr kamehla aramas, dehr kamwahl, dehr pirap, dehr karaunlikamw, oh dehr noaroak. Pahpa oh nohno en mehn Israel kan anahne en padahkiong neirail seri kan duwen kosonned me pid tiahk pwukat, iangahki kosonnedo en “poakohng Siohwa omw Koht ki mongiongomw unsek, mour unsek, oh ni omw kehl koaros.” (Deuderonomi 5:6-21; 6:1-5) Komw soh pahn pwungki me met soahngen pahdahk me seri kan anahne nan rahnpwukat?
7. (a) Paipel kin karasahiong seri kan duwehte dah? (b) Dahme kitail pahn kasawiahda ahnsowet?
7 Sahmw akan en mehn Israel ko alehdi kaweid wet: “Omw pwoud pahn kin rasehng tuhken wain wohkian ni imwomwo, oh noumw pwutak kan pahn kin rasehng tuhke olip kapilpene omw tehpel.” (Melkahka 128:3) Ahpw, pwe pahpa oh nohno kan en kak perenkihda neirail seri kan, oh sohte lelohng irair kansensuwed, re anahne pein nsenohkin neirail seri kan ehu ehu rahn. (Lepin Padahk 10:1; 13:24; 29:15, 17) Eri, kitail pahn kasawihada iaduwen pahpa oh nohno kan pahn kak kaiane, kalamwuhrehki pihl en pali ngehn, perehla, oh kihda kaiahn ni limpoak pwe irail pahn kak perenkihda neirail seri kan.
Kaiahne Kisin Seri kan
8. (a) Ihs me wia ni karasaras, tuhkehn irere Timoty? (b) Iahd me kaiahn pahn tepida, oh dahme e kin imwikihla?
8 Medewehla Timoty, me ale sawas de utuht sang sawas en tuhke rioapwoat—Ine oh eh nohno kalap. Pwehki ahn Timoty pahpa emen mehn Krihk oh sansal me ih kaidehn emen me pwoson, ahpw eh nohno mehn Suhs-o, Iunis oh en Iunis nohno, Lois, me kaiane pwutako sang ni e ‘seri pwelel en ese Pwuhk Sarawi.’ (2 Timoty 1:5; 3:15; Wiewia 16:1) Ira ahneki pai laud, pwehki ara loaloapwoatong padahkiong Timoty—pil ni ahnsou Timoty emen seri pwelel ira padahkiong ih duwen “manaman en Kauno [Siohwa] oh wiepen nin lime lapalap akan oh soahng kapwuriamwei kan me e ketin wiadahr.” (Melkahka 78:1, 3, 4) Timoty wiahla emen misineri nan sahpw doh kan, mwein ni ahnsou me e wia emen mwanakapw, oh e pil ahneki pwais kesempwal ieu ong kakehle mwomwohdiso en Kristian akan en mahs.—Wiewia 16:2-5; 1 Korint 4:17; Pilipai 2:19-23.
9. Iaduwen pwulopwul kan pahn kak sukuhliki en liksang lidip kan en noarok dipwisou kan de mwohni?
9 Pahpa oh nohno kan, kumwail wia soahngen tuhke en utuht dah kei ong noumw seri kan? Karasepe ieu, kumwail men kilang noumwail seri kan en tohpahrek ong mehkot me pid pali en mwohni de dipwisou kan? Eri ma ihduwen, kumwail anahne wia kahlemeng mwahu, en dehr rapahkihda oh pwainda soahng kapw koaros de dipwisou teikan me kumwail sohte anahne. Ma ke pahn nantiong en mwohniki mwohni kan oh dipwisou kan, menlau dehr pwuriamweikihla ma pein noumwail seri kan pahn alasang kumwail. (Madiu 6:24; 1 Timoty 6:9, 10) Ni mehlel, ma tuhkehn irere sohte kin inen, iaduwen kisin tuhke kan pahn kak kekeirada inen?
