“Kumwail Poakohng Siohwa, Kumwail Koaros Sapwellime Aramas Loalopwoat akan!”
Katamanpen Kamatalahn Sises Pahn Wiawi April 4
1 Sounpahr kei samwalahro, ni ahnsou me wehin Ukraine mihmi pahn kaundahn Communist, irail kaunen wehi kan kin kasawih Sounkadehde kan—mehlel ni ahnsou me rahn en Saken Soutik en Kauno kerendo—pwe irail kaunen wehi kan men ese duwen wasa kan me Sounkadehde kan kin tuhpene ong mihding kan. Met kin wia kahpwal ong Sounkadehde kan, pwehki irail kaunen wehi kan kin wehwehki mpen ahnsou dah me Kataman kin wiawi. Eri, dahme Sounkadehde kan kin wia? Ni imwen sister men lapake kin loalada nan pere ieu me mih pahn imweo. Pwehki kaunen wehi kan sohte leme me aramas pahn kak pokonpene wasao, eri, brother kan wiahda taht ieu ilehda sang pihl me mih ni pwukierail ko. Mehnda ma re anahne kohntutuk pohn tahto pahn denso karakarahk, sohte aramas emen kedirepwe irail ni ahnsou me mwomwohdiso pereperen wia arail Kataman.
2 Koasoandi kehlail kan me Sounkadehde kan nan Ukraine wiahda pwehn kak kapwaiada oh peikiong kosonned en kasarawi rahn me Sises pwoula kin kasalehda uwen laud arail limpoak ong Koht. (Luk 22:19; 1 Sohn 5:3) Ni ahnsou me kitail kin lelohng kahpwal, kitail en medemedewe duwen mehn kahlemeng mwahu pwukat oh wia uwen atail kak koaros en iang towehda Saken Soutik en Kauno ni April 4. Ni atail pahn wia met, kitail kin kasalehda me kitail ahneki pepehm me sounmelkahka ahneki ni e koulki: “Kumwail poakohng Siohwa, kumwail koaros sapwellime aramas loalopwoat akan!”—Melkahka 31:23.
3 Sewese Meteikan en Kekeirada Arail Limpoak ong Koht: Limpoak ong Koht pahn pil kamwekid kitail en luhke meteikan en iang kitail oh iang towehda Katamanpen Kamatalahn Krais. Insert en Atail Doadoahk Ong Wehio en February kangoange emenemen kitail en ntingihdi eden irail koaros me kitail men luhke ong Kataman. Ke kin nantihong luhke aramas koaros me ke ntingihdi? Ni ahnsou me ke tuhwong irail, kawehwe ong irail duwen kesempwalpen rahno. Ma mwuhr ke pahn katamankin irail duwen rahno oh kuloak depe Kataman pahn wiawi oh pil ma irail anahne sawas en mehn peidaid de irail anahne ken iang irail kohla ni wasahn Katamano: mehpwukat pahn kangoange irail en uhdahn iang towehda rahno.
4 Ni rahn en Katamano, e pahn mwahu ma kitail pahn kasamwo aramas koaros me iang towehda Katamano, iangahki irail me kitail luhke, oh sewese irail en nsenamwahuki arail iang towehda Katamano. Iaduwen ke kak sewese irail en kekeirada arail limpoak ong Siohwa? Kasalehda me ke men sapeng arail peidek kan. Kaunopada pwehn kak koasoanehdi pwehn tepida onop Paipel rehrail ma e konehng arail irair kan. Luhke irail en iang towehda mihding kan koaros en mwomwohdiso. Elder kan anahne tehk oh nsenohki duwen irail Kristian kan me solahr iang kalohk ahpw me iang Katamano. Elder kan kak koasoanehdi pwehn tuhwong irail oh kangoange irail en pwurehng iang tohnmwomwohdiso kalohk, oh elder kan kak kangoange irail ni arail kin doadoahngki ire kan me kohda nan Kapahrek me wiawi ni Katamano.—Rom 5:6-8.
5 Kalaudehla Pein Atail Limpoak ong Siohwa: Ma kitail pahn doudouloale duwen kisakis en tomw, met pahn kalaudehla atail limpoak ong Siohwa oh sapwellime Ohl. (2 Kor. 5:14, 15) Emen Sounkadehde me kin iang towehda Kataman erein sounpahr tohto koasoia: “Se kin kasikasik Kataman en wiawi. Se kin pehm me kesempwalpen Katamano kin wia kekeirada pahr koaros. I tamataman pahr 20 samwalahro me I kilang paliwar en ahi pahpa mwurin e mehla oh ih ahnsou me I kesempwaliki oh kalahnganki tomwo. Mwohn rahn me ahi pahpa mehla, ihte ahi wehwehki duwen tomw iei dahme mih nan moangei—e saikinte kamwekid nan mohngiongi. Mehlel, I ese iren Paipel koaros me pid tomwo oh I kak kawehwe ong aramas teikan! Ahpw, ihte mwurin ahi pehmada duwen kasuwedpen mehla, mohngiongi dirkihla peren pwe I wehwehki duwen dahme koasoandi en tomw wia ong kitail koaros.”—Sohn 5:28, 29.
6 Ni en rahn en Kataman en pahr wet kerendohr, koasoanehdi ahmw ahnsou pwehn kaunopada mohngiongomw ong dahme pahn wiawi rahno. (2 Kronikel 19:3) Doudouloale duwen wadawad en Paipel me kin wiawi mwohn Katamano, me ntingdi ni Examining the Scriptures Daily—2004 (Iren Rahn en 2004) oh pil ntingdi ni 2004 Calendar. Ekei kin perenki kousapahlih pwuhken Greatest Man irelaud 112-116 ni ahnsou me irail kin wia arail onop en peneinei. Ekei kin wia research ni arail kin onopki pil ekei pwuhk kan me pwihn en “ladu lelepek oh loalokong” wiahda. (Madiu 24:45-47) Kitail koaros kak kalahnganki tomwo nan atail kapakap akan me kohsang mohngiong. (Mel. 50:14, 23) Ei, nan sounpwong kan mwohn oh mwurin Kataman, kitail en kaukaule doudouloale duwen sapwellimen Siohwa limpoak ong kitail oh rapahki ahl akan en kasalehda atail limpoak ong Ih.—Mark 12:30; 1 Sohn 4:10.