Kapai kan ong Irail me Kin Peikiong Koht

Soukohp Moses koasoia me ma kitail kin peikiong sapwellimen Koht kehkehlik kan, kitail pahn alehdi sapwellimen Koht kapai. (Deuderonomi 10:13; 11:27) Kitail kin peikiong Koht kaidehn pwehki kitail masak sapwellime kalokolok. Sapwellimen Koht irair kaselel kan kin kamwakid kitail en peikiong ih pwehki kitail poakohng ih oh men soikala wia mehkot me ele pahn kansensuwedihada ih. “Iet duwen wehwehn poakohng Koht, me kitail en kapwaiada sapwellime kehkehlik kan.”​—1 Sohn 5:3.

Ahpw ia duwen peikiong Koht eh kahrehiong kitail en alehdi sapwellime kapai? Tehk duwen ahl riau pwukat.

1. KITAIL KIN LOALOKONGLA NI ATAIL PEIKIONG KOHT

“Ngehi me KAUN-O omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.”​—AISEIA 48:17.

Siohwa Koht, Sounkapikpatail, ketin mwahngih kitail oh ketikihda kaweid me kitail anahne. Ma kitail mwahuki sapwellime padahk kan en sewese kitail en wiahda pilipil loalokong kan, kitail anahne sukuhlki sang Paipel dahme Koht ketin kupwurki kitail en wia oh mwuri kapwaiada padahk pwukat.

2. PEIK KIN KAHREHIONG KITAIL EN PEREN

“Meid pai irail me kin rong mahsen en Koht oh kapwaiada!”​—LUK 11:28.

Rahnwet, aramas rar kei kin peikiong Mahsen en Koht oh ahneki nsenamwahu mehlel. Karasepe, tehk duwen ohl emen nan Spein me kin keh lingeringer oh lemeiong meteikan​—iangahki eh pwoudo. Ehu rahno, e wadek dahme soukohp Moses koasoiahki duwen aramas mpahi Sosep, nein Seikop pwutako. Sosep netila nin duwen lidu men oh selidi ni eh sohte wiahda sapwung, ahpw e kin mpahi, meleilei oh kasalehda mahk. (Senesis, irelaud 37-45) Ohlen Speino koasoia: “Ei kin medemedewe duwen en Sosep mehn kahlemengo kin kamwakid ie en kakairada mpahi, kadek, oh kaunda pein ngehi. Imwilah, met I ahneki mour nsenamwahu.”

Paipel pil kihda ekei kaweid me pid duwen atail wiewia ong meteikan. Nan oaralap en mwurin met, kitail pahn tehkpene oaritik kan duwen met.