Kasamwo Irail kan me Kitail Lukehdo

Ni March 23, kitail kasik me irail kan me kitail lukehdo en iang towehda Kataman pahn lella de daulih million 12. Ia uwen arail pahn paiekihda kadehde me sounwia padahko pahn koasoiahda sapwellimen Siohwa kisakis en pweinen pweipwei sapahl oh ekei kapai kan en ahnsou kohkohdo me pahn pweida rehn tohnsampah! (Ais 11:6-9; 35:5, 6; 65:21-23; Sohn 3:16) Ahpw, kaidehn me pahn wia padahkohte me pahn wia kadehde ahnsowo. Kitail koaros kak iang wia kadehde ni atail pahn kasamwo irail kan me kitail lukehdo ni kadek. (Rom 15:7) Iet ekei iren sawas kan.

• Song dehr inenlahngete nan dewomw oh awiawih iahd prokram pahn tepida, ahpw kasalehda kadek ni omw sirei oh rahnmwahwih me kohdo kan oh sounkalohk kan me wereila sohte iang mihting oh kalohk

• Sang ni omw tetehkte irail akan me ke pein lukehdo, ken pil tetehkte meteikan me pwarado pwehki re alehdi luhk sang doadoahk tohrohr en kihseli doaropwehn luhk. Luke me kapw kan en mwohd rehmw. Ehukihong irail noumw Paipel oh pwuhken koul

• Mwurin padahko, ke kak sawas sapengala eh peidek kan. Ma sohte itar ahnsou pwehki tohn omw mwomwohdiso anahne kohkohla mwadang mwohn ehu mwomwohdiso pahn doadoahngki wasahn kaudoko, wiahda koasoandi pwehn tuhwong aramaso mwurin rahn kei. Ma ke sehse ia mwomwen omw pahn kak pwurehng tuhwong, ele ke kak nda: “I men ese ia omw madamadau duwen padahko. Ia duwen ata kak pwurehng koasoipene?”