Iren Sawas kan ong Doaropwehn Kasukuhl ong Mihting en Mour oh Kalohk
© 2025 Watch Tower Bible and Tract Society of Pennsylvania
SEPTEMBER 1-7
SOAHNG KESEMPWAL KAN SANG MAHSEN EN KOHT LEPIN PADAHK 29
Soikala Padahk oh Tiahk kan me Uhwong Paipel
Kasansal Kan En Irail Me Mi Wasa Soh Sansal Nanleng
Duwehte irail kan me selkihdi selmete, aramas rar kei kin mwomwen selikihdi arail katieni oh masak ngehn suwed kan. Irail kin rapahki mehn wunahni de mesehl kan, oh mehn silasil kan pwehn pere irail. Ke sohte anahne wia met. Paipel kin kansenamwahwih kitail ni eh kin kamehlelehiong kitail oh mahsanih : “KAUN-O kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.” (2 Kronikel 16:9) Koht mehlelo, Siohwa, uhdahn manaman sang Sehdan. Siohwa pahn ketin perei iuk ma ke likih Ih.
Pwe Siohwa en ketin perei iuk, ke anahne sukuhlki dahme e kin ketin kupwurki oh kowe eri kapwaiada. Karasepe, ni mwehin tepin Kristian akan, Kristian kan nan kahnimw en Episos kihpene neirail pwuhken wunahni koaros oh isikala. (Wiewia 19:19, 20) Duwehte met, ma ke men Koht en ketin perei iuk, ke anahne kesehla kepwehn wunahni, mesehl, mehn silasil, pwuhken wunahni kan, luwou kan me kin mwomwen perei iuk, oh soahng koaros me kin pidada wiewiahn ngehn suwed kan.
Kolokolete Padahk Mehlel Duwen Mehla
13 Ma ke peikasalki duwen ehu tiahk de wiewia, patohwanohng Siohwa ni kapakap, peki ni pwoson sapwellime erpit. (Wadek Seims 1:5.) Mwurin mwo, wia roporop nan neitail sawasepen Paipel kan. Ma anahn, peki sawas sang elder kan nan omw mwomwohdiso. Irail sohte pahn ndaiong uhk dahme ke pahn wia, ahpw irail kak kasalehiong uhk kaweid oh ire mehlel kan sang Paipel, duwehte me kitail koasoiapene. Ni omw wia soahng pwukat, ke kin kaiahnehda omw “kehl en madamadau,” oh kehl wet pahn seweseiuk en “ese wekpeseng en dahme pwung oh dahme sapwung.”—Ipru 5:14.
‘I Pahn Momourki Sapwellimomwi Mehlel’
12 Tiahk oh wiewia kan me sohte kin kaperenda Koht. Atail peneinei, iengatail tohndoadoahk oh tohnsukuhl kan ele kin song en kahrehiong kitail en iang irail wia kasarawi kan. Dahme kak sewese kitail en pelianda kasongosong en iang wia tiahk oh rahn en kasarawi kan me sohte kin kaperenda Siohwa? Kitail anahne tamataman mwahu dahme kahrehda Siohwa sohte kin ketin pwungki rahn en kasarawi pwukat. Ni atail doudouloale kahrepe kan me kitail sohte kin kasarawih rahn en kasarawi pwukat, kitail pehm me kitail kin weweid ni ahl me “Kauno kin ketin kupwurperenki.” (Ep. 5:10) Ma kitail likih Siohwa oh sapwellime Mahsen, kitail sohte pahn masak dahme aramas teikan kin medewe.—Lep. Pad. 29:25.
Ire Kesempwal kan
it “Kapinga Mwahl” par. 1
Kapinga Mwahl
En song kaperenda emen ni omw koahiek en kapinga ih; daulihla kapinga; kaping me likamw de nohn daulihala. E kin kalapw wiawi pwehn kapohlih emen oh kahrehiong en nohk tehk pein ih de mwomwe oh met kin wia mehkot keper ong ih. Kahrepen met kin wiawi iei pwehn natih emen en pwungki ih de alehdi pai kan sang reh, pwe me e kapingao en pehm me e anahne mwahu ong ih de en wahdo kaping ong ih. Met kin kalapw wiawi pwehn kahrehiong emen nan lidip ehu. (Lep 29:5) En kapohlih emen kaidehn kasalepen erpit sang powe; e wia tiahk en sampah wet, me kin kapwarehda irair en roporop, lipilipilki aramas oh mwalaun. (Sei 3:17) Pitih de lokaia likamw ong aramas, nohn kapinga de kalingana aramas, oh kapohlih meteikan pwe ren nohk nsenohki pein arail lingan, sohte kin kaperenda kupwuren Koht.—2Ko 1:12; Kal 1:10; Ep 4:25; Kol 3:9; Kau 21:8.
SEPTEMBER 8-14
SOAHNG KESEMPWAL KAN SANG MAHSEN EN KOHT LEPIN PADAHK 30
“I en Dehr Wiahla Aramas Kepwehpwe de Semwehmwe”
Soangen Limpoak Dahieu me Kin Wahdo Peren Mehlel?
10 Ei mehlel, kitail koaros kin anahne mwohni. E kin kak doareikitailla. (Ekl. 7:12) Ahpw ia duwe, kitail kak peren ma kitail naineki mwohni me itar ong atail anahn kan? Ei! (Wadek Eklesiasdes 5:12.) Akur me samanki Sake ntingihedi: “I en dehr wiahla aramas kepwehpwe de semwehmwe. Eri, komw ketikihong ie uwen kisin tungoal me I anahne.” E mengei en wehwehki dahme kahrehda e sohte men uhdahn semwehmwe. E nda me e sohte men lelohng songosong en pirap, pwehki pirap pahn kahrehiong en kauwehla mwaren Koht. Ahpw dahme kahrehda e sohte men kepwehpwehki? E ntingihedi: “Pwe ma e daulihala, mweinele I pahn patohwan me I sohte anahne komwi.” (Lep. Pad. 30:8, 9) Mwein ke pil ese ekei me kin likih mwohni ahpw kaidehn Koht.
11 Aramas me kin poakohng mwohni sohte kin kak kaperenda Koht. Sises mahsanih: “Sohte aramas emen kak liduwih soumas riemen; pwe e pahn kailongki emen, e ahpw pahn poakepoake meteio; e pahn loalopwoatohng emen, e ahpw pahn mwamwahliki meteio. Eri, ih pil duwen kumwail: kumwail sohte kak papah Koht oh pil kepwehn sampah kan.” E pil mahsanih: “Kumwail dehr kin ngoangki kepwehpwehkihla kepwehn sampah, me mer oh loangenmwet kin kauwehla, oh wasa me aramas lipirap akan kin dapengpeseng ihmw kan oh pirap ie. A kumwail ngoangki kepwehpwehkihla paien nanleng, me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie.”—Mad. 6:19, 20, 24.