10. Ahn ihs kaweid pahpa oh nohno kan pahn ahnsou koaros liki oh rapahki, oh soahngen madamadau dah re anahne ahneki?
10 Pahpa oh nohno kan me kin perenkihda neirail seri kan pahn ahnsou koaros rapahki de liki sawas sang powe en kaiane neirail seri kan, oh ahnsou koaros en tehk dahme pahn keieu mwahu ni pali ngehn ong neirail seri kan. Nohno men me naineki seri pahmen koasoia: “Mwohn nait seri kan ipwidi, se kin kaukaule kapakapong Siohwa en sewese kiht en wiahla pahpa oh nohno mwahu, oh en mweidong sapwellime Mahsen en kahre aht mour, oh sen doadoahngki met nan aht mour kan.” E pil kapataiong: “‘Siohwa pahn keieu’, sohte kin ihte wia, loakaia ehu, ahpw se kin kapwaiada met nan aht mour.”—Sounkopwung 13:8.
Kalamwurehki “Pihl” Kaukaule
11. Dahme tuhke pwulopwul kan oh seri kan anahne pwen ren kak kekeirada mwahu?
11 Tuhke pwulopwul kan anahne pihl ahnsou koaros, ihme tuhke kan kin pweida mwahu ma mie ehu pillap limwahn tuhke kan. (Pil kilang Kaudiahl 22:1, 2.) Seri pwelel kan pil pahn kekeirada ni pali ngehn ma re ale kalamwur sang pihl en padahk mehlel en Paipel me pahn kohwong irail kaukaule. Ahpw pahpa oh nohno kan pil anahne kilang de tehk duwen ia uwen reirein ahnsou neirail seri kan pahn kak mwohndi oh sukuhliki Paipel. Ele mwein, onop en Paipel kan ni mwotomwot ahpw pak tohto me pahn mwahusang pak malaulau ahpw reirei. En dehr mwamwahleki kesempwalpen onop en Paipel mwotomwot kan. En isaneki ahnsou en ehupene, ih met me kesempwal en kakairada nanpwungmwahu rehn pahpa oh nohno kan ong neirail seri kan, me Iren Paipel kan kin kangoange.—Deuderonomi 6:6-9; 11:18-21; Lepin Padahk 22:6.
12. Ia kamwahupen wia kapakap rehn neitail pwulopwul kan?
12 Ehu ahnsoun onop rehn me tikitik kan kak wiawi ni imwin rahno. Emen pwulopwul tamanda: “Ai pahpa oh nohno kin mwohndi nan peht ni pwong koaros oh rong aht kapakap kan.” Emen pwulopwul tohrohr kin koasoi duwen kesempwalpen wiewia wet: “Met kin sewesekin ie en ahnla kapakap ong Siohwa ni pwong koaros mwohn I pahn meir.” Ni ahnsou seri kan pahn rong nan rahn koaros ahr pahpa oh nohno kan koasoi duwen Siohwa oh kapakap, Siohwa pahn wiahla emen me mehlel ong seri kan. Emen pwutak pwulopwul koasoia: “Meseikat kak meirpene ahnsou I pahn wia ai kapakap ong Siohwa, oh I pahn kilang Siohwa me mwomwen pahpa kalap mehlel men. Ai pahpa oh nohno kin sewesekin ie en wehwehki oh en kilang me Siohwa kin pid soang koaros me kitail kin wia oh koasoi.”
13. Kasukuhlih seri kan pil kak pidada dah?
13 Pwen sewese pwulopwul kan en sukuhliki padahk mehlel en Paipel, pahpa oh nohno kan kak kapatahiong soahngen sawas tohto ni ahnsou irail pahn padahkiong neirail seri kan duwen Paipel. Emen pahpa oh nohno koasoi duwen neira pwulopwul kan me saikinte wiahla mwahnakapw de peinakapw: “Seri riemenet tepida ale kaiane ni ara sohte pahn katairong nan Kingdom Hall, oh met tepida sang ni ara wihk riaute.” Emen pahpa kawehwehda duwen dahme eh peneinei wia: “Se ntingihdi eden pwuhken Paipel kan nan kisin doaropwe kan (index cards) oh kiht koaros kin praktis koasonehdi doaropwe pwukat ni pwung. Nei seri kan kin ahnsou koaros kaskasikong wia met.” Peneinei tohto kin kaweidih neirail seri kan mwohnte de mwurinte mwenge. Emen pahpa koasoi: “Mwenge en nisoutik iei ahnsou mwahu ehu ong kiht en koasoaiapene iren rahn.”
