Kalaudehla Atail Koahiek nan Doadoahk en Kalohk—Kalohk nan Intercom

Dahme Kahrehda E Kesempwal: Kalohk ong nan intercom [kisin koakon ehu me kin mi limwahn wenihmw kan me aramas kin padik pwoaten ehu oh kak koasoiong aramas me mi nan ihmwo] kak kasaloh. Ia duwen atail kak dehr mweidohng met en katikala atail ngoangki wiewia me mwahu kan? Tamataman me kalohk nan intercom ele ihte ahl en tuhkihong ekei aramas rongamwahwo. (Rom 10:14) Mie irail kan me songehr met mwowe oh kasalehdahr me kalohk ni ahl wet kin kak pweida. (Kilang 2011 Yearbook, pali 65, par.2-pali 66, par. 1 oh pil 2000 Yearbook, pali 54, par. 3.) Tehk duwen ire pwukat me kileldi pah.

Ia Duwen Omw Pahn Wia Met:

Kaunopada kisin padahk mwotomwot ehu, oh ntingihdi pwe ken kak wadek ong tohnihmwo nan intercomo. Met kak kalaudehla omw kamehlele me ke kak wia met. Tepidahte kawehwehda kahrepen omw kohla mwo. Doadoahngki eden tohnihmwo ma edeo pwarada. Kaimwisekihla omw padahkihong me ke kak kihong ih (de kihdi ni eh wenihmw) kisin doaropwe de makasihn ehu me pahn kalaudehla dahme kumwa koasoia.
Kolokol madamadau pwung. En pohkomwokomw oh kamwakid pehmw kan de paliweromwen duwehte mwomwen omw kin sohpeiong aramas men oh koasoiong.
Dehr saloh ahpw koasoi ni maledek. Koasoi ni sansal oh ngihl me konehng. Dehr kalapw uhdi ma sohte anahnepe, ahpw dehr koasoi pitipit.
Doadoahngki omw koahiek en madamadau. Nan wasahn kousoan laud kan, ele mie intercom tohto. Ele ke kak piladahte en padik mwein meh siluh, kilelehdi wasa me ke uhdi ie, kowe eri kohkohla. Aramas kan me kin mi wasao ele pahn pwunodikihda ma kitail mihmiseli wasao werei pwe kitail en koasoiong nan intercom koaros.

Song Wia Met Erein Sounpwongo:

Erein kaudok en peneinei songada mwomwen amwail pahn wia met. Mwohndi sohpeisang emenemen ni amwail wia met.