12 Tohto sapwellimen Siohwa ladu kan kin song en ahneki mour ehu me sohte kedirepwki soahng kan me sohte uhdahn kesempwal. Re kin tehk me met kin kihong irail ahnsou laud en papah Siohwa oh pil kin kaperenda irail. Jack, me kin kousoan nan Wehin Amerika, netikihla imwe ihmw laudo oh pil eh pesines pwe en kak iang eh pwoudo pioneer. E nda: “E apwal en tounmeteikihla imwat oh sapwat kaselelo me mi wasa me dohsang kahnimw kan.” Ahpw erein sounpar tohto e kin kohdo imwarao oh kin pwunod pwehki kahpwal kan ni eh wasahn doadoahko. E nda: “Ei pwoudo wia pioneer men oh e kin ahnsou koaros peren. E kin nda, ‘Ei kauno me keieu mwahu!’ Pwehki ahnsou wet I pil kin iang pioneer, kiht koaros kin doadoahk ongete Siohwa.”
w87 5/15 30 par. 8
Lemmwiki Siohwa oh Ke Pahn Nsenamwahu
◆ 30:15, 16—Ia wehwehn karasaras pwukat?
Mepwukat kin karasahda duwen eh sohte mie idin noahrok. Liht kan kin mehwo ni arail kin mihk nta, duwehte aramas noahrok men kin men kalaudehlahte nah mwohni de eh manaman. Pil duwehte met, sousou sohte kin itarki me e kin alehdi oh kin ritidahte awiawih me pahn mehla kan. Lih depwen men kin wie sengisengki eh men naineki seri. (Senesis 30:1) Sahpw madekeng kin mihkada pilen keteu ahpw pil mwadangete pwurehng madekengla. Oh kisiniei me kin isikala soahng kan me lekdekiong powe kin pil kohpeseng pwehn isikala soahng teikan limwah. Ih pil duwen aramas noahrok kan. Ahpw irail kan me kin mweidohng erpit en Koht en kaweid irail sohte kin wiahla lidun ineng roporop wet.
Mourki Dahme Mie Rehmw —Ia Duwen Met Kak Wiawi
Nekidala mwohni lao e itarohng pwainda mehkot. Mendahki e mwomwen tiahk en mahs ehu met, en nekidala mwohni lao e itarohng pwainda mehkot iei ahl keieu loalokong en dehr lelohng kahpwal en mwohni. Me tohto me kin wia met sohte kin anahne pweipwandla de pwain soahng kan me kin iangodo pweipwand ehu, me kin kalaudehla pweinen soahng koaros me e pwainda. Paipel kin kawehwehda duwen ketitik kan ar “inenen loalokong” pwehki arail kin “nekidala kanarail kisin mwenge ni ahnsoun karakar” pwe ren doadoahngki mwuhr.—Lepin Padahk 6:6-8; 30:24, 25.
Wiahte Emen me Siohwa Ketin Lukehdo nan Tehnpese!
18 E mwahu ong kitail en kasawih atail madamadau me pid mwohni. Pein idek rehmw: ‘I kin kalapw medemedewe duwen mwohni oh dahme e kak pwainda? Ma I kin pekihsang emen mwohni, I kin pwand en kapwungala, oh medewe me aramaso sohte anahne? En naineki mwohni kin kahrehiong ie en medewe me I mwahusang meteikan? E kin apwal ong ie en kasalehda kadek ong meteikan? I kin medewe me ma riei Kristian kan naineki diren mwohni, met wehwehki me irail poakohng mwohni laudsang Siohwa? I men kompoakepahnkihte irail kan me kepwehpwe a kaidehn me semwehmwe?’ E kesempwal en idek soangen peidek pwukat pwehki kitail alehdier luhk en iang mi nan sapwellimen Siohwa impwal. Kitail kak pere pai kaselel wet sang ni atail dehr poakohng mwohni. Ma kitail wia met, Siohwa sohte pahn ketin mweisang kitail!—Wadek Ipru 13:5.
Ire Kesempwal kan
Kapikipikda kan Kasalehda Sapwellimen Siohwa Erpit
11 Rak-padser iei pil emen kisin mahn me kitail kak sukuhlki sang mehkot kesempwal. (Wadek Lepin Padahk 30:26.) E mwomwen laud sang mahn rapit ahpw salenge me pwonopwon, neh kan me mwotomwot. Mahn menet kin mihmi nan wasa takain. Mahn menet kak kilang wasa doh pwehn kak pere ih, oh pwoahr kan de kisin pwal nan takai kan kin wia wasahn perepe ong ih sang eh imwintihti kan. Rak-padser kin nsenamwahu wasa me irail tohto kin kousoanpene ie, pwehki met kin pere irail oh sewese irail ni ahnsoun kopou.
12 Dahme kitail kak sukuhlki sang mahn rak-padser? Keieu, mahn menet sohte kin mihmi wasa kan me mengei ong mahn teikan en kemehla ih. Ahpw, e kin isaneki e kak kilang wasa doh pwehn kilangada eh imwintihti kan, oh e kin mihmi karanih pwoahr oh pwal kan nan takai kan pwehn wia perepe ong ih. Duwehte met, kitail anahne en mwasamwasahn pwe kitail en kak kilangada soahng keper kan me kin pwarada nan en Sehdan sampah wet. Wahnpoaron Piter kaweidih Kristian kan: “Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla.” (1 Pit. 5:8) Ni ahnsou me Sises ketiket sampah, e kin ketin mwasamwasahn oh onopadahng kasongosong koaros me Sehdan kin wia pwehn kauwehla Eh lelepek. (Mad. 4:1-11) Sises ketikihda mehn kahlemeng mwahu ong sapwellime tohnpadahk kan.
13 Ehu ahl me kitail kak mwasamwasahn iei sang ni atail pahn isaneki sawas kan me Siohwa kin ketikihong kitail. Kitail anahne en kesempwalki onop Mahsen en Koht oh towehda mihting en Kristian kan. (Luk 4:4; Ipru 10:24, 25) Duwehte mahn rak-padser me kin nsenamwahu nanpwungen ienge kan, kitail pil anahne en karanih riatail Kristian kan pwe kitail en nsenamwahuki atail kin “sawaspene.” (Rom 1:12) Ni atail kin doadoahngki sapwellimen Siohwa sawas kan, kitail kin pwungki dahme sounmelkahka Depit ntingihdi: “KAUN-O me silepei; ih me kelepei kehlail. Ei Koht me silepei, I kin nekinek mwahu pahn kupwure.”—Mel. 18:2.
SEPTEMBER 15-21
SOAHNG KESEMPWAL KAN SANG MAHSEN EN KOHT LEPIN PADAHK 31
Mehn Kasukuhl kan Sang Kaweid Limpoak en Nohno Men
Kaiahnehda Noumw Seri kan Ren Kesempwalki Tiahk Mwakelekel
Padahkihong irail ire mehlel koaros me pid duwen nsenen pwopwoud. E kesempwal en kasalehda soahng kan me kitail pahn kaleke me pid duwen nsenen pwopwoud. (1 Korint 6:18; Seims 1:14, 15) Ahpw Paipel kin kalapw koasoia nsenen pwopwoud nin duwen kisakis ehu sang rehn Koht, a kaidehn lidip en Sehdan ehu. (Lepin Padahk 5:18, 19; Melkahkahn Melkahka kan 1:2) Ma ke kin koasoiahte keper kan me pid nsenen pwopwoud ong noumw seri kan, re pahn kakete ahneki madamadau sapwung duwen ireo, me sohte pahrekiong Paipel. Serepein pwulopwul men me kin mi nan France me adaneki Corrina, koasoia: “Ahi pahpa nohno kin keieu kalapw koasoia keperpen tiahk samin me pid wia nsenen pwopwoud, oh met kahrehiong ien ahneki madamadau sapwung me pid duwen nsenen pwopwoud.”
