Kasamwo Irail!

1. Ahnsou mwahu dahieu en wia kadehde, oh dahme kahrehda?

¹ Rahn en Katamano pahn wia ehu ahnsou me inenen mwahu en kadehdehda padahk mehlel. Song medewehla: Nan pahret, kitail kasikasik en kilang aramas tohtohsang dep en iang towehda Katamano oh rong duwen wiewiahn limpoak riau me meirong en Sises kasalehda. (Sohn 3:16; 15:13) Re pahn sukuhlki duwen kapai kan me re kak ahneki pwehki sapwellimen Siohwa kisakis. (Ais. 65:21-23) Ahpw kaidehn me pahn wia padahkohte me pahn wia kadehde ahnsowo. Koaros me pahn towehda ahneki ahnsou mwahu en wia kadehde sang arail pahn nsenohki kasamwo irail me pahn kohdo iang.—Rom 15:7.

2. Ia duwen atail kak kadek kasamwo irail me pahn kohdo?

² Ke sou tuhwong irail me pahn mwohndi limwahmw, a kaidehn rapahkihdahte dewomw, mwohndi sohte mweseisei oh awiawih padahko en tepida? Irail me kohdo kan ele pahn saloh oh peikasalki dahme pahn wiawi. Omw pahn poh komwokomw oh kadek kasamwo irail pahn kahrehiong ren dehr soansuwed. Pwehn diarada ma emen kohdo iang pwehki e ale luhk, ke kak idek ma iei tepin eh pahn iang ehu atail mihting de ma e ese emen nan mwomwohdiso. Mwein ke kak luke en mwohd rehmw oh iang doadoahngki noumw Paipel oh pwuhken koul. Ma Katamano pahn wiawi nan Wasahn Kaudok en Sounkadehdehn Siohwa kan, ele ke kak kahre oh kasalehiong ih wasao. Mwurin padahko, ke kak sawas sapengala eh peidek kan. Ma omw mwomwohdiso anahne kohkohla mwadang pwe ehu mwomwohdiso pahn uhd doadoahngki wasahn kaudoko, ele ke kak nda: “I men ese ia omw madamadau duwen padahko. Ia duwen ata kak pwurehng tuhpene?” Eri wiahda koasoandi en pwurehng tuhpene. Elder kan pahn anahne tehk oh kangoange irail sounkalohk kan me wereila sohte iang mihting oh kalohk.

3. Dahme kahrehda e kesempwal kitail en nsenohki kasamwo irail me iang towehda Katamano?

³ Ong me tohto me pahn kohdo, ih tepin arail pahn kilang irair en peren, popohl, oh miniminpene me sapwellimen Siohwa aramas akan kin ahneki. (Mel. 29:11; Ais. 11:6-9; 65:13, 14) Dahme irail me kohdo kan pahn tamataman? E pahn pidada laud atail nsenohki kasamwo irail.