Iaduwen Kitail Kak Sewese Irail kan me Pahn Iang Towehda Kataman?
1. Mehn kadehde laud dah me pahn wiawi nan March 22, 2008?
1 Nan March 22, 2008, aramas rar kei nan sampah pahn ale mehn kadehde laud ehu. Irail kan me pahn iang towehda Katamano pahn rong duwen sapwellimen Siohwa limpoak laud me e ketin kasalehda ni e ketikihda tomw ehu ong aramas. (Sohn 3:16) Irail pahn sukuhliki duwen Wehio oh iaduwen Siohwa pahn ketin doadoahngki wehi wet pwehn kapwaiada kupwure ong sampah pwon. (Mad. 6:9, 10) Irail pahn pein kadehde duwen limpoak oh miniminpenehn nanpwungen sapwellimen Koht aramas akan oh pahn pehm duwen kadek me kin sansalda.—Mel. 133:1.
2. Iaduwen kitail kak sewese irail tohnsukuhl kan en Paipel me iang towehda Kataman?
2 Tohnsukuhl en Paipel kan: Ekei me pahn iang pwarodo iei irail kan me ahpwtehn tepida onop Paipel rehtail. Kapehse irail ong brother oh sister kan. Padahkihong irail duwen atail koasoandi en mihding me kitail kin wia ehuehu wihk, oh kasalehiong irail nan atail Kingdom Hall. Ni ahnsou me padahk pahn wiawi, me padahko pahn kangoange irail pwukat en pousehla kakairada ar nanpwungmwahu rehn Siohwa. Ke kak doadoahngki ire kan me e kasalehda pwehn wia mehn kangoang ong irail kan me ke kin onop rehrail.
3. Dahme kak wiawi pwehn kangoange irail me solahr kin iang kalohk me iang towehda Kataman?
3 Irail me Solahr Kin Iang Kalohk: Ekei me pahn iang towehda kin wia sounkalohk kei me solahr kin iang kalohk. Kasalehda kadek oh kohla rahnmwahuwih irail. Dehr idek peidek kan me pid arail mour me kakete kasaroweiraildi. Ahnsoukis mwurin Kataman, elder kan anahne pwarala oh tuhwong irail pwukat me iang towehda, oh kapinga irail pwehki ar pil nantihong iang towehda, oh ni kadek, luke irail en iang towehda mihding kan.
4. Iaduwen emenemen kitail kak sewese irail kan me pwarodo?
4 Irail kan me Pwarodo: Ekei me pahn pwarodo iei iengomw de kisehn ahmw peneinei me kitail pein lukehdo. Meteikan ele alehdi neirail doaropwehn luhk sang rehn irail kan me iang kihseli doaropwehn luhk ni ahnsoun kalohk tohrohr kan. Ma ke kilang irail kan me ke sohte ese, kasalehda kadek oh kohla kasamwo irail oh kapehseiong irail. Ele irail saikinte iang towehda atail mihding kan. Ni ahmw pahn koasoakoasoi ong irail ke pahn mwein kak diarada iaduwen ke kak tuhwong irail. Ni ahmw pahn pein pwarala rehrail de eker irail nan telephone, ke kak kangoange irail en kalaudehla arail perenki sukuhliki duwen Paipel oh padahkihong ih duwen atail koasoandi en onop Paipel.
5. Dahme kitail kak nda pwehn tepiada onop Paipel rehn emen?
5 Kitail kak doadoahngki ire me kohda nan padahk en Kataman pwehn kasalehiong tohnihmw akan duwen pwuhken Loalokong ni ahnsou me kitail pwurala rehrail. Karasepe, me wia padahk ni Katamano pahn wadek Aiseia. 65:21-23. Ni ahmw pahn pwurala rehn tohnihmwo, ke kak nda, “I pahn kasalehiong uhk ekei kapai kan me tomwo wahdo.” Mwuri ke kak koasoia pali 9-10 en pwuhken Loalokong. De ke kak nda, “Me tohto kin medemedewe iahd me kitail pahn kak kilang pweidahn iren kokohp en Aiseia.” Mwuri ke kak koasoia parakrap 1-4 nan irelaud 11. Ehu ahl me ke kak doadoahngki pwehn kasalehiong tohnihmwo duwen koasoandi en onop iei en kasalehda dahme ih me wia padahk ni Kataman kasalehda oh kasalehiong ih pwuhk en Loalokong oh kasalehiong ih iaduwen onop kin wiawi.
6. Soangen ahnsou mwahu dah kan me kitail kin ahneki ni ahnsou me kitail kin peikiong kehkehlik en Sises oh iang kataman eh pwoula?
6 Emenemen kitail en isaneki ahnsou mwahu kan me kitail kak sewese irail tohnsukuhl en Paipel kan, irail me solahr kin iang kalohk, oh irail kan me pwaredo oh iang towehda Kataman. (Luk 22:19) Siohwa uhdahn pahn ketin kapaia atail kin nantihong kalaudehla atail doadoahk en Wehio.