Tehk kanahieng me noumw seri ko wehwehki ire mehlel koaros me pid duwen nsenen pwopwoud. Nohno men nan Mexico me adaneki Nadia, koasoia: “I kin ahnsou koaros nantihong padahkihong nei seri kan ren wehwehki me nsenen pwopwoud iei mehkot lingan oh mwahu me Siohwa Koht ketikihong aramas akan ren paieki. Ahpw e kin konehngete wiawi nanpwungen pwopwoud ehu. Mwomwen atail doadoahngki met kak kahrehiong kitail en peren de lokolok.”
ijwhf artikel 4 par. 11-13
Koasoiaiong Neitail Seri Duwen Sakau en Wai
Tiengla mwowe pwehn koasoia duwen ire wet. Pahpa men nan Britain me adaneki Mark, koasoia: “Ire me pid nim sakau en wai kin kak kapwonopwon ong me pwulopwul kan. I idek rehn nei pwutako me sounpar waluh ma e medewe me e pwung de sapwung en nim sakau en wai. I koasoanehdi ahnsou ieu me pahn soanamwahu ong ih, oh met sewese en kasalehda eh madamadau ni saledek.”
Re pahn kak taman dahme ke koasoia ma ke kin pwurupwurehng koasoiaiong irail duwen ire wet. Koasoia duwen sakau en wai ni omw pil koasoia duwen ire kesempwal teikan me pid duwen mour, me duwehte kosonned kan me pid nanial oh ire me pid duwen nsenen pwopwoud. Kawehwe met ni ahl me pahn pahrekiong sounpar en noumw serio.
Wiahda mehn kahlemeng mwahu. Seri kan kin rasehng lihmw me kin alehda soahng koaros limwahrail, oh roporop kan kasalehda me pahpa nohno kan me kin keieu kamwakid neirail seri kan. Met wehwehki me ma ke kin kalapw nim sakau en wai pwehn meleileidi de kihsang omw pwunod, noumw serio pahn medewe me sakau en wai me pahn kak kamwahwihala kapwunod kan nan mour. Eri wiahda mehn kahlemeng mwahu. Tehk kanahieng me ke kin doadoahngki sakau en wai ni konehng.
g17.6 9 par. 5
Padahkihong Noumw Seri kan Ren Kin Aktikitik
Kangoange en kin kihkihwei. Kadehdehiong noumw serio me “kihwei kin kaperen sang ale.” (Wiewia 20:35) Ia duwen? Kumwa kak ehupene oh ntingihedi eden aramas akan me anahne sawas ong netinet, mehn peidaid, oh kamwahwihala wasakis ni imwarail me anahn. Mwuri, kahrehda noumw serio en iang uhk kohla sewese ekei irail. Mweidohng noumw serio en kilang omw peren oh nsenamwahu ni omw kin sewesehla anahn en meteikan. Ni ahl wet, ke pahn padahkihong noumw serio en kin aktikitik, oh ke wia met ni ahl me keieu mwahu, iei sang ni omw mehn kahlemeng mwahu.—Ire mehlel: Luk 6:38.
Ire Kesempwal kan
w92 11/1 11 par. 7-8
Kasukuhl ni Mwehin Paipel
7 Nan Israel, seri men kin alehdi kasukuhl sangete eh tikitik sang rehn eh pahpa oh pil nohno. (Deuderonomi 11:18, 19; Lepin Padahk 1:8; 31:26) Nan ehu dikseneri en France me adaneki Dictionnaire de la Bible, emen me samanih Paipel me adaneki E. Mangenot ntingihedi: “Sangete ahnsou me e kak lokaia, serio kin esehla ekei ire kan nan Kosonnedo. Eh nohnou kin pwurupwurehng ndinda iretikitik ehu; ni serio eh pahn esehla iretikitiko, nohnou kin uhd kihong ih pil ehu. Mwuri, seri kan pahn kilang iretikitik ko me re wadlikihlahr. Oh ih mwomwen re kin tepida esehla wadawad, oh ni ahnsou me re kin laudla, re kak pousehlahte arail kaiahn ong arail pelien lamalam ni arail pahn wadek oh doudouloale kosonned en Kauno.”
8 Met kasalehda me ehu wiepen kasukuhl me kin kalapw kadoadoahk iei en wadlikihala soahng kan. Soahng kan me re sukuhlki me pid sapwellimen Siohwa kosonned kan oh wiewia kan ong sapwellime aramas akan anahne mihla nan arail mohngiong. (Deuderonomi 6:6, 7) Re anahne doudouloale mepwukat. (Melkahka 77:11, 12) Pwehn sewese seri kan oh me laud kan wadlikihala mehkot, re kin doadoahngki soangsoangen mehn sawas kan me pahn kahrehiong ren tamataman dahme re sukuhlki. Mepwukat iangahki wiepen nting ehu me kin doadoahngki irekidien mesen nting kan ni tepidahn ehuehu iretikitik en melkahka ehu (me duwehte nan Lepin Padahk 31:10-31); lepin lokaia kan me kin tepikihda mesen ntingteieu de ngihlteieu (alliteration); oh kadoadoahkpen nempe kan, duwehte me kadoadoahk nan elep en Lepin Padahk irelaud 30. Ekei semen kan kin medewe me Gezer Calendar, me wia ehu kasalepen mwomwen nting en Ipru en mahs me keieu wereila, iei nein serihn sukuhl men mehn sewese en wadlikihala mehkot.
SEPTEMBER 22-28
SOAHNG KESEMPWAL KAN SANG MAHSEN EN KOHT EKLESIASDES 1-2
Pousehlahte Kaiahne Dih en Mwuhr
Likihong Ohl Lelepek kan Mepwukat
3 Kitail kin poakohng Siohwa oh kesempwalki atail pwukoa kan. Tohto kitail kin perenki atail doadoahk oh koapworopworki me kitail pahn pousehlahte wiewia met. Ahpw e kansensuwed pwe ni aramas akan ar kin mahla, re solahr kak wia soahng koaros me re kin wia duwehte mahso ni arail pwulopwul. (Ekl. 1:4) Met kin kahrehda kahpwal laud kan ong sapwellimen Siohwa aramas akan. Rahnwet, doadoahk en kalohk kin pousehlahte kekeirda oh sapwellimen Siohwa pwihn kin doadoahngki dipwisou kan pwehn ehukihong rongamwahwo uwen tohtohn aramas me re kak. Ahpw ekei pak e kak apwal ong me mah kan en sukuhlki wiepe kapw kan pwehn wia soahng kan. (Luk 5:39) E pil sohte wia mehkot kapwuriamwei me aramas akan sohla kehlail oh roson ni arail mahla. (Lep. Pad. 20:29) Eri, e wia elen limpoak oh katapan ni me mah kan ar kin kaiahne me pwulopwul kan en ale pwukoa teikan nan sapwellimen Siohwa pwihn.—Wadek Melkahka 71:18.