14. (a) Soahngen wiewia dah kei, kitail pahn kak wia rehn neitail seri tikitik kan? (b) Koapworoapwoar dah seri kan kin ahneki me pid sukuhliki mehkot?
14 Seri tikitik kan kin pil perenkihda rongorong poadoapoad en Paipel kan me mih nan pwuhken Nai Pwuhken Poadoapoad en Paipel kan.a “Ni ahnsou neit seri kan pwulopwul”, ehu pwopwoud nda, “me ahnsou kiht kin onop iren kasukuhl ehu nan pwuhken Nai Pwuken Poadoapoad en Paipel kan, se mweidong neit seri kan en doadoahngki likou kan me aramas kan nan Paipel kin likouki oh wia mwadong de sipai sang poadoapoad kan me re sukuhlkidisang. Re inenen kin perenki wia met, oh re kin kalap peki en onopki poadoapoad tohto sang poadoapoad ehu te ni ehu ahnsoun onop. En dehr mwamwaleki dahme noumw seri kan pahn kak sukuhliki! Seri kan me sounpahr pahieute, me wadlikihla irelaud kan koaros nan pwuhken Poadoapoad en Paipel oh re kin pil sukuhliki en wadek Paipel! Emen pwulopwul tamanda, me ni ahnsou me e mahki sounpahr silu elep, e sohte kak nda ni pwung lepin lokaia wet, “judicial decisions,” ahpw eh pahpa kin kangoange ih en praktis.
15. Ire dah kei pahpa oh nohno kan pahn kak koasoi ahnsohn ahr onop rehn neirail seri kan, oh mehn kadehde dah mie ong katepen wia koasoi pwukat?
15 Kak doadoahngki ahnsou en onop rehn noumw seri kan en sewese irail padakiong mehteikan duwen padahk mehlel sang ni ahr pahn iang pasepeng nan mihding kan. (Ipru 10:24, 25) “Ahnsohn aht praktis kan, I anahne pasepeng sang ni pein ai lokaia kan,” emen pwulopwul tamanda. “I sohte ale mweimwei en wadek te ahpw sohte wehwehki dahme I wadekehr.” Patehng met, seri kan kak ale kaiahn en iang doadoahk en kalohk. Lih emen me tikada nan peneinei ehu me eh pahpa oh nohno kin lemwin Koht kin kawehwehda: “Se sohte kin ihte iang aht pahpa oh nohno kan nan doadoahk en kalohk. Se wehwehki me se anahne wia aht pwais, edetehn ihte padik pell en wenihmwo oh kihdi ehu trak. Sang ni aht kaunopada mwahu mwohn imwin wihk en kalohk pahn tepida, se esehier dahme se pahn nda. Se sohte kin pirada nimenseng en Rahn Kaunop oh idek rehn pahpa oh nohno ma se pahn iang kalohk de soh. Se esehier me se pahn iang kalohk.”
16. Dahme kahrehda en kaukaule wia onop en peneinei kesempwal rehn seri kan?
16 Anahn ehu en kaukaule kalamwurehki neitail seri tikitik kan pihl en padahk mehlel en Paipel me kesempwal, oh met kin wehwehki kesempwal en wia onop Paipel en peneinei ni ehu ehu wihk. Emen pahpa koasoia, “ehu ahl en kamwakara seri kan, iei sohte daur omw koasondi en onop Paipel kaukaule.” (Episos 6:4) E koasoia: “Ai pwoud oh ngehi kin pilada rahn ehu oh ahnsou ehu en loalopwoatong daur koasondio. E sohte pwand mwohn seri kan esehier iahd ahnsohn onop Paipel.” Kaiahn pwukat sang ni ahnsou me seri kan pwelel me kesempwal oh pahn pahrekiong lepin koasoi mehlel ehu, ‘Ni mwomwo me kisin tuhkeo kaianda, eri ihduwen tuhke pahn kekeirada.’
