Kakairada Omw Tiahk en Mwadang Lel Wasa
1. Mehn kahlemeng dahieu me Siohwa ketikihda me pid sohte kin pwand?
1 Siohwa sohte kin ketin pwand. Karasepe, e kin ketikihong sapwellime ladu kan sawas “ni ahnsoun atail anahn laud kan.” (Ipru 4:16) E pil kin ketikihda padahk mehlel kan me rasehng “kisin mwenge ahnsou me konehng.” (Mad. 24:45) Ihme kahrehda kitail kak kamehlele me rahnen sapwellime engieng me kohkohdo “sohte pahn pwand.” (Apak. 2:3) Ia uwen atail kin paiekihda me Siohwa sohte kin ketin pwand! (Mel. 70:5) Ahpw pwehki kitail kin kedirepw oh atail soh unsek, e kin apwal en mwadang lel wasa. Dahme kahrehda kitail anahne kakairada tiahk en mwadang lel wasa?
2. Dahme kahrehda atail kin mwadang lel wasa kin wahdo kaping ong Siohwa?
2 Aramas tohto solahr kin kesempwalki mwadang lel wasa ni arail kin roporop ong pein irail oh sohte kak kaunda arail mwekid kan. (2 Tim. 3:1-3) Eri, ni Kristian akan ar kin mwadang lel wasahn doadoahk oh mihting kan oh mwadang lel wasa ni ahnsou me re koasoanehdi, meteikan pahn tehkada oh met pahn wahdo kaping ong Siohwa. (1 Pit. 2:12) Kitail kin kalapw mwadang tepida atail doadoahk ong mwohni ahpw kitail kin kalapw pwand ong atail doadoahk ong Koht? Atail kin mwadang lel mihting en Kristian kan iangahki tepin koul oh kapakap, kin kasalehda atail ineng en kahlemengih samatail nanleng me kin ketin soandi mwahu.—1 Kor. 14:33, 40.
3. Dahme kahrehda atail kin mwadang lel wasa kin kasalehda me kitail kin nsenohkin meteikan?
3 Atail kin mwadang lel wasa pil kin kasalehda me kitail kin nsenohkin meteikan. (Pil. 2:3, 4) Karasepe, ni atail kin mwadang lel mihting en Kristian kan, iangahki tuhpenehn kalohk, kitail sohte pahn kedirepwe iangatail tohnkaudok kan. Ahpw ma kitail kin kalapw pwand, met pahn kasalehiong meteikan me kitail kin kesempwalki atail ahnsou sang arail ahnsou. Atail kin mwadang lel wasa kin kasalehda me kitail wia aramas likilik oh pwerisek, iei irair kan me meteikan kin kalahnganki.
4. Ma kitail kin kalapw pwand, ia duwen atail kak kamwahwihala met?
4 Ma ke kin kalapw pwand, medemedewe ia kahrepe. Wiahda koasoandi mwahu me kak mweidohng uhk en wia omw pwukoa kan ni ahnsou me ke koasoanehdi. (Ekl. 3:1; Pil. 1:10) Peki sapwellimen Siohwa sawas. (1 Sohn 5:14) Atail kin mwadang lel wasa iei ehu ahl en kasalehda atail kesempwalki kosonned riau me keieu lapalap, iei poakohng Koht oh poakohng mehn mpatail.—Mad. 22:37-39.