“Awa Depe I Pahn Ripohtki?”

Mie pak ke idek peidek wet? Kaweid kan duwen met kohda nan pali 3 oh 4 nan Atail Doadoahk ong Wehio en December 2006. Ekei kaweid pil kin kohda, duwehte nan Koakon en Peidek en Atail Doadoahk ong Wehio en September 2008. Pwehki irair kan kin wekpeseng, kitail sohte alehdi koasoandi oaritik kan duwen met. Kahrehda, e sohte konehng elder kan de meteikan ren wiahda koasoandi tohrohr teikan.

Ma peidek ehu pahn pwarada oh sohte kaweid me kohda nan neitail pwuhk kan duwen met, emenemen sounkalohk kak pein medewe: I doadoahngki ahnsowo ong kalohk? De I doadoahngki ong mehkot tohrohr me sohte pidada kalohk? Dahme kitail kin ntingihdi nan neitail ripoht en kalohk ehuehu sounpwong anahne kihong kitail peren a kaidehn en kapwunode kadeikpen loalatail. (Wiewia 23:1) Dahme kitail kin keieu nsenohki iei kaidehn ia duwen atail pahn wadek awahn kalohk, ahpw atail en doadoahngki atail ahnsou ni pwung sang ni atail kin pwerisekiong doadoahk en kalohk.—Ipru 6:11.