Pakerwei ni Elen Loalokong
1. Ia duwen 1 Korint 9:26 eh kak kadoadoahk nan kalohk?
1 Wahnpoaron Pohl ntingihdi: “Ihme I sohte kin tang, pweiengki; oh ihme I kin pei, rasehng sounpaker men me sohte kin pakepakere mwahl nan wehwe.” (1 Korint 9:26) Pohl kin koasoia me eh madamadau kin uhlahngete mehn akadei kan en kamwahwihala eh papah Siohwa. Ahpw mouren koasoi wet pil kak kadoadoahk ong atail kalohk. Kitail men “pakepakere” de nantihong ni elen loalokong nan kalohk pwehn kak pweida mwahu. Ia duwen?
2. Ia duwen atail kak alasang Pohl oh sounkalohk teikan ni atail kin pilada iahd oh ia wasa kitail pahn kalohk?
2 Kohla Wasa kan me Mie Aramas: Pohl oh sounkalohk teikan kin kalohk wasa kan me mie aramas. (Wiewia 5:42; 16:13; 17:17) Eri, ma me tohto kin mi nan imwarail nin soutik nan atail wasahn kalohk, ele e pahn wia ahnsou me keieu mwahu en kalohk ihmw lel ihmw. Ahnsou dah me wasahn netinet kan kin diren aramas nan atail wasahn kalohk? Ele kalohk nanial akan me pahn keieu pweida mwahu nan soangen ahnsou pwukat.
3. Ia duwen atail kak doadoahk ni elen loalokong nan atail wasahn kalohk?
3 Doadoahk nan Wasahn Kalohk ni Elen Loalokong: Kitail anahne kanahieng pwe kitail en doadoahk ni elen loalokong nan atail wasahn kalohk. Karasepe, ma pwihn laud ehu pahn kohla wasa tehieu, kitail anahne ahnsou laud pwehn koasoanehdi sounkalohk kan. Eri e pahn mwahu en koasoanehdi kisin pwihn kan. Pil duwehte, ni atail kin kalohk nan wehi kan, kitail kak kanekehla mwadang atail wasahn kalohko oh pil pahn mie ahnsou ong sounkalohk koaros ren koasoiong tohnihmw kan ma pwihn en kalohk malaulau. Kitail kak pekihda wasahn kalohk me karanih imwatail kan pwehn katikala ahnsoun lel wasahn kalohk?
4. Dahme pahn sewese kitail en wia sounlaid koahiek kei?
4 Sises ketin karasahiong sounkalohk kan duwehte soun “laidih aramas akan.” (Mark 1:17) Sounlaid men sohte kin pwilikihdihte neirail uhk nan sehd ahpw re anahne koledi mwahmw. Ihme kahrehda sounlaid koahiek kan kin kohla wasa oh ahnsou me re ese me mie mwahmw, oh mwadangete tepida laid. Ei, re kin doadoahk ni elen loalokong. Kitail en pil kasalehda soangen pwerisek wet nan atail doadoahk en kalohk.—Ipru 6:11.