Emen Kak Powehdi Kahpwal Wet
“Mie atail pilipil. Sohla kang sakau en wai oh mwahula, de kangkangte lao kitail mehkihla.”—Emen me powehdi kahpwal en sakau en wai koasoia met.
NNA medewehla me ke pwourda ni lukepenpwong oh diarada me imwomwo lulda. Sawas mwadang leledo oh kisinieio kunla. Eri ia duwe, ke kak pwurala nan ihmwo oh mwomwehda me sohte mehkot wiawi? Uhdahn soh. Ihmwo ohla oh anahne onohnsapahlda pwe ken kak pwurehng kousoan loale.
Irair ehu me duwehte met kin wiawi ni ahnsou me emen me ahneki kahpwal en sakau en wai tepida nantihong en powehdi eh kahpwalo. Eh mour kin suwed erein sounpar tohto pwehki sakau en wai. Met e solahr kin kang sakau en wai. Ni karasaras, “kisinieio” kunla, ahpw e anahne onehda sapahl eh madamadau, mwomwen eh mour oh eh tiahk kan pwehn dehr pwurehng tepida kang sakau en wai. Kaweid kan me pahn kohda kak sewese emen me ahneki kahpwal wet en sohla douluhl kang sakau en wai.
1. Esehla Omw Imwintihti
Paipel mahsanih me ineng suwed kan kin “pelipelian” kitail ahnsou koaros. (1 Piter 2:11) Lepin lokaiahn Krihk me kawehwehdi ong “pelipelian” kin wehwehki “en wia doadoahk en sounpei,” oh met kin pid mahwen kehlail ehu.—Pil kilang Rom 7:23-25.
Sounpei mwahu men kin doadoahngki ahnsou laud pwehn esehla wiepe kan me eh imwintihti kan kin doadoahngki. Duwehte met, emen me ahneki kahpwal en sakau en wai anahne esehla eh kahpwalo oh ia duwen kahpwalo kin kauwehla pein ih oh kompoakepah kan.—Ipru 5:14.
2. Wekidala Omw Madamadau
Emen toahkte koasoia: “En kesehla sakau en wai kin pil pid kesehla eh mwekid kan me duwehte tiahk en seri.” Met wehwehki me ke anahne wia laud sang en kesehla sakau en wai; omw madamadau pil anahne en wekila.
Paipel mahsanih: “Mweidohng Koht en ketin kawiliakapwala loalamwail kan unsek.” (Rom 12:2) “Kumwail pwilikidier mour mering en mahso iangahki eh wiewia kan.” (Kolose 3:9) Ma omw wiewia kan wekila ahpw omw madamadau kin duduwehte, ke pahn ahneki pil ehu kahpwal de ke pahn pwurehng pwuralahng omw kahpwal en mahs.
3. Ahneki Kompoakepahmw Mwahu Men
Lepin Padahk en Paipel mahsanih: “Aramas me sohte kin men patehng meteikan kin nsenohkihte pein irail; re kin sapwungki mehkoaros me aramas koaros ese me pwung.” (Lepin Padahk 18:1) Pil ni ahnsou me e sohte kin kang sakau en wai, emen me kin ahneki kahpwal wet kak nda me mie kahrepe mwahu ong ih en kang sakau. Kahrehda, e anahne ahneki kompoakepah men me kin wehwehki ih oh kak kaweidih ih. E pahn wia sawas laud ma kompoakepah menet pil kin iang kahpwal en sakau en wai mahs ahpw powehdier kahpwalo. (Pil kilang Lepin Padahk 27:17) Kompoakepah menet anahne wauneki eh pelien lamalam oh perenki wia tounmetei oh kak kaukaule sewese ih.—Lepin Padahk 17:17.
4. En Kanengamah
Emen me ahneki kahpwal wet kin ekisekis mwahula. E anahne ahnsou laud pwehn onehda sapahl eh mour. Mwein mie kahpwal en mwohni, doadoahk oh peneinei. En kesehla sakau en wai sohte wehwehki me e sohla kak lelohng kahpwal kan. Emen me kin nannanti en powehdi kahpwal wet kak pwunodki ia duwen e kak mour ma e sohte pahn kang sakau. Ma e pehm me eh kapwunod kan pahn powehdi ih, e kak tamanda mahsen kan en sounmelkahka menet: “Mweidohng KAUN-O omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.”—Melkahka 55:22.
