Duwen Atail Pahn Doadoahngki Ihs me Kin Wia Kupwuren Siohwa Rahn Pwukat?
Pwuhk Kapw me Wiawihda Pwehn Kaweid Tohnsukuhl en Paipel kan ong Atail Pwihn
1. Ia kahrepe siluh me pwuhken Kupwuren Siohwa wiawihda?
1 Ke tepidahr doadoahngki pwuhk kapw en Ihs Me Kin Wia Kupwuren Siohwa Rahn Pwukat? Kahrepen pwuhk wet iei (1) pwehn sewese tohnsukuhl en Paipel kan ren esehla Sounkadehdehn Siohwa kan, (2) sewese irail en sukuhlki duwen dahme kitail kin wia, oh (3) kasalehiong irail doadoahk kan me atail pwihn kin wia. Pwuhken Kupwuren Siohwa audaudki mehn kasukuhl kan nan ehuehu pali oh e mengei en kanekehla ehuehu onop ereinte minit limau de eisek.
2. Kawehwehda mwomwen pwuhk wet oh dahme mi loale.
2 Mwomwen Eh Wiawihda: Mie pali siluh en pwuhk wet. Ehuehu pali kin koasoia soangsoangen doadoahk kan en sapwellimen Siohwa pwihn, me sansal powe. Oaralap en ehuehu mehn kasukuhl 28 ko kin ntingdi nin duwen peidek ehu, oh sawasepen oaralap ko me mi ni mesen nting mosul kin sapengala peidek kan. Mie kilel en sahpw tohtohsang 50 me kasalehda doadoahk me atail pwihn kin wiewia nan sampah pwon. Ekei iren mehn kasukuhl ko mie koakon en “Kalaudehla Omw Ese Duwen Met,” me kasalehda kaweid kan me ke kak kangoangehki tohnsukuhlo en idawehn.
3. Ia duwen atail kak doadoahngki pwuhken Kupwuren Siohwa?
3 Duwen Omw Kak Doadoahngki: Ke kak tepida ni omw kasalehiong tohnihmwo peidek me wia oaralap en mehn kasukuhlo. Eri, ni amwa wadekpene iren mehn kasukuhlo, kasalehda sawasepen oaralap ko. Mwurin mwo, song kousapahlih peidek kan me mi pah. Kumwa kak wadekala iren mehn kasukuhlo pwon de wadek oh koasoiapene ehuehu ire kan. Pilada mwahu mehnia iren Paipel kan me pahn wadawad. Dehr manokehla en koasoiapene kilel kan oh koakon en “Kalaudehla Omw Esehla Duwen Met.” Pali laud en ahnsou, onop en iren mehn kasukuhl kan kin anahne tepisang ni oaralap keieu kohla. Ahpw, ke kak doulahng iren mehn kasukuhl ehu me pid mehkot tohnsukuhlo men ese. Karasepe, ma mihting tohrohr ehu pahn wiawi, ke kak doula nan iren mehn kasukuhl 11.
4. Dahme kahrehda kitail perenki pwuhk kapw wet?
4 Ni atail kin onop Paipel rehn emen, kitail kin sewese ih pwehn esehla Samatail nanleng. Ahpw kitail pil anahne kasukuhlih pwehn esehla sapwellimen Siohwa pwihn. (Lep. Pad. 6:20) Ia uwen atail perenki pwuhk kapw wet me kamangaiala atail pahn wia met!