Kihla Kingdom News No. 38 nan December!
1. Peidek dah kan me aramas kin idek duwen me melahr akan oh ia duwen peidek pwukat pahn pasapengla nan December?
1 Mehla iei imwintihti en aramas koaros, sohte lipilipil dahme re kin kamehlele. (1 Kor. 15:26) Aramas tohto kin medewe ma ia wasa me melahr akan mi ie oh ma re pahn pwurehng kilang irail. Ihme kahrehda, mwomwohdiso kan nan sampah pwon pahn iang kihpeseng doaropwe me oaralap mahsanih Me Melahr akan Uhdahn Kak Pwurehng Mourda? (Kingdom News No. 38) erein sounpwong ehu. Doadoahk en kalohk tohrohr wet pahn tepida December 1. Mwurin doadoahk tohrohr wet, kitail pahn doadoahngki doaropwe wet duwehte doaropwe teikan nan kalohk.
2. Ia mwomwen Kingdom News No. 38?
2 Mwomwen Doaropweo: Kingdom News No. 38 kin limilimpene pwehn kasalehda oaralap iangahki lepin lokaia “Ke pahn nda . . . ei? soh? mwein?” Ni emen eh pahn pahkpeseng doaropweo, e pahn kilang pasapengpen peideko wasa me nda dahme Paipel mahsanih oh dahme Paipel kin inoukihdi kak wiahiong ih. E pil pahn kilang kahrepen eh kak kamehlele Paipel. Nan tihnsewen doaropweo, mie ehu peidek ong ih en medewe oh kangoange en kalaudehla eh wehwehki duwen met.
3. Ia duwen atail pahn kihla Kingdom News No. 38?
3 Ia Duwen Atail Pahn Kihla: Doadoahk en kalohk tohrohr wet pahn duwehte doadoahk tohrohr en kihseli doaropwehn luhk ong Kataman oh mihting tohrohr. Elder kan pahn kihda kaweid duwen atail pahn kalohk, me pahrekiong kisinlikou me re alehdi ni April 1, 2013. Mwomwohdiso me arail wasahn kalohk tikitik kak sewese mwomwohdiso me karanih irail me arail wasahn kalohk laud. Ni omw kin ale noumw doaropwe kan, tamataman ken alehte uwen me ke pahn anahne ong wihk ehu. Erein doadoahk tohrohr wet, ma kitail kanekehla kalohk ihmw lel ihmw nan wasahn kalohko, kitail pahn kihla doaropwe wet ong wehi pokon. Ma doaropwe ko koaros kohpeseng mwohn imwin sounpwongo, kitail pahn uhd doadoahngki pwuhk me kitail pahn kihla sounpwongo. Ni tepin Rahn Kaunop, kitail pahn wia doadoahk en kalohk tohrohr ahpw kaidehn tapiada onop en Paipel kan. Ni imwin wihk kan, kitail pil pahn kihla Kahn Iroir ma konehng. Ke kin koasoanehdi ken iang doadoahk tohrohr wet erein eh pahn wiawi?