17. Dahme kesempwal oh kin pahrekiong padahkiong seri kan duwen padahk mehlel kan en Paipel?
17 Kihkihong seri tikitik kan Padahk mehlel en Paipel kan me kesempwal, ahpw kahlemeng en pahpa oh nohno kan pil kesempwal. Noumw seri kan kin kilang ahmw wia ononop, kaukaule iang mihding kan koaros, iang kalohk sang ihmw lel ihmw, ei, pereperen wiawia kupwuren Siohwa? (Melkahka 40:8) E kesempwal irail en kilang. Ihme, emen serepein koasoi duwen eh nohno, me kin dadaur pahn kalokolok kan sang eh pwoud oh pil kaiane seri wenemen me wiahla Sounkadehde lelepek kan: “Dahme keieu sewese kiht koaros, kahlemeng mwahu en aht Nohno—e wiewia kan mie lipwe laudsang lokaia kan.”
Ketkihda Perepe ong Seri Tikitik kan
18. (a) Iaduwen pahpa oh nohno kan kak kihda perepe me neirail seri kan anahne? (b) Soahngen kaweid dah kan me seri tikitik kan nan wehin Israel sukuhliki duwen dipwisohn kaparapar en aramas?
18 Nin duwen tuhke tikitik kan anahne perepe sang mahn tikitik kan (pests) nan koasondi suwed wet, seri tikitik kan pil anahne perepe sang “aramas suwed akan.” (2 Timoty 3:1-5, 13) Iaduwen pahpa oh nohno kan kak kihda soahngen perepe ong neirail kan? Sang ni ahr pahn sewese irail en esehla erpit sang powe! (Eklesiasdes 7:12) Siohwa padahkiong mehn Israel akan—iangahki neirail “tikitik kan”—en rong duwen wadawad en sapwellime Kosonned, me pid duwen esehla wiewia konehng kan oh soh-konehng kan me pid duwen nsen pwopwoud. (Deuderonomi 31:12; Lipai 18:6-24) Kosoai duwen dipwisohn kaparapar kan kin kalap pwarada nan kosonnedo, iangahki “ohn mouren ohl” oh “wusole.” (Lipai 15:1-3, 16; 21:20; 22:24; Nempe 25:8; Deuderonomi 23:10) Pwehki mwersuwed nan sampah nan ahnsowet me inenen rekla, neitail seri tikitik kan anahne esehla duwen pali war arail ong dahme me konehng oh dahme me sohte konehng en doadoahngki, iei met me kapikapikdahn Koht me e mahsanih “inenen kupwurperenki.”—Senesis 1:31; 1 Korint 12:21-24.
19. Ia kaweid konehng kan en padahkiong seri kan duwen ahr wasahn kaparaparala akan?
19 Keieu mwahu ma pahpa oh nohno, de emen de irail kan me kin pwukoahki seri-o, en padahkiong neirail seri duwen wasahn kaparapar kan. Irail anahne kawehwehda, me aramas akan sohte konehng en doake wasa pwukat. Pwehki irail aramas akan me kin wia dihp rehn seri kan kin kalapw song seri kan oh tehk ia mwomwen arail pahn mwekidki aramas me kin doake irail ni wasa me sohte konehng, seri kan anahne sukuhliki en ni lokaia inen ndahiong meno me doake ih, “I pahn ndadah!” Padahkiong noumw seri kan me irail anahne ahnsou koaros ndaiong kumwail sohte lipilipil ihs me song en doake irail ni ahl me pahn kahrehong irail en nsensuwedkihla, edetehn aramaso pahn kamasepwehki irail.
Kihda Kaiahn ni Limpoak
20. (a) Iaduwen kaiahn me rasehng rah kei me lopasang tuhke ehu? (b) Ia tepin lipwen kaiahn, ahpw e pahn imwikihla dah?