4 E sohte kin ahnsou koaros mengei ong irail kan me ahneki manaman en kihong me pwulopwul kan doadoahk. E kak kahrehiong brother kan en nsensuwed ni arail medewehla arail pahn luhssang pwukoa me re uhdahn perenki. Ele re kak nsensuwedkihla ni arail medewehla me irail anahne uhdihsang wia doadoahk tohrohr me re kin perenki wia. De ele re kin pwunodki ma re sohte kaweid doadoahko, e sohte pahn pweida mwahu. Mwein ekei medewe me sohte arail ahnsou en kaiahne meteikan. Ni ahnsowohte, me pwulopwul kan anahne kanengamah ma re sohte alehdi pwukoa teikan.
Ire Kesempwal kan
it “Eklesiasdes” par. 1
Eklesiasdes
Ahd en Ipruo Qo·heʹleth (me wehwehki “Sounkapokonepene”) kawehwehda mwahu pwukoa me nanmwarkio ahneki pahn kaundahn Koht me mehn Israel kan kin paieki. (Ekl 1:1, 12) Pwukoahn kaun men iei en kaminiminpene sapwellimen Koht aramas inouda kan ren lelepekiong uhdahn arail Nanmwarki oh Koht. (1Na 8:1-5, 41-43, 66) Ihme kahrehda e kin sansalda ma nanmwarki men kin mwahu de suwed ong wehin Israel ma e kin kahluwa wehio en papah Siohwa de soh. (2Na 16:1-4; 18:1-6) Sounkapokonepeneo, Solomon, wiahier soahng tohto pwehn kapokonepene wehin Israel oh iengarail mehn keiru kan ong tehnpas sarawio. Nan pwuhk wet, e kin nantihong kapokonepene sapwellimen Koht aramas akan pwe ren tohrohrwei sang doadoahk mwahl oh soh katepe kan en sampah wet, ahpw ren wia doadoahk katepe kan ong Koht me re inou ong nin duwen wehi ehu. Ahd me kin kadoadoahk nan neitail Paipel en wai kan kohsang kawehwe en lepin lokaiao Qo·heʹleth nan Greek Septuagint, me iei, Ek·kle·si·a·stesʹ (Ecclesiastes), me wehwehki “tohn ecclesia (mwomwohdiso; kapokon) men.”
SEPTEMBER 29–OCTOBER 5
SOAHNG KESEMPWAL KAN SANG MAHSEN EN KOHT EKLESIASDES 3-4
Kakehlaka Sahl Silipwoat me Patpene
ijwhf artikel 10 par. 2-8
Ia Duwen Omw Pahn Doadoahngki Computer de Cellphone Ape ni Ahl me Pwung
● En doadoahngki computer de cellphone ape ni loalokong kak wahdo kamwahu ong mouren pwopwoud. Karasepe, pwopwoud kan kak koasoiong emenemen erein ara sohte mihpene nan rahn ehu.
“En ntingdohte nda ‘I poakepoakeiuk’ de ‘I medemedeweiuk’ uhdahn kesempwal.”—Jonathan.
● En doadoahngki computer de cellphone ape ni soh loalokong kak kaluwetehla mouren pwopwoud. Karasepe, ekei aramas kin doadoahngki neirail computer de cellphone ape ahnsou koaros, oh met kin kihsang arail ahnsoun ehuong oh tehk arail pwoud.
“I kamehlele me ekei pak ei pwoudo kin men koasoido, ahpw I kin wie doadoahngki nei cello ahnsowo.”—Julissa.
● Ekei aramas kin nda me re kak koasoakoasoi mwahu rehn arail pwoud oh pil ni ahnsowohte doadoahngki neirail computer de cellphone ape. Ahpw nin duwen me Sherry Turkle, emen me kin samanih mwekimwekid en aramas, koasoia, met iei “koasoi likamw me pid duwen wia soahng tohto ni ahnsou ehute.” E sansal me met kaidehn irair mwahu ehu. E nda me ni mehlel, “irair en atail doadoahk kin suwedla ni atail kin katohtohwehla soahng kan me kitail kin wia.”
“E kin kansenamwahu en koasoakoasoiong ei pwoudo, ahpw kaidehn ahnsou me e kin wiewia soahng tohto ni ahnsou ehute. Eh wia met kin kasalehiong ie me e kin perenkihte kilikilang nah cello.”—Sarah.
Ire kesempwal: Mwomwen omw doadoahngki noumw computer de cellphone ape kak sewese de kauwehla omw mouren pwopwoud.
Pousehlahte Sasaun “Mpwul en Siohwa”
12 Ia duwen pwopwoud kan ar kak alasang Akwila oh Persila? Medewehla soahng tohto me kowe oh omw pwoudo anahne wia. Ia duwe, kumwa kak ehupene wia ekei soahng pwukat, a dehr kelehpwki? Karasepe, Akwila oh Persila kin ehupene kalohk. Kumwa kin kaukaule wiahda koasoandi en wia duwehte? Akwila oh Persila pil kin ehupene doadoahk. Ele amwa doadoahk en mwohni wekpeseng, ahpw kumwa kak ehupene wia doadoahk en nan imwamwao? (Ekl. 4:9) Ni amwa kin sawaspene wia doadoahk ehu, ele e kin kalaudehla amwa ahnsou en ehupene oh koasoipene. Robert oh Linda pwopwoudkier daulih sounpar 50. Robert koasoia: “Ni mehlel, se sohte ahneki ahnsou laud en ehupene mwemweit. Ahpw ni ahnsou me I kin widen dahl oh ei pwoudo kin dahlimwihada, de ni ei kin mwetimwet likio oh e kohieido pwehn iang ie doadoahk, I kin uhdahn peren. At ehupene wia soahng kan kin kahrehda sen karanihala emenemen. At limpoakpene kin laudla.”
13 Ahpw tamataman me en mihpene wasakis sohte kin ahnsou koaros wehwehki me pwopwoud ehu pahn karanihala emenemen. Lih pwopwoud men nan Brazil koasoia: “Rahnpwukat, se uhdahn kin kedirepw, kahrehda e mengei en medewe me se kin ehupene pwehki se mihmi nan ihmw ehute. I sukuhlki me se anahne wia laudsang en mihpenehte. I anahne wiahda ahnsou ong ei pwoudo.” Tehk ia duwen Bruno oh eh pwoudo, Tays, ara kin tehk mwahu me ira wiahda ahnsou ong emenemen. Bruno koasoia: “Ni at kin wiahda ahnsou ong emenemen, se kin pwilikihdi nait sehlpwohn kan oh perenki at ahnsoupene.”