5. Patehng Werek Mwahu kan
Emen me ahneki kahpwal wet anahne idek reh: ‘Ia duwe, iengei kan kin sewese ie en kesehla sakau en wai de re kin kalapw koasoia duwen ahnsou me se kin kalapw kang sakau en wai mahs?’ Lepin Padahk 18:24 mahsanih: “Ekei kompoakepah sohte kin poakpene ahnsou werei, ahpw ekei kin loalopwoatpene laudsang pirien kan.” Ke anahne ese ihs kompoakepahmw mehlel kan oh ihs me pahn wia werek suwed.
6. Dehr Medewe me Ke Sohte Kak Lohdi
“I nsenamwahula pwe I sohla kin men kang sakau!” Ma emen me kin ahneki kahpwal wet nda met, e kin kasalehda me e sohte wehwehki me e kakete pwurehng lohdi. Pepehm wet kin wiawi ni ahnsou me e tepida mwahula, ahpw met sohte wehwehki me e uhdahn powehdier. Ehu pwuhk kihda kaweid wet: “Ke anahne ahneki madamadau pwung. Ma ke sohte pahn wia met, ke pahn pwurehng pwupwudi, e duwehte ma ke pwupwudi sang nan depwek.”(Willpower’s Not Enough)—Pil kilang Lepin Padahk 16:18.
7. Dehr Tepida Alehda Pil Ehu Kahpwal
Me tohto kin kesehla sakau en wai, ahpw re kin tepida mwenge nohn laud, de nohn doadoahk laud, de iang pilein mwohni, de soahng teikan. Emen me kin nannanti en powehdi eh kahpwalo kak nda, ‘Dahme sapwung. I sohla kin kang sakau.’ Mehlel e sohte sapwung en iang wiewia kan me kak sewese ih. Ahpw ma e pahn doadoahngki mehkot de wiewia ehu pwehn ahneki nsenamwahu duwehte ahnsou me e sakaula, met sohte kak kihong ih nsenamwahu mehlel.
8. Ahnla Pwukoa Kapw nan Peneinei
Aramas tohto me kin ahneki kahpwal wet sohla kin nannanti ni ahnsou me arail kahpwal kin tepida mwamwahula! Pwekida? Pwehki en sohte kang sakau en wai kin wia mehkot kapw. Mwein e men pwuralahng eh mouren mahs. Oh pil ni ahnsou me e sohla kin kang sakau, met kin kamwakid eh peneinei pwon. Kahrehda, emenemen tohnpeneinei anahne kawekila arail pwukoa kan. Ehu pwuhk koasoia: “Peneinei pwon anahne kesehla arail mouren mahs oh uhd wiahda arail mour kapw.” (Recovery for the Whole Family) Ihme kahrehda en powehdi kahpwal wet kin wia pwukoa en peneinei pwon.—Pil kilang 1 Korint 12:26.
9. Kanaiehng en Dehr Pwurehng Lohdi
En medewe me e sohla pahn kak lohdi, werek suwed, iang pil ehu kahpwal oh en kelekelehpwla kak kahrehiong emen en pwurehng lohdi. En kaukaule koasoiong kompoakepah mehlel men kak wia sawas.
Emen me kin nannanti en powehdi kahpwal wet koasoia: “Koaros me ahneki kahpwal en sakau en wai pahn uhdihsang kang sakau. Ekei kak wia met mwohn re mehla.”
[Kawehwehpen kilel kan nan ehu ehu pali 30]
Ma E Uhdahn Anahne Wini kan
Wini kan me doalki sakau en wai kak kahrehda ineng en kang sakau en wai en pwurehng kohda oh kahrehiong ih en lohdi. Paliweren emen me ahneki kahpwal wet kin mengei en litepwki wini en kameir koaros. Ma e uhdahn anahne soangen wini pwukat, e anahne en wia soahng pwukat . . .
1. tuhwong toahkte pwehn tehk ma wini ko pahn keper.
2. padahkihong kompoakepah men me e kin likih ahnsou me e pahn doadoahngki.
3. ntingihdi ehuehu ahnsou me e kin doadoahngki wini ko.
4. mwadang uhdihsang doadoahngki wini ko.
5. mwurin eh kanekehla uwen wini kan me konehng, kesehla luhwen wini ko.