AI (Artificial Intelligence)—E Pahn Mwahu de Suwed ong Kitail?—Dahme Paipel Mahsanih?

Me keren, kaunen wehi kan, saintis kan oh sounwia misihn koahiek kan koasoia duwen AI (artificial intelligence).a Mendahki ar pohnese me mie kamwahupe, ahpw re pil pwunodki me aramas kakete doadoahngki met ni ahl sapwung.

•  “AI iang kisehn misihn me keieu kehlail rahnpwukat, me kakete kamwahwihala mouren aramas . . . Ahpw ni ahnsowohte, AI kakete katikala atail onepek, kihsang ekei atail pwuhng oh privacy, oh kahrehiong kitail en apwalki likih koperment kan.”—Kamala Harris, vice president en United States, May 4, 2023.

•  “Mendahki AI kakete kamwahwihala epwelpen roson ni soahng teikan, e pil kakete suwediong atail roson en war oh pepehm kan ni soangen mwohmw teikan,” pwihnen toahkte kei oh semen kan en palien roson me Dr. Frederik Federspiel kahmwowe ntingihdi nan ire ieu me wiawihda May 9, 2023, nan BMJ Global Health.b

•  “Aramas kakehr doadoahngki AI pwehn kihpeseng soahng likamw kan. Ni ahnsou keren, AI kakete kihsang en aramas akan doadoahk. Ekei aramas akan me kin doadoahk nan palien misihn kan kin uhdahn pwunodki me ni ahnsou kohkohdo AI pahn kakete keper ong aramas.”—The New York Times, May 1, 2023.

Ahnsou kei sang met, e pahn sansalda ma aramas pahn doadoahngki AI pwehn wia kamwahu de suwed ong aramas. Dahme Paipel mahsanih?

Dahme kahrehda en aramas nanti sohte kin pweida ahnsou koaros

Paipel kasalehda dahme kahrehda aramas sohte kak wiahiong technology kapw kan me re wiahda en kin kadoadoahk ongete mehkot mwahu.

1. 1. Mehnda ma aramas kin wia mehkot ong kahrepe mwahu, re sohte kak kilang imwila suwed en ar mwekid kan.

   •  “Ahl me ke lemeleme me iei ahl en pwung, kakete kahluwaiukalahng mehla.”—Lepin Padahk 14:12.

2. 2. Aramas emen sohte kak kaunda meteikan duwen ar pahn doadoahngki dahme e wiahda.

   •  “Mehkoaros me I koadoahkihada wia mehkot me sohte katepe ong ie, pwehki I ese me I pahn uhd kihong irail kan me pahn uhd wilianiehdi; eri, mweinele e pahn kupwurokong, de e pahn pweipwei—ihs me ese? Ahpw e pahn sapwellimankihla mehkoaros me I koadoahkihadahr, mehkoaros me ei loalokong wiadahr nin sampah wet.”—Eklesiasdes 2:18, 19.

Soahng pwukat kin kasalehda kahrepen atail anahne kaweid sang Sounkapikpatailo.

Dahme kitail kak kamehlele

Sounkapikpatailo ketin inoukihda me e sohte pahn ketin mweidohng aramas emen de technology me aramas wiahda en kauwehla sampah de aramas akan.

•  “Sampah duweduwehte.”—Eklesiasdes 1:4.

•  “Me pwung kan pahn koukousoan nan sahpwo oh re pahn sapwenikihla kohkohlahte.”—Melkahka 37:29.

Sounkapikpatailo kin ketikihong kitail kaweid sang nan Paipel me pahn kahluweikitaillahng mour popohl oh nsenamwahu. Pwehn kalaudehla omw ese dahme Paipel mahsanih, menlau wadek oaralap “Mie Kaweid Likilik ong Mour Mwahu ni Ahnsou Kohkohdo?” oh “A Real Hope for a Better Tomorrow.”