Kasalehda Atail Kalahnganki Sapwellimen Siohwa Limpoak
Kadek Katamanpen Kamatalahn Krais Pahn Wiawi March 24
1. Iaduwen Siohwa kasalehiong kitail limpoak-kadek?
1 Sounmelkahka mahsanih: “Aramas uhdahn pahn kapinga Siohwa pwehki sapwellimen limpoak-kadek, oh manaman kapwuriamwei kan me e ketin wiahiongirailehr.” (Melkahka 107:8, New World Translation) Sapwellimen Koht limpoak-kadek kin wehwehki laud sang sapwellime pepehm en kadek ong aramas. Met kin sansal sang mahsen en kaping wet me ngehn sarawi kamwekid sounmelkahkao en ntingihdi: “Sapwellimomwi limpoak-kadek, Maing Siohwa, kin kakehle ie.” (Mel. 94:18, NW) E sansal me Siohwa kasalehda limpoak-kadek laud ni e kadarodo sapwellime Iehros pwehn matkinkitailla!—1 Sohn 4:9, 10.
2. Ia ehu ahl me kitail kak kasalehda atail kalahngan ong Siohwa?
2 Pwehki Katamanpen Kamatalahn Krais pahn wiawi ni ahnsou keren, dahme kitail kak wia pwehn kasalehda atail kalahnganki “Koht en limpoak-kadek”? (Mel. 59:17) Emen emen kitail kak koasoanehdi atail ahnsou pwehn doudouloale dahme wiawi rahn kei mwohn Sises pwoula nin sampah. (Mel. 143:5) E pil pahn mwahu ma kitail pahn idawehn koasoandi en wadawad en Paipel me Society koasoanehdi mwohn Kataman oh pil rahn en Katamano, nin duwen me sansalda nan Examining the Scriptures Daily—2005 (Iren Rahn), oh ma kak, wadek pwuhken Greatest Man, irelaud 112-116 oh pil research nan sawaspen Paipel teikan. Medemedewe loal duwen ire kan me ke wadek, oh doudouloale. (1 Tim. 4:15) Onop Mahsen en Koht iangahki kapakap kin kakehle iuk oh met pil kin kasalehda atail limpoak ong Siohwa.—Madiu 22:37.
3, 4. (a) Iaduwen kitail kak alasang ngenin riatail kan nan Liberia? (b) Ihs me ke pilahn en luhke ong Kataman?
3 Kamwekid Meteikan en Kasalehda Arail Kalahngan ong Koht: Nan pahr me ahpwtehn nek, aramas 16,760,607 iang towehda Kataman me wiawi nan sampah pwon. Nan kisin kahnimw nan Liberia, brother kan en wasao ntingihdi kisinlikou ong kaunen kahnimwo oh idek reh ma irail kak kasarawi Saken Soutik en Kauno nan kahnimwo. Kaunen kahnimwo mweidohng Sounkadehde kan en doadoahngki wasahn mwadong football (football field) ong Katamanpen Kamatalahn Krais oh e pil pakairkihong tohnkahnimw koaros duwen katamano oh luhke aramas koaros en iang towehda. Mendahki Sounkadehde limmente kin kousoan wasao, irail me iang towehda Katamano iei meh 636!
4 Kitail men wia duwehte irail oh sewese aramas tohto en iang towehda Katamano. Ke soh ntingihdi eden aramas akan me ke men luhke? Pali 32 en Watchtower en March 15 oh Awake! en March 8 kin luhke koaros en iang towehda Katamano. Kitail pil kak doadoahngki doaropwe en luhk kan. Type de ntingihdi mwahu oh sansal kuloak depe oh iawasa Katamano pahn wiawi ni doaropwe en luhk kan, oh kihong aramas koaros me ke pahn luhke. Ni March 24 ah kerendohr, pil ehu tuhwong aramas ko de call irail pwehn katamankin irail duwen Katamano oh tehk ma re anahne mehn peidaid.
5. Iaduwen kitail kak kangoange atail Paipel Study kan en iang Kataman?
5 Iaduwen kitail kak sewese atail Paipel Study kan me saikinte iang towehda mihding kan en iang Katamano oh paiekihda prokram en Katamano? Nan ehuehu amwa onop, koasoanehdi minit kei pwehn koasoia duwen Katamano pwehn kak sewese irail en wehwehki duwen kesempwalpen Katamano. Ke kak doadoahngki ire kesempwal kan sang Watchtower [lokaiahn wai] en March 15, 2004, pali 3-7, oh pwuhken Reasoning, pali 266-269.
6. Dahme kahrehda e kesempwal en kasamwo aramas ni Katamano?
6 Kasamwo Irail me Luhkehdo kan: Ni Katamano, kasamwo aramas akan oh koasoiong irail. (Rom 12:13) Koasoanehdi pwe ken mwohndi rehrail oh tehk ma mie neirail Paipel oh pwuhken koul. Kitail en pil kasamwo irail brother oh sister kan me solahr iang kalohk (inactive) me iang towehda Katamano. Atail limpoak oh nsenohki irail kak sewese irail en men pwurehng iang towehda mihding kan en mwomwohdiso. (Luk 15:3-7) Kitail en wia uwen atail kak en kangoange meteikan en iang towehda rahno me keieu sarawi oh iang kitail kasalehda atail kalahnganki Siohwa pwehki sapwellime “limpoak-kadek.”—Melkahka 31:21.