Idawehn Mehn Kahlemeng en Sises
1. Soangen kahlemeng dahieu Sises ketin wiahda?
1 Ni ahnsou me kitail iang doadoahk en katohnpadahk, kitail anahne tamataman me atail mehn kahlemeng kak kamwakid laud irail akan me kin tetehk kitail. Sises ketin padahki aramas sang ni sapwellime mahsen kan oh wiewia kan. Irail akan me kin tehk ih kak wehwehki sapwellime ngoang, limpoak ong aramas akan, ineng en kasarawihla mwaren Semeo, oh eh kin ketin koasoanehdi teng en kapwaiada kupwuren Semeo.—1 Piter 2:21.
2. Ni ahl dah kan atail mehn kahlemeng kak kamwakid irail akan me kin iang kitail doadoahk en kalohk?
2 Ni Ahnsoun Kalohk en Ihmw lel Ihmw: Duwehte Sises, atail mehn kahlemeng kin kamwakid irail akan me kin iang kitail doadoahk en kalohk. Sounkalohk kapw kan me kin kilang atail ngoangki iang doadoahk en kalohk pahn medemedewe duwen pein arail doadoahk en kalohk. Ni ahnsou me irail kilang atail peren oh nsenoh mehlel ong meteikan, re pahn ale mehn kataman duwen kesempwalpen kasalehda soangen irair kante nan arail doadoahk en kalohk. Ni ahnsou me re kilang atail kin kaukaule doadoahngki iren Paipel kan, oh kin kaukaule wia return visit kan, oh kin wia onop en Paipel kan, re pahn mwekidki en wia duwehte.
3. Iaduwen atail mehn kahlemeng pahn kamwakid irail me kitail kin onop Paipel rehrail, oh dahme re pahn sukuhliki?
3 Ni Ahnsoun Wia Onop en Paipel kan: Irail me kin onop Paipel pahn keieu tetehk atail wiewia kan. Karasepe, mwein kitail pahn kawehwehiong irail kesempwalpen kaunopada ong onop, en tehk iren Paipel kan, oh en lainihala ire kesempwal kan, ahpw re pahn tehk ma pein kitail kin kaunopada. (Rom. 2:21) Ma kitail sohte kin pwand ni ahnsou me kitail inoukihda ong onop rehrail, re sohte pahn kalapw mweidohng wiewia teikan en kedirepwe arail onop en Paipel. Re pil pahn tehk atail ngenen tounmetei ong kalohk oh atail pwoson kehlail. E sohte kapwuriamwei me irail akan me kin onop rehn sounkalohk kan me kin uhdahn idawehn mehn kahlemeng en Sises kin kalapw wiahla sounkalohk ngoang oh pweida kan.
4. Ni ahnsou me kitail iang towehda mihding kan, dahme atail mehn kahlemeng kak padahngki?
4 Ni Ahnsoun Iang Towehda Mihding en Mwomwohdiso kan: Koaros me kin kisehn mwomwohdisohn Kristian kin ahneki pwukoa en padahki meteikan sang ni arail mehn kahlemeng ni ahnsoun mihding en mwomwohdiso kan. Irail akan me tepida iang towehda mihding kan pahn paieki mehn kahlemeng mwahu me re kilang nan mwomwohdiso. Re pahn tehk limpoak en pirien, miniminpene en Kristian, oh likou oh kapwat mwahu. (Melkahka 133:1) Re pahn tehk atail mehn kahlemeng en kaukaule iang towehda mihding en mwomwohdiso kan oh atail kin kasalehda pwoson nan wehi pokon ni ahnsoun mihding. Emen me iang ehu atail mihding kilangada kisin serepein men eh kak mwadang diarada iren Paipel ehu nan pein nah Paipel oh pwakipwakih wadawad en iren Paipelo. Eh mehn kahlemeng kamwakidada ohlo en peki onop en Paipel.
5. Dahme kahrehda kitail anahne kesempwaliki atail mehn kahlemeng?
5 Iren Paipel kan kin kangoange kitail en kahlemengih mehn kahlemeng mwahu en meteikan. (Pilipai 3:17; Ipru 13:7) Kahrehda, kitail anahne tamanda ma kitail pahn kahlemengih mehn kahlemeng en Sises, meteikan pahn tehk atail mehn kahlemeng oh met kak kamwakid irail ni ahl mwahu. Pwehki kitail wehwehki met, kitail men kapwaiada mahsen kan me dierek nan 1 Timoty 4:16: “Kanakanahieng pein kowe oh pil kanahieng omw padahk kan.”