Kahpwal en Sakau en Wai nan Peneinei

“Mendahki emente tohnpeneinei kin ahneki kahpwal en nim sakau en wai, ahpw tohnpeneinei pwon kin apwalkihda.”—Dr. Vernon E. Johnson.

ALICE me sounpar limau wonohn pohn lohso oh kin medemedengki neho. Rahn riau mwowe, neho ohla oh eri anahne sement. Ahpw ahnsou me re kihong sement ni neho, e nohk itla me kahrehiong neho en mpwosada. Alice kin peki rehn eh pahpa oh nohno en wahla ih rehn toahkte, ahpw eh pahpao ohn sakau, oh eh nohno sehsehla ihs me e pahn anahne apwalih mahs.

Rahn kei mwuri, nehn Aliceo ketiketla. Mie pile me toantoal me tepida keredi sang ni sendin neh ko. Eri eh pahpa oh nohno tangahkihla ih ni imwen wini. Ni ahnsou me re kihsang semento, ohlahn neho kahrehda emen nurse en lipwongmaskihla. Neho kensla kahrehda e anahne en lopula.

Kahpwal en Sakau en Wai oh Meteikan me Apwalkihda

Kahpwalo sohte kin pidadahte lopula en neho. En Alice pahpao kin ahneki kahpwal en nim sakau en wai. Pwehki met, e sohte kak apwalih nah serepeino ni ahnsou me e uhdahn anahne eh sawas. Emen sounkaweid me adaneki Toby Rice Drews koasoia: “Kahpwal en sakau en wai kin kahrehiong emen en nsenohkihte pein eh ineng en sakau laud sang anahn en eh peneinei.”

Ahpw ia duwen en Alice nohno? E pil iang pidada kahpwal wet. Pein ih sohte kin ahneki kahpwal en nim sakau en wai, ahpw e kin anahne apwalih eh pwoud me kin ahneki kahpwal wet. Pali laud en ahnsou, emen me pwoudiki aramas me kin ahneki kahpwal en sakau en wai kin nannanti en sewese eh pwoud en dehier nim sakau en wai de pil soahng kan me e kin wia. E kin nohn nsenohki kahpwalo kahrehda met pil kin kamwakid eh wiewia kan en duwehla eh pwoud mendahki pein ih sohte kin nim sakau en wai. Ihme kahrehda aramas akan me duwehte en Alice nohno pil kin iang pidada kahpwal en sakau en wai.

Me kin ahneki kahpwal en nim sakau en wai oh eh pwoud me iang pidada kahpwalo kin mweidohng sakau en kaunda ira. Ira sohte men nda me re ahneki kahpwal wet. Ira sohte kin apwalih mwahu neira seri kan. Ira kin ahneki kapwunod kan. Me kin ahneki kahpwal en nim sakau en wai sohte kak uhdi sang eh nim sakau en wai. Me sohte kin ahneki kahpwal wet pil sohte kak kauhdi eh pwoud, oh ira koaros sohte kak apwalih kahpwalo me kin lelohng neira seri kan.

Ahpw mie sawas ong me kin ahneki kahpwal en nim sakau en wai oh pil eh peneinei. Kitail pahn tehkpene ire wet nan irelaud kan en mwuhr nan makasihn wet.a

[Nting tikitik me mi pah]