14 Ahpw ia duwen ma kowe oh omw pwoudo sohte kin perenki amwa ahnsoupene? Mwein ke sohte perenki dahme e perenki, de ele kumwa kin kalidoarihada emenemen. Dahme kumwa kak wia? Medewehla kisinieio me kitail koasoiapene mwoweo. E sohte kin pein tepida lul laud. Emen anahne doulahte kihkihong tuwi laud. Duwehte met, kumwa seu tepida sang ni amwa wiahdahte ahnsou kis ong emenemen ehuehu rahn? Kumwa kak wiapene soahng ehu me kumwa koaros perenki wia, kaidehn soahng ehu me kakete kahrehda kumwa en lingeringerda. (Seims 3:18) Ni amwa ekisekis tepida, kumwa kak kilang amwa limpoak eh pwurehng kekeirda.
Pousehlahte Sasaun “Mpwul en Siohwa”
3 Pwehn pousehlahte sasaun “mpwul en Siohwa,” ohl pwopwoud oh lih pwopwoud anahne doadoahk laud pwe ira en ahneki nanpwungmwahu kehlail rehn Siohwa. Ia duwen nanpwungmwahu wet eh sewese ara pwopwoud? Ni pwopwoud ehu ara kin kesempwalki ara nanpwungmwahu rehn Samarao nanleng, ira kin mwadang en kapwaiada sapwellime kaweid, oh met kin sewese ira en soikala oh powehdi kahpwal kan me kakete kahrehiong ara limpoakpene en tikitikla. (Wadek Eklesiasdes 4:12.) Irail kan me ahneki nanpwungmwahu kehlail rehn Siohwa pil kin wia uwen arail kak en kahlemengih Siohwa oh kakairada irair kaselel kan, duwehte kadek, kanengamah, oh mahk. (Ep. 4:32–5:1) Ni pwopwoud ehu ara kin kasalehda soangen irair pwukat, e pahn mengei ong ara limpoakpene en kekeirda. Sister men me adaneki Lena, me pwopwoudkier daulih sounpar 25, koasoia, “E mengei en poakohng oh wauneki emen me ahneki nanpwungmwahu kehlail rehn Siohwa.”
Ire Kesempwal kan
it “Limpoak” par. 39
Limpoak
“Ahnsoun Limpoak.” Limpoak sohte kin kohwong irail kan me Siohwa ketin kasalehdahr me re sohte warohng, de irail kan me koasoanedier ren keid nan ahl suwed. Limpoak kin kohwong koaros. Ahpw ma re kasalehdahr me re kin kailongki Koht, ih ahnsowo me limpoak solahr pahn kin kohwong irail. Siohwa Koht oh Sises Krais kin ketin poakohng soahng kan me pwung oh kalahdeki soahng kan me suwed. (Me 45:7; Ipr 1:9) Irail kan me kin uhdahn kailongki Koht mehlelo kaidehn soangen aramas kei me limpoak anahne kohwong. Ni mehlel, sohte katepen en pousehla kasalehiong irail pwukat limpoak, pwe irail kan me kin kailongki Koht sohte pahn mwekidki sapwellimen Koht limpoak. (Me 139:21, 22; Ais 26:10) Kahrehda e konehng me Koht kin ketin kalahdeki irail oh ketin koasoanedier ahnsou ieu en kasohrirailla.—Me 21:8, 9; Ekl 3:1, 8.
OCTOBER 6-12
SOAHNG KESEMPWAL KAN SANG MAHSEN EN KOHT EKLESIASDES 5-6
Ia Duwen Atail Pahn Kasalehda Wahu ong Atail Koht Lapalapo
Wauneki Siohwa Sang Omw Kin Kasalehda Wahu
17 Petehkpe tohrohr anahne en wiawi pwehn kasalehda wahu ni atail pahn kaudokiong Siohwa. Eklesiasdes 5:1 mahsanih: “Kanahieng ni omw pahn patohlahng nan Tehnpas Sarawio.” Kaweid kin kohieng Moses oh Sosua en kihsang ara suht kan ni ara pahn mih wasa sarawi. (Eks. 3:5; Sos. 5:15) Ira anahne en wia met pwehn kasalehda wahu. Samworo kan en Israel anahne en likawih sarmada linen “pwe re en dehr kin sansal suwed.” (Eks. 28:42, 43) Met kin perehsang irail en dehr sansal suwedla ni ahnsou me irail kin papah ni pei sarawi. Peneinei en samworo kan koaros anahne en kolokol sapwellimen Koht koasoandi wet ong duwen arail en kasalehda wahu.
18 En kasalehda wahu nan atail kaudok, met kin pidada en wauneki atail koasoandi en kaudok. Pwehn warohng ale wahu, kitail anahne en pil kin mwekid ni elen wahu. Kitail sohte anahne en mwomwehdahte kasalehda wahu de pil wia adamwahu rehn aramas akan. Atail en kasalehda wahu anahne siksang dahme aramas kak kilangki meserail ahpw en kin nin duwen dahme Koht ketin mwahngih—me iei mohngiongitail. (1 Sam. 16:7; Lep. Pad. 21:2) Wahu anahne en wiahla irair ehu rehtail me pahn kamwakid mwomwatail, atail lamalam, atail nanpwungmwahu rehn meteikan, oh pil duwen atail en kilangwohng pein kitail. Mehlel, wahu anahne en kin sansalda ahnsou koaros oh pil ni mehkoaros me kitail kin nda de wia. Ma e pahn pidada duwen atail wiewia, mwomwatail, oh atail likou kan, kitail en tamanda mahsen en wahnpoaron Pohl: “Se sohte men aramas emen en kahdsuwedih at kohwa doadoahk, ihme se sohte kin men kedirapwahki emen. Eri, se kin kasalehda ni mehkoaros me se kin wia, me kiht ladun Koht kei.” (2 Kor. 6:3, 4) Kitail kin “kapingahki atail padahk duwen Koht, atail Sounkomour.”—Taitus 2:10.
Kamwahwihala Omw Kapakap Sang Omw Onopki Paipel
21 Sises kin ketin loulou ni wahu oh pwoson. Karasepe, mwohn e ketin kaiasada Lasarus, “Sises ahpw ketin sarada oh mahsanih, ‘Semei, kalahngan en komwi pwehki omwi ketin karongeier. I ese me komwi kin ketin karonge ie ahnsou koaros.’” (Sohn 11:41, 42) Omw kapakap kan kin kasalehda wahu oh pwoson duwehte met? Onopki sapwellimen Sises loulou me e ketin wia ni wahu oh ke pahn kilang me dahme keieu kesempwal nan kapakapo iei kasarawihlahn mwaren Siohwa, ketidohn sapwellime Wehi oh pweidahn kupwure. (Mad. 6:9, 10) Medewe duwen omw kapakap. E kin kasalehda omw kin nsenohki Wehin Siohwa, en kapwaiada kupwure oh kasarawihlahn mwareo? Omw kapakap kan anahne kasalehda mepwukat.
