Irail Kehn Limpoak en Mwomwohdiso

YOMARA oh rie pwutak ko—Marcelo oh Hiver—kin kousoan nan kisin kahnimw ehu nan Guatemala. Yomara tepida onop Paipel rehn Sounkadehde kan, oh kedekedeo rie pwutak ko pil tepida onop. Ahpw mie kahpwal ehu. Irail pirien silimeno koaros maskun, oh sohte kak wadek pwuhk kan ong aramas maskun (braille). Eri arail sounpadahk en Paipelo kin wadek parakrap ko oh iren Paipel kan me mi nan mehn kasukuhlo.

E pil kin apwal ong irail en iang towehda mihting kan. Irail sohte kak kelehpw kohla ni Wasahn Kaudok me keieu keren. Ahpw brother kan nan mwomwohdisou sewese irail en iang towehda mihting koaros. Oh ni pirien ko ar tepida iang wia padahk nan mihting en wihk, brother kan sewese irail en wadlikihla arail padahk ko.

Nan May 2019, mihting en mwomwohdiso tepida wiawi nan arail wasao. Ni ahnsowo, pwopwoud ehu me kin pioneer keseulahr nan kahnimwo. Ira sohte ese wadek oh ntingih braille, ahpw ira men sewese pirien silimeno en ese ia duwen arail kak wia met. Ira kin kohla ni library ehu oh ale pwuhk kan duwen braille pwe ira en esehla ia duwen ara kak padahkihong meteikan.

Mwurin sounpwong kei, pirien silimeno kakehr mengeiki wadek braille, oh met kahrehiong irail en kakairada nanpwungmwahu rehn Siohwa.a Met Yomara, Marcelo, oh Hiver kin pioneer. Marcelo wia sounsawas men. Irail kin uhdahn kedirepwki papah Siohwa. Irail uhdahn ngoangki papah Siohwa me kahrehda irail kan me irail kin patehng pil kin tepida ngoang.

Pirien silimeno kalahnganki sawas en limpoak me irail alehdi sang mwomwohdiso. Yomara nda: “Sangete ahnsou me se tepin tuhwong Sounkadehde kan, irail kasalehiongkitehr limpoak en Kristian mehlel.” Marcelo pil nda: “Mie kompoakepaht mwahu kan nan at mwomwohdiso, oh mie at peneinei nan sampah pwon me kin miniminpene.” Yomara oh rie pwutak ko kasikasik en kilang ia duwen Siohwa eh pahn ketin wiahiong sampah en wiahla paradais ehu.—Mel. 37:10, 11; Ais. 35:5.