Sewese Aramas Teikan en “Peikiong Padahk Mehlel Sang Nan Mohngiong”
1. Mehnia irair me keieu kesempwal en ahneki ma kitail men kaudokiong Siohwa ni ahl me pwung?
1 Peik kin wia irair kesempwal pwehn kaudokiong Siohwa ni ahl me pwung. (Deud. 12:28; 1 Piter 1:14-16) Ni ahnsou keren, Koht pahn kadeikada “irail kan me pohnsehse Koht oh irail kan me sohte kin peikiong Rongamwahu.” (2 Deselonika 1:8) Iaduwen kitail kak sewese meteikan en “peikiong padahk kan sang Mahsen en Koht sang nan mohngiong”?—Rom 6:17.
2. Dahme kahrehda e kesempwal en sewese meteikan en ahneki pwoson kehlail?
2 Sewese en Kakairada Pwoson oh Limpoak: Nan Pwuhk Sarawi, peik kin pidada pwoson. Wahnpoaron Pohl kasalehda duwen “kehkehlik en Koht pwe aramas koaros en peik ni arail kin kasalehda arail pwoson.” (Rom 16:26) Ipru irelaud 11 kin kasalehda mehn kahlemeng mwahu tohto en aramas pwoson kan, oh pali laud en irail wia mehkot me pidada kupwuren Koht me sansalda ong irail. (Ipru 11:7, 8, 17) Ni pali teio, sapeik kin pidada sohte itar pwoson. (Sohn 3:36; Ipru 3:18, 19) Kitail anahne koahiekla ni atail kin doadoahngki Mahsen en Koht pwehn sewese meteikan en kakairada soangen pwoson me pahn kamwekid irail en peik.—2 Tim. 2:15; Seims 2:14, 17.
3. (a) Iaduwen peik kin pidada limpoak? (b) Iaduwen kitail kak sewese irail me kin onop Paipel rehtail en kakairada limpoak ong Siohwa?
3 Peik kin pil pidada limpoak ong Koht. (Deud. 5:10; 11:1, 22; 30:16) Keieun Sohn 5:3 mahsanih, “Pwe iet duwen wehwehn poakohng Koht: kitail en peikiong sapwellime kosonned akan; oh sapwellime kosonned akan me sohte apwal.” Iaduwen kitail kak sewese irail me kin onop Paipel rehtail en kakairada limpoak ong Siohwa? Doadoahngki ahnsou mwahu kan koaros erein atail onop rehn aramas en kakairada en tohnsukuhl kan arail kalahnganki sapwellimen Siohwa irair kan. Kasalehda ahmw pepehm loal kan ong Koht. Sewese tohnsukuhlo en medemedewe iaduwen ah kak kekeirada ah nanpwung mwahu rehn Siohwa. Limpoak ong Siohwa pahn keieu kamwekid aramas teikan—oh pil pein kitail—pwehn kak peikiong Siohwa sang nan mohngiong unsek.—Madiu 22:37.
4. (a) Dahme kahrehda atail wia mehn kahlemeng mwahu kin kesempwal? (b) Dahme kitail anahne wia pwehn anehki “mohniong me kin peik”?
4 Kitail en Wia Mehn Kahlemeng Mwahu: Ma kitail pahn wia mehn kahlemeng mwahu, met pahn kamwekid meteikan en peikiong Rongamwahu. Ahpw, kitail anahne nantihong ahneki “mohngiong me kin peik.” (1 Nanmwarki 3:9; Lepin Padahk 4:23) Dahme met kin pidada? Kadirehla nan mohngiongomw mwengehn ngehn me ke kin sukuhliki sang ahmw onop Paipel oh iang towehda mihding kan. (Mel. 1:1, 2; Ipru 10:24, 25) Nantihong werekiong irail me kin miniminkihpene mohngiong unsek papah Siohwa. (Lepin Padahk 13:20) Kaukaule iang kalohk, oh kakairada ahmw ineng en men sewese aramas ni pali ngehn nan ahmw wasahn kalohk. Kapakapki sawas sang Siohwa en sewese iuk en kakairada mohngiong peik oh mwahu. (Mel. 86:11) Liksang soahng kan oh wiewia kan me kin kauwehla mohngiongomw, duwehte mehn kamweit me kin kasalehda tiahk samin—nenek oh kamwahl—oh pil tiahk lemei. Nantihong wia soahng kan me pahn sewese iuk en karanih Koht oh kakehlailihala ahmw nanpwung mwahu reh.—Seims 4:7, 8.
5. Soangen kapai dah kan me aramas peik kan kak paiekihda?
5 Siohwa kamehlelehiong sapwellime aramas en kawa ko me irail pahn ale kapai kan ma irail pahn peikiong Ih. (Deud. 28:1, 2) Pil duwehte rahnwet, Siohwa kin kapaiada “irail me kin peikiong Ih.” (Wiewia 5:32) Kahrehda, sang ni atail kin kasalehda mehn kahlemeng mwahu oh sang ni mwomwen atail kin padahk ong meteikan, kitail kak sewese meteikan en peikiong Siohwa sang nan mohngiong unsek.