“Kapwaiada Dahme Ke Inoukihda me Ke Pahn Wia”
12 Ni omw papidaislao, ke inoukihong Siohwa me ke pahn doadoahngki omw mour en papah ih oh wia uwen omw kak en idawehn sapwellime koasoandi kan. Ahpw papidais wiahte tepin kahk. Sangete ahnsowo, kitail koaros anahne pousehlahte kasawih pein kitail. Kitail kak pein idek rehtail: ‘Ia duwen ei nanpwungmwahu rehn Siohwa eh kekeirda sangete ei papidaislao? I kin papahte ih sang ni mohngiongi unsek? (Kol. 3:23) I kin kalapw kapakap? I kin wadek Paipel rahn koaros? I kin kaukaule towehda mihting kan? I kin iang kalohk ahnsou koaros me I kak? De I solahr kin nohn perenki wia mepwukat?’ Wahnpoaron Piter katamankihong kitail me mie keperpen atail kakete sohla papah Siohwa. Kitail kak soikala met ma kitail doadoahk laud en kakairada atail pwoson, loalokong, dadaurete, oh poadidiong Koht.—Wadek 2 Piter 1:5-8.
Ire Kesempwal kan
Peidek Kan Sang Sounwadawad Kan
Eklesiasdes 5:8 kin dokedoke kaun emen me kin kahpwalihala me semwehmwe kan oh sohte mweidohng irail arail pwung. Kaun menet anahne tamataman me mie emen me kin tetehk ih me lapalapasang oh ahneki manaman laudsang ih nan koperment. Ni mehlel, ele mie meteikan me pil lapalapasang. E kansensuwed me nan koperment en aramas akan, kaun akan koaros mwersuwed, oh aramas akan kin wie lokolongki arail kaunda mwersuwed oh sohte pahrek.
Ahpw mendahki ma soahng koaros mwomwen solahr mie koapworopwor, kitail kak ahneki nsenamwahu ni atail ese me Siohwa kin ketin ‘tetehk pil kaun lapalap kan’ nan palien koperment. Kitail kak peki sawas sang rehn Koht oh mweidohng ih atail kahpwal kan. (Mel. 55:22; Pil. 4:6, 7) Kitail ese me Siohwa “kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.”—2 Kron. 16:9.
Eri, Eklesiasdes 5:8 kin katamankihong kitail duwen irair en sampah wet oh me ahnsou koaros mie emen me ahneki manaman me laudsang meteikan. Kesempwal sang met, iren Paipelo kak sewese kitail en medemedewe ire mehlelo me Siohwa iei me keieu ketin ileile, me sapwellimanki manaman me keieu lapalap. Met e ketin wie kakaun sang ni eh ketin doadoahngki sapwellime Ohlo, Sises Krais, Nanmwarki en Wehio. Me Keieu Manamano, Siohwa, me kin ketin tetehk soahng koaros oh pil aramas koaros, kin sapwellimanki pwung pahrek ni unsek, pil duwehte sapwellime Ohlo.
OCTOBER 13-19
SOAHNG KESEMPWAL KAN SANG MAHSEN EN KOHT EKLESIASDES 7-8
“Kohla ni Ihmw Ehu me Nsensuwed en Mehla Mi Ie”
it “Pahtou” par. 9
Pahtou
Ahnsoun Pahtou. Eklesiasdes 3:1, 4 mahsanih me mie “ahnsoun pahtou oh ahnsoun peren; ahnsoun mwahiei oh ahnsoun kahlek.” Pwehki aramas koaros kak mehla, mohngiong en me loalokong men kin mi nan “ihmw ehu me nsensuwed en mehla mi ie,” a kaidehn ni imwen kamadipw ehu. (Ekl 7:2, 4; pil kilang Lep 14:13.) Kahrehda me loalokong men kin isaneki ahnsou mwahu koaros en kasalehda eh kin poakehla meteikan oh kansenamwahwih irail. E sohte kin pohnsehsehla soangen ahnsoun pahtou wet pwehn kolahng wasa kaperen. Met kin sewese en tamatamante me e pil kak mehla oh pwe en kolokolete madamadau pwung ong Sounkapikadao.
Sewese Meteikan en Dadaur Pahn Arail Kapwunod kan
15 William, me eh pwoudo mehla sounpar kei mwoweo, nda: “I kin kalahnganki ni meteikan ar ndaiong ie soahng mwahu kan me re taman duwen ei pwoudo; met kin kamehlelehiong ie me re poakohng oh wauneki ih. Arail wia met kin uhdahn sewese ie laud. Arail lokaia kin uhdahn kansenamwahwih ie, pwehki ei pwoudo uhdahn kesempwal ong ie oh wia kisehn ei mour.” Emen liohdi me adaneki Bianca nda: “I kin diar nsenamwahu ni meteikan ar iang ie kapakap oh ehukihong ie iren Paipel ehu de riau. E kin sawas ni arail koasoia duwen ei pwoudo oh ni arail kin rong ie koasoia duwen ih.”
“Iang Sengiseng Rehn me Kin Sengiseng kan”
16 Atail kapakap kan pil kak sewese riatail Kristian men me pahtoula. Kitail kak kapakapkin ih de pil iang ih kapakap. Mehnda ma e apwal en wia met pwehki ke pehm me ke kakete sengiseng, omw kapakap me kohsang nan omw mohngiong kak uhdahn kansenamwahwihala ih. Dalene nda: “Ekei pak ni sister kan ar kohdo pwehn kansenamwahwih ie, I kin peki ma re pahn kak kapakap. Re kin tepida kapakap, oh kalapw apwalki lokaia nin tapio, ahpw ahnsou koaros, mwurin ahnsou kis, ngilarail ko kin kehlailla oh re kin nda soahng kan me uhdahn kohsang nan mohngiongirail. Arail pwoson laud, arail limpoak, oh pil arail nsenoh kin uhdahn kalaudehla ei pwoson.”
“Iang Sengiseng Rehn me Kin Sengiseng kan”
17 Kitail sohte kak uhdahn ese ia uwen laud en ahnsou me emen anahne pwehn pahtou. Ni emen eh mehla, tohto en kompoakepah oh kiseh kan kin kohla pwehn kansenamwahwih peneinei en me mehlao. Ahpw mwurin koaros pwuralahng dahme re kin wiewia, me pahtoula kan kin anahnehte kamweit. Eri onopada pwehn sawas. “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?” (Lep. Pad. 17:17) Kitail anahne kansenamwahwih me pahtou kan lao re mwahula.—Wadek 1 Deselonika 3:7.
18 Tamataman me emen kakete tepida nsensuwed laud ni soh kasikpe. Met kak wiawi pwehki rahnen kataman ehu, ngilen koul ehu, kilel kan, wiewia ehu, de pil pwohn de ngilen mehkot, de soangen ahnsou ehu erein sounparo. Ni emen me eh pwoudo mehla eh tepida kelehpwla oh wia mehkot, duwehte iang towehda mihting tohrohr, de Kataman, met kak uhdahn kansensuwed. Emen brother nda: “Mwurin ei pwoudo mehla, I medewe me tepin ei pahn kelehpw wia kataman en rahnen at kapwopwoudo pahn uhdahn kansensuwed, oh e apwal. Ahpw ekei riei Kristian ko koasoanehdi me ngehi oh ekei kompoakepahi keren kan sen kohpene oh mwengepene pwe ien dehr kelekelehpw.”
