Kitail Kin Wia Sounkalohk kan Ahnsou Koaros
1. Ia duwen atail ese me sounkalohk kan ni mwehin wahnpoaron ko sohte kin uhdi doadoahk?
1 Sounkalohk kan ni mwehin wahnpoaron ko kin ni ngoang “wonoweite” oh kalohki rongamwahwo wasa sohte lipilipil me re diar aramas. (Wiewia 5:42) Eri, kitail sohte kak medewe me ni arail kin kalohk ihmw lel ihmw, re kin daulih aramas akan nanial oh sohte padahk ong irail. Re kin isaneki ahnsou mwahu en koasoiong aramas ni wasahn netinet kan mwurin arail nek kalohk. Duwehte Sises, re sohte kin uhdi doadoahk.—Mark 6:31-34.
2. Dahme kin pidada atail adaneki Sounkadehdehn Siohwa kan?
2 Kaunopada Ahnsou Koaros: Ahd wet, Sounkadehdehn Siohwa kan, me kitail kin doadoahngki, sohte kin pidadahte dahme kitail kin wia ahpw e pil pidada ihs kitail. (Ais. 43:10-12) Eri kitail kin kaunopada ahnsou koaros en kadehdehda dahme kitail kamehlele mehnda ma kitail sohte kalohk ihmw lel ihmw. (1 Pit. 3:15) Ke kin kasik soangen irair kan me ke kak kalohk ong aramas ahnsou sohte lipilipil oh medewehda dahme ke pahn nda? Mie sawaspen Paipel kan rehmw me ke kak ehukihong irail kan me perenki rong? (Lep. Pad. 21:5) Ke kin ihte kalohk ihmw lel ihmw de ma irairo konehng, ke kin iang lohkihpeseng rongamwahwo ni ahl teikan?
3. Mehnia lepin lokaia me keieu pwung en kawehwehda kalohkseli nanial kan, wasahn peidi kan, wasahn pesines, oh wasa teikan?
3 Kalohk ong “Wehi Pokon”: Wahnpoaron Pohl koasoia me e kin kalohkseli “wasahn kapokon kan” oh pil sang ihmw lel ihmw. (Wiewia 20:20) Eri, kalohk ong “wehi pokon” pahn kawehwehda ni pwung wasa me kitail kin kalohkseli, duwehte nanial akan, wasahn peidi kan, wasahn pesines oh pil wasa teikan. E mehlel me kalohk sang ihmw lel ihmw kin wia wiepen kalohk me kitail kin keieu kalapw doadoahngki oh keieu pweida mwahu en lelkihong aramas rongamwahu en Wehio. Ahpw sounkalohk kan ni mwehin wahnpoaron ako kin rapahki aramas akan, kaidehn ihmw kan. Re kin isaneki irair koaros en koasoia duwen padahk mehlel—ong wehi pokon, ni ahnsou sohte lipilipil, oh sang ihmw lel ihmw. Sen ahneki soangen lamalamohte pwehn kapwaiada ni unsek atail doadoahk en kalohk.—2 Tim. 4:5.