20 Seri tikitik kan kin paiekihda kaiahn ni limpoak, duwehte tuhke ehu kin paiekihda ekei rar kan kin lopasang. (Lepin Padahk 1:8, 9; 4:13; 13:1) Ni ahnsou me rah sakanakan de sohte katepe kan kin lopasang, met kin sewese rah mwahu kan en kekeirada mwahu. Eri duwehte ma noumw seri kan kin mwohniki dipwisohn sampah de mwohni kan de kin perenki werek suwed de rong de kilang mehn kamweit soh-konehng kan, ineng suwed pwukat kin rasehng rah sakanakan kan me anahne lopasang. Ma re kohsangehr, noumw seri kan pahn kak kekeirada ni pali ngehn. Ni tepio, kaiahn wet sohte pahn kaperen, duwehte ekei rah kan me lopsang tuhke ehu pahn suwediong tuhkeo. Ahpw kaiahn wet pahn imwila mwahu, irail pahn kehlailda ni ahl me kumwail mwahuki noumw seri kan en kekeirada.—Ipru 12:5-11.
21, 22. (a) Dahme kasalehda me e sohte kaperen en kihda oh ale kaiahn? (b) Dahme kahrehda pahpa oh nohno kan en dehr koledi kaiahn neirail seri kan?
21 Koaros pahn mwadangete pwungki, me kaian sohte pahn kaperen en kihda de ale. “Nei pwutak kin kalap werekih emen pwulopwul me elder kan nan mwomwohdiso padahkiongie me e sohte wia werek mwahu,” emen pahpa koasoia. “Paisuwed pwe I sohte mwadang kapwungala ireo. Edetehn nei pwutak sohte wia dihp laud, ahpw e anahne ahnsou werei en kapwungala eh madamadau sapwung kan.” Pwutak-o koasoi: “Ni ahnsou me I sohlahr werekiong koampoakepai me keieu keren, I inenen nsensuwed laud.” Ahpw e kapataihong: “Met pilipil mwahu ieu, pwehki mwuhr koampoakepai piskensang mwomwohdiso.”
22 “Padahk kan en kaiahn kin kaweidkin uhk duwen omw pahn mour,” Sapwellimen Koht Mahsen mahsanih. Eri, edetehn e inenen apwal en kihda kaiahn me anahn, menlau dehr kolehdi kaiahn sang noumwail seri kan. (Lepin Padahk 6:23; 23:13; 29:17) Ahnsou ehu pahn kohdo, re pahn kalahnganki uhk, me ke kapwungala irail. Emen pwulopwul tamanda, “I tamanda ngehi me inenen lingeringerki ai pahpa oh nohno ahnsou ara kaiane ie. Ahpw ahnsowet, ai lingeringer pahn laudsang mahs, ma ira sohte kaiahne ie.”
Kating Inenen Katapan en Nantiong
23. Dahme kahrehda kasalehda limpoak oh kihong ahnsou laud ong neitail seri kan inenen wia katapan laud ehu?
23 Sohte peikidpe, seri kan me pahpa oh nohno kan, oh pil mehteikan kin perenkihda, iei irail seri kan me kin ale sawas laud sang ahr pahpa oh nohno kan rahn koaros. Sawas kan oh ahnsou kan me kin kohwong irail—mendahki irail seri kan en pali uduk de pali ngehn—kating me inenen katapan en paiekihda. Wahnpoaron mah Sohn kasansalehda met ni ahnsou e ntingihdi met: “Sohte me I perenki sang ei rong me nei seri kan kin momourki mour mehlel.”—3 Sohn 4.
[Nting tikitik me mi pah]
a Wiawihda sang rehn Watchtower Bible and Tract Society of New York, Inc.
Komw Tamanda?
◻ Dahme tuhke pwul kan oh seri kan anahne pwen kak wiahla seri konehng en kapinga?
◻ Iaduwen, pahpa oh nohno kan pahn kak rasehng tuhkehn irere kan?
◻ Dahme kitail kak wia ni ahnsou kitail kin kaweidkin neitail seri tikitik kan, oh dahme re anahne sukuhliki en soikala?
◻ Iaduwen kaiahn kak kapaiahda emen seri, duwehte lopukasang ekei rahn tuhke kin mwahu ong ih?
[Credit Line]
Courtesy of Green Chimney’s Farm