Kadehde Kehlail Pahn Wiawi
1. Likin padahko, dahme pil kak kamwakid irail kan me iang towehda Katamano? Menlau kawehwe.
1 Iahd? Ni pwohng en Katamano. Kahrehda doadoahk laud kin wiawi pwehn lukehdo aramas en iang kitail towehda. Kaidehn ihte dahme irail me lukodo kan pahn rong me pahn kamwakid irail. Mwurin lih emen eh iang towehda Katamano, e koasoiahda dahme e kilang. E kilang me koaros kin kadekpene, wasao mwakelekel oh irail kan me kin pein toukihda arail ahnsou ni soh pweipwei me kin apwalih wasao. Ihme kahrehda, kaidehn me pahn wia padahkohte ahpw koaros anahne ehupene pwehn wia mehn kadehde ni pwohng me keieu kesempwal nan ehuehu pahr.—Ep. 4:16.
2. Ia duwen emenemen kitail kak wia mehn kadehde ong irail kan me iang towehda Katamano?
2 Kasamwo Irail ni Kadek: Atail kin sirei ni kadek iangahki atail rahnmwahwih irail ni peren pahn wia mehn kadehde. (Sohn 13:35) Mehnda ma ke sohte kak koasoiong koaros, ahpw ke kak rahnmwahwih oh kawehwehda ihs kowe ong me karanih iuko. (Ipru 13:1, 2) Tehk irail kan me sohte emen me re ese. Sansal me re alehdi doaropwehn luhk ni ahnsoun kihpesengo. Mwein ke kak idek, “Edin omw kohdo wasaht?” Luke irail en mwohndi limwahmw oh kasalehiong irail me ma mie arail peidek, ke pahn perenki sapengala. Mwurin Katamano, ke kak idek: “I men ese ia omw madamadau ong Kataman wet. Ia duwen ei kak tuhwong uhk?”
3. Ia duwen atail pahn kasamwo irail kan me wereilahr sohla iang mihting oh kalohk?
3 Kasamwo Irail kan me Wereilahr Sohla Iang Mihting oh Kalohk: Sansal me sounkalohk me wereilahr solahr iang mihting oh kalohk pahn iang towehda Katamano, iangahki ekei me sohla kin patehng mwomwohdiso ahpw kin iangete towehda mihting en Kataman nan ehuehu pahr. Kasamwo irail oh kasalehiong irail me ke uhdahn perenki omw kilang irail. (Rom 15:7) Elder kan kak mwadang kohla rehrail mwurin Katamano oh kangoange irail en pousehla arail kin patehng mwomwohdiso. Kitail kin kapakapki me tohto me iang towehda Katamano pahn mwekidki en kapinga Koht pwehki kaidehn ihte dahme re rong ahpw pil pwehki dahme re pahn kilang sang ‘atail wiewia mwahu kan.’—1 Pit. 2:12.