19 Tamataman me irail kan me pahtoula kin anahne kangoang kaidehn ihte ahnsou kei. Junia nda: “Meteikan ar kin kalapw kihda sawas oh kihong ie arail ahnsou, mehnda ma kaidehn rahnen kataman tohrohr ehu, kak sawas laud. Soangen ahnsou pwukat me kin wiawi ni soh kasikpe kin uhdahn kesempwal oh kahrehda nsenamwahu laud.” Ei mehlel, kitail sohte kak kihsang douluhl arail nsensuwed de loaloid, ahpw kitail kak kansenamwahwihala irail sang ni atail wiahda soahng kan ong irail. (1 Sohn 3:18) Gaby nda: “I inenen kalahngankihong Siohwa elder kan me kin kasalehda limpoak ni arail sewese ie nan ei kahpwal ko koaros. Re uhdahn kahrehiong ie en pehm sapwellimen Siohwa limpoak.”
Ire Kesempwal kan
“Pwe Koaros Pahn Esehki me Kumwail Nei Tohnpadahk kan”
18 Ele ekei pak kitail kin pehm me kitail anahne kohla koasoiong riatail Kristian men me kansensuwedihkitailla. Ahpw keieu, e pahn mwahu en pein idek rehtail peidek pwukat: ‘I kin uhdahn wehwehki dahme wiawi?’ (Lep. Pad. 18:13) ‘E songosong en dehr kansensuwedihiehla?’ (Ekl. 7:20) ‘Mie pak I wiahda soangen sapwungohte?’ (Ekl. 7:21, 22) ‘Ma I koasoiaiong aramaso duwen met, e sou pahn pil kalaudehla kahpwalo?’ (Wadek Lepin Padahk 26:20.) Ni atail kin uhdi oh medemedewe soangen peidek pwukat, ele kitail pahn wehwehkihda me limpoak kak kamwakid kitail en uhdihsang medemedewe dahme wiawi.
OCTOBER 20-26
SOAHNG KESEMPWAL KAN SANG MAHSEN EN KOHT EKLESIASDES 9-10
Ahneki Madamadau Pwung Duwen Omw Kahpwal kan
Dehr “Kaulimehki” Siohwa
20 Tamataman uhdahn kahrepen atail kahpwal kan. Kitail anahne pohnese me kitail me pein kahrehda ekei atail kahpwal kan. (Kal. 6:7) Kitail en dehr kapwukoahki Siohwa atail kahpwal kan. Dahme kahrehda? Medewehla karasaras wet: Dahme kak wiawi ma emen tangahki sidohsa uhdahn uk nan wet keper ehu? E kak kauwehla were sidohsao. Ia duwe, sountangahki sidohsao pahn kapwukoahki wasa me wiahda sidohsao? Uhdahn soh! Pil duwehte, Siohwa ketikihong kitail saledek en pein wiahda atail pilipil kan. Ahpw e pil ketin padahkihong kitail ia duwen atail pahn wiahda pilipil mwahu kan. Eri kitail en dehr kapwukoahki Siohwa ma kitail wiahda sapwung kan.
21 Ahpw kaidehn atail kahpwal kan koaros kin kohsang wiewia sapwung kan. Soahng kei kin wiawi pwehki “paisuwed kin lelohng aramas koaruhsie.” (Ekl. 9:11) Kitail en pil dehr manokehla me Sehdan me Tepil iei me kin kahrehda me suwed kan nan sampah. (1 Sohn 5:19; Kaud. 12:9) Sehdan me iei imwintihtio, kaidehn Siohwa!—1 Pit. 5:8.
Siohwa Ketin Kesempwalki Sapwellime Ladu Aktikitik kan
10 Aktikitik pil kin kahrehda atail mour en sohte nohn apwal. Ei mehlel, kitail kin kilang soahng kan me sohte mwomwen pwung de pahrek. Ohl loalokongo, Nanmwarki Solomon, pohnese duwen met oh nda: “I kilangehr lidu kan ar dak oahs, a soupeidi kan alialu duwehte lidu kei.” (Ekl. 10:7) Ekei pak, aramas akan me inenen koahiek sohte kin alehdi kaping de wahu. Oh irail kan me sohte nohn koahiek kin alehdi wahu laud. Ahpw Solomon pohnese me e wia elen loalokong kitail en mendahkihla met oh dehr lingeringerki duwen mwomwen mour. (Ekl. 6:9) Ma kitail aktikitik, kitail pahn diar me e mengei en mendahkihla soahng kan nan mour me kitail sohte pwungki.
Omw Mehn Kamweit oh Mwadong Kin Wia Kamwahu ong Uhk?
PAIPEL kawehwehda mwahu me Siohwa ketin kupwurki kitail en perenki atail mour. Karasepe, Melkahka 104:14, 15 mahsanih me Siohwa ketin wiahda “wahntuhke oh werentuhke, pwe aramas en kin kakairada wahnsahpw, oh kapwarehda wain mehn kaparanda nan kapehde, lehn olip mehn kansenamwahwihada, oh pilawa mehn kakehlahda paliwere.” Siohwa me ketikihong kitail mwenge me kitail anahne pwe kitail en mour. E ketin kawosada wahnsahpw akan pwe en mie pilawa, leh, oh wain ong kitail. Mendahki kitail sohte anahne wain pwe kitail en mour, e kak ‘kaparanda nan kapehdatail.’ (Ekl. 9:7; 10:19 a) Siohwa ketin kupwurki kitail en peren. E ketin kupwurki mohngiongitail kan en audaudkihda “peren.”—Wiewia 14:16, 17.
2 Eri kitail en dehr medewe me e sapwung kitail en doadoahngki atail ahnsou ong “tehk mwahu menpihr en pahnlahng kan” oh “kilang kiopw en nansapw akan.” Soahng pwukat pahn kak kakehlaka oh kalaudehla atail peren. (Mad. 6:26, 28; Mel. 8:3, 4) Mour nsenamwahu oh ahneki roson mwahu iei “kalahngan en Koht.” (Ekl. 3:12, 13) Atail ahnsou me kitail kin doadoahngki ong mwadong wia kisehn kisakis me Koht ketikihong kitail. Eri kitail anahne doadoahngki met ni ahl ehu me pahn kaperenda Koht.
Ire Kesempwal kan
it “Koasoia Meteikan, Karaunlikamw” par. 4, 8
Koasoia Meteikan, Karaunlikamw
En koasoia duwen meteikan kak wiahla karaunlikamw, oh met pahn kahrehiong sounkaraunlikamwo nan kahpwal laud. E uhdahn sansal erpit en mahsen ko me ntingdi nan Eklesiasdes 10:12-14: “Pweipwei men kin pein ohkihla eh koasoi. E kin tepikihda koasoi en pweipwei oh imwikihla iahk. Pweipwei men kin koasoakoasoi sohte tokedi.”
