Irair me Keieu Kesempwal Rehn Sounpadahk Mwahu Men
1. Mehnia irair me keieu kesempwal rehn sounpadahk mwahu men?
1 Mehnia irair me keieu kesempwal me emen anahne pwehn wia sounpadahk en Paipel mwahu men? Sukuhl laud? Wereila nan doadoahk? Pein omw koahiek? Ni mehlel, iei irairohte me mi nan Kosonnedo me kin kasalehda ihs sapwellimen Sises tohnpadahk kan, oh me keieu laud oh kaselel nan sapwellimen Siohwa irair laud kan. (Sohn 13:35; Kal. 5:14; 1 Sohn 4:8) Met iei limpoak. Sounpadahk mwahu kan kin kasalehda limpoak.
2. Dahme kahrehda e kesempwal kitail en poakohng aramas akan?
2 Poakohng Aramas: Sounpadahk Lapalapo, Sises, ketin kasalehdahr limpoak ong aramas, oh met kamwakid irail en rong ih. (Luk 5:12, 13; Sohn 13:1; 15:13) Ma kitail kin nsenohki aramas, kitail pahn kin kalohk ahnsou koaros me konehng. Kahpwal kan me duwehte kalokolok oh aramas sohte kin men rong sohte pahn kauhkitaildi. Kitail pahn kasalehda atail nsenohki irail kan me kitail kin kalohk ong oh kitail kin wekidala wiepen atail koasoi pwehn pahrekiong arail kapwunod kan. Kitail pahn men kihong ahnsou ong atail kin onop rehn tohnsukuhl en Paipel kan oh pil ahnsou en kaunopada ong ehuehu onop pwukat.
3. Ia duwen atail poakohng padahk mehlel en Paipel kan pahn sewese kitail nan kalohk?
3 Poakohng Padahk Mehlel en Paipel kan: Sises pil ketin poakohng padahk mehlel en Paipel kan oh kin ketin wiahki pai kesempwal kei. (Mad. 13:52) Ma kitail poakohng padahk mehlel, kitail pahn kin perenki koasoia oh met kak kamwakid soun rongorong kan. Soangen limpoak wet pahn sewese kitail en medewehte kesempwalpen padahk me kitail kin wia, a kaidehn atail soh itar kan. Ma kitail wia met, kitail sohte pahn kin saloh nan kalohk.
4. Ia duwen atail kak kakairada limpoak?
4 Kakairada Limpoak: Ia duwen atail kak kakairada limpoak ong aramas? Sang ni atail pahn medemedewe duwen limpoak me Siohwa oh Sapwellimeo kasalehda oh pil irair apwal me aramas ahneki pwehki irail sehse padahk mehlel. (Mark 6:34; 1 Sohn 4:10, 11) Atail poakohng padahk mehlel en Paipel kan pahn laudla ma kitail kin kaukaule onop oh doudouloale. Limpoak iei ehu irair en wahn sapwellimen Koht manaman. (Kal. 5:22) Eri, kitail kak peki ni ngidingid sapwellimen Siohwa manaman oh peki en ketin sewese atail limpoak en laudla. (Luk 11:13; 1 Sohn 5:14) Mehnda ma kitail sukuhl laud, wereila nan padahk mehlel, de mie pein atail koahiek, kitail kak wia sounpadahk en Paipel me kin pweida mwahu ma kitail kin kasalehda limpoak.