Ke Kin Ese Duwen Met?
Dahme kahrehda ohl kan me kaidehn mehn Israel kin iang nein Nanmwarki Depit sounpei kan?
IRAIL pwukat me kaidehn mehn Israel me iang nein Depit sounpei kan iei Selek mehn Amon, Uraia mehn Id, oh Idma mehn Mohap.a (1 Kron. 11:39, 41, 46) “Mehn Kered oh mehn Peled ko” oh mehn Kad pil iang nein Depit sounpei kan. (2 Sam. 15:18) Mehn Kad kan iei mehn Pilisdia kei oh e mwomwen me mehn Kered oh Peled kan wia kisehn mehn Pilisdia.—Esek. 25:16; Sos. 13:2, 3; 1 Sam. 6:17, 18.
Dahme kahrehda Depit mweidohng ohl pwukat en iang nah sounpei kan? E kamehlele me irail kin loalopwoat ong ih, oh kesempwal sang met, ong Siohwa. Karasepe, ehu dikseneri en Paipel koasoiahki mehn Kered kan oh mehn Peled kan: “Nan irair me keieu apwal irail kin loalopwoatohngete Depit erein eh wia nanmwarki.” (The New Interpreter’s Dictionary of the Bible) Ia duwen? Ni ahnsou me “ohlen Israel koaros” kohkohsang Nanmwarki Depit oh idawehnla “Sipa . . . me kin wiahda kahpwal,” mehn Kered oh mehn Peled kan loalopwoatohngete Depit oh sewese kauhdi uhwong me Sipa tapiada. (2 Sam. 20:1, 2, 7, NW) Pil ehu ahnsou, nein Nanmwarki Depit pwutako, Adonaisa, song en wiahla nanmwarki ah kaidehn Solomon. Mehn Kered oh mehn Peled kan loalopwoatohngete Depit oh sewese Solomon en wiahla nanmwarki pwehki ih me Siohwa ketin idihada.—1 Nan. 1:24-27, 38, 39.
Pil emen ohl me uhdahn loalopwoatohng Depit iei Idai mehn Kad. Idai oh nah sounpei 600 ko sewese Nanmwarki Depit ni ahnsou me nah pwutako Apsalom pelianda oh kahrehiong ohlen Israel ko en uhwongada nanmwarkio. Depit ndaiong Idai me pwehki kaidehn ih uhdahn mehn Israel men, e sohte anahne peiki ih. Ahpw Idai sapengki: “Maing, Wasa Lapalap, ni mwaren KAUN-O I patohwan kahukihong komwi me I pahn patohwan iangkomwihla ahnsou koaros wasa koaros sohte lipilipil me komw pahn ketila ie, mehnda ma pil ketilahng pwoula ieu.”—2 Sam. 15:6, 18-21.
Idai kin loalopwoatohng Depit me Siohwa ketin idihada ong nanmwarki
Mendahki mehn Kered, mehn Peled, oh mehn Kad ko kaidehn mehn Israel kei, irail pohnese me Siohwa iei Koht mehlelo, oh me ketin idihada Depit. Ia uwen Depit eh kalahnganki me ohl loalopwoat pwukat kin utung ih!
a Sapwellimen Koht kosonned me mi nan Deuderonomi 23:3-6 sohte mweidada mehn Amon kan oh mehn Mohap kan en pedolong nan mwomwohdiso en mehn Israel. Mwomwen me met wehwehki me irail sohte kak wiahla towe mehlel en Israel nin duwen kosonned, ahpw mehn Amon oh Mohap kan kak werekiong oh kousoan rehn mehn Israel kan ma re iang kaudok mehlel. Menlau kilang Insight on the Scriptures, Volume 1, pali 95.