Mendahki en koasoia duwen meteikan kakete sohte suwed (ahpw e kak kahrehda de wiahla karaunlikamw duwen meteikan), ahpw en wiahda karaunlikamw duwen meteikan kin ahnsou koaros wiahda kahpwal oh kamedekihala meteikan oh kahrehda kahpwal nanpwungen aramas. Ele kahrepe suwed me kamwakid emen en wiahda karaunlikamwo de mwein kaidehn. Sohte lipilipil dahme kamwakid ih, me wiahda karaunlikamwo kin kihong pein ih nan irair suwed ehu mwohn silangin Koht, pwe ehu tiahk me Koht kin ketin kalahdeki iei ni emen eh “kin kahrehda kahpwal nanpwungen irail kan me limpoakpene.” (Lep 6:16-19) Lepin lokaiahn Krihs ong “sounkaraun” oh “sounkedip” iei di·aʹbo·los. Nan Paipel, lepin lokaia wet pil kin kadoadoahk ni eh kamwarenki Sehdan “Tepil,” sounkaraun lapalap me kin wiahda karaunlikamw duwen Koht. (Soh 8:43; Kau 12:8; Sen 3:1) Met kasalehda ia wasa me karaunlikamw wet tepisang ie.
OCTOBER 27–NOVEMBER 2
SOAHNG KESEMPWAL KAN SANG MAHSEN EN KOHT EKLESIASDES 11-12
Mour Roson oh Nsenamwahu
g 3/15 13 par. 6-7
Ahng Mwahu oh Karakar en Ketipin—Rasehng “Weliepen Dok”?
Karakar en ketipin kin pil mwahu ong kemehla mwahs. Pwuhk me adaneki Journal of Hospital Infection kawehwehda me “pali laud en mwahs kan nan wehwe me kin kahrehda paiking sohte kakohng karakar en ketipin.”
Ia duwen omw pahn kak paiekihda met? Ele ke pahn men kohieila liki, wasa ke pahn kak mi pahn marain en ketipin oh esingengki ahng mwahu erein ahnsou kis me pahn konehng. Met pahn mwahu ong uhk.
Kesempwalki Sapwellimen Koht Kisakis en Mour
6 Mendahki Paipel kaidehn pwuhk ehu duwen palien roson, e kin kasalehda sapwellimen Siohwa madamadau ong ire pwukat. Karasepe, e ketin kangoange kitail en ‘dehr mweidohng mehkot en . . . kamedekeikitailla.’ (Ekl. 11:10) Paipel mahsanih me kitail en dehr kin kapehden mwenge oh kamamsakau. Soahng pwukat kin kauwehla atail roson oh pil kemeikitailla. (Lep. Pad. 23:20, 21) Siohwa ketin kasik kitail en kaunda pein kitail ni atail kin pilada ia uwen laud me kitail pahn kang de nim.—1 Kor. 6:12; 9:25.
7 Kitail kak wiahda pilipil kan me kasalehda atail kin uhdahn kalahnganki sapwellimen Koht kisakis en mour sang ni atail kin doadoahngki atail koahiek en madamadau. (Mel. 119:99, 100; wadek Lepin Padahk 2:11.) Karasepe, kitail kin kasalehda koahiek en madamadau me pid dahme kitail pahn kang. Ma kitail perenki soangen mwenge ehu ahpw kitail ese me kitail kin soumwahukihda, kitail kin kanahieng pwe kitail en dehr kang. Kitail pil kin kasalehda koahiek en madamadau ma kitail meir mwahu, kaukaule eksersais, oh nantihong pwe paliwaratail oh imwatail en kin mwakelekel.
“Kumwail en Peikiong Mahseno Ahnsou Koaros”
2 Nin duwen sapwellimen Siohwa tohnkaudok kei, kitail wia aramas kei me peren. Dahme kahrehda? Mie kahrepe tohto me kitail ahneki, ahpw ehu kahrepe kesempwal iei me kitail kin kaukaule wadek Mahsen en Koht oh nantihong kapwaiada dahme kitail sukuhlki.—Wadek Seims 1: 22-25.
3 Mie ekei ahl me kitail kin paiekihda atail “peikiong mahseno ahnsou koaros.” Keieu, kitail ese me met iei ehu kahk kesempwal pwe kitail en kaperenda Siohwa. Atail ese met kin kahrehiong kitail en peren. (Ekl. 12:13) Oh pil ni atail kin idawehn kaweid me mi nan Mahsen en Koht, kitail kin kamwahwihala atail nanpwungmwahu rehn irail kan nan atail peneinei oh nan atail mwomwohdiso. Ele met wiawihong uhk. Patehng met, kitail kin soikala kahpwal tohto me kin lelohng irail kan me sohte kin idawehn sapwellimen Siohwa kehkehlik kan. Ih met me Nanmwarki Depit koasoia. Mwurin eh koasoia sapwellimen Siohwa kosonned kan, koasoandi kan, oh kadeik kan nan eh koulo, e koasoia: “I kin ale ketingpen ei kin peikiong sapwellimomwi mahsen kan.”—Mel. 19: 7-11.
Ire Kesempwal kan
it Mwekidki “Sapwellimen Koht Manaman” par. 10
Mwekidki Sapwellimen Koht Manaman
Ahpw mehn kadehde kan kasalehda me ohl kan me Koht ketin doadoahngki pwehn ntingihedi Nting Sarawi kan kaidehn ohl kei me rasehng robot me kin ntingihdihte dahme re rong. Koht ketin “peukohng” Kaudiahl ehu nan en wahnpoaron Sohn eh madamadau. Paipel kasalehda me e ketin wia met sang ni eh ketin doadoahngki tohnleng men me kasalehiong Sohn “kilel kan,” oh mwuri Sohn ahpw “kadehdehda mahsen me Koht ketikihda oh mehn kadehde me Sises Krais ketikihda, ei, soahng koaros me e kilangehr.” (Kau 1:1, 2) “Sapwellimen Koht manaman” me wahla Sohn “ni rahnen Kauno” oh e rongada ngihl ehu me mahsanihong: “Ntingihedi nan pwuhk ehu dahme ke kilang.” (Kau 1:10, 11) Eri Koht ketin kilang me e mwahu en mweidohng sounnting en Paipel kan ren doadoahngki arail madamadau pwehn pilada lepin lokaia kan de soangen koasoi kan en kawehwehda kaudiahl kan me re kilang (Apa 2:2), ahpw ni ahnsowohte e pil kin ketin kahluwa oh kaweid irail pwe imwin arail doadoahk en kak pwung oh mehlel oh pil pahrekiong kupwure. (Lep 30:5, 6) En sounnting ko arail kin nanti sansalda nan ire me kileldi nan Eklesiasdes 12:9, 10, me kasalehda me re kin medemedewe, wia roporop, oh koasoanehdi mwahu pwehn kasalehda ni ahl me konehng “koasoi kansenamwahu kan” oh “mahsen kan me e ntingihadahr me mehlel.”—Pil kilang Lu 1:1-4.