Ia Duwen Tohnpeneinei Kak Sawas?

“Ma aramas emen pahn tepida nim ekis sakau, e pahn men pwurehng nim, oh sakau pahn powehdi ih.”—Lepin padahk sang nan ehu sahpw nan Eisia.

KAHPWAL en sakau en wai kin powehdi peneinei pwon. Emen me pwoudiki aramas me kin ahneki kahpwal en nim sakau en wai kin nantihong en wekidala eh pwoud. Limpoak kin kamwakid liho en lipwore eh pwoud oh nda me e pahn mweisang ih ma e sohte wekila, ahpw e kin kangkang sakau. E kin ekihla nime sakau ko, ahpw e pil kin pwainda ekei. E kin ekihla nah mwohni ko, ahpw e kin peki rehn ienge ko. E kin ndaiong ohlo, “Ke sou kin poakohng omw peneinei, omw mour, oh Koht?” Ahpw met sohte wia sawas. E kin kalaudehla eh nantihong sewese ih, ahpw kahpwalo kin lalaudla oh powehdi peneinei pwon. Pwehn sewese emen me ahneki kahpwal en nim sakau en wai, tohnpeneinei anahne wehwehki kahpwal wet. Irail anahne ese dahme kahrehda ekei wiepe kan pahn kakete sohte sawas, oh re pil anahne esehla wiepe teikan me kak sawas.

Kahpwal en sakau en wai sohte kin pidadahte en sakaula. E kin wia soumwahu ehu me aramaso kin medemedewehte en kin nim sakau ahnsou koaros oh pil apwalki en powehdi eh ineng. Mendahki sounkaweid kan kin pwungki me soumwahu wet sohte kak mwahula, aramas kak powehdi kahpwal wet ma re pahn liksang douluhl en nim sakau en wai.—Pil kilang Madiu 5:29.

Kahpwal en sakau en wai duwehte soumwahu en suke. Mendahki me kin ahneki soumwahu wet sohte kak wekidala eh soumwahuo, ahpw e kak apwalih paliwereo ni eh sohla pahn kang suke. Duwehte met, me ahneki kahpwal en nim sakau en wai sohte kak kamwahwihala eh soumwahuo, ahpw e kak apwalih eh kahpwalo ni eh pahn solahr douluhl en nim sakau en wai.

Met kin mengei en nda ahpw apwal en kapwaiada. Me kin ahneki kahpwal wet kin kalapw nda me re sohte kin ahneki soumwahu wet. Re kin nda, ‘I sohte kin apwalki duwehte meteikan,’ ‘Ei peneinei kin kahrehiong ie en kang sakau,’ ‘Ei kaunen doadoahk me kin kahrehiong ie en kang sakau.’ Kahrepe pwukat kin kalapw kahrehiong eh peneinei en pwungkihla ih. Re pil kin koasoia, ‘Amwail pahpao anahne sakau mwurin doadoahk,’ ‘E kin anahne sakau pwehki e kin pwangahkihda rong lipahned sang at nohno.’ Re sohte kin koasoia me arail pahpao ahneki soumwahu en sakau en wai. Emen toahkte me adaneki Susan Forward koasoia: “Ihte ahl me re kak kousoankipene iei en kin doadoahngki likamw de kahrepe teikan, oh kin ekihla dahme kin uhdahn wiawi.”

Tohnpeneineio sohte kak sewese me ahneki kahpwal en sakau en wai ma pein irail mi nan kahpwalo. Ekei pahn nda, ‘Kaidehn ngehi me anahne sawas!’ Ahpw medewehla duwen met: Wiewia kan en me ahneki kahpwal en nim sakau en wai kin kalapw kamwakid omw pepehm oh wiewia kan? Pak depe eh wiewia kan kin kahrehiong uhk en mwakarada, pwunodada, oh masepwehkada? Pak depe ke anahne apwalih me sakauo oh sohte kak wia soahng teikan me kesempwal ong uhk? Ma tohnpeneinei me sohte ahneki soumwahu en sakau pahn tepida kamwahwihala arail mour, met pahn kamwakid me ahneki soumwahuo en pil wia duwehte.

Dehr kapwukoahkin uhk. Aramas me ahneki kahpwal en sakau en wai kin kak koasoia, ‘Ma ke mwahu ong ie, I solahr pahn sakau.’ Sounkaweid Toby Rice Drews koasoia: “Me ahneki soumwahu en sakau kin anahne ken kamehlele met pwe e kak kapwukoahkin uhk eh soumwahuo.” Me ahneki soumwahuo anahne meteikan en kamehlele dahme e kin nda. Tohnpeneineio kakete kalaudehla eh soumwahuo ma re kin iang kamehlele dahme e kin nda.

Lepin padahk en Paipel me pid mwadang en lingeringer kak sewese aramas me ahneki kahpwal wet. E mahsanih: “Ma mie emen me kin mwadang en lingeringer oh sehse kanengamah, en pein pwukoahki wahn eh sehse kanengamah.” (Lepin Padahk 19:19) Ei, mweidohng ih en pein kawehwehiong eh kaunen doadoahk kahrepen eh sohte pahn kohla doadoahk, oh en pein kamwakelehda eh samin kan. Ma tohnpeneinei pahn sewesehki ih soahng pwukat, re pahn sewese ih en saksakau lao ih mehla.

Ale sawas. E kin apwal ong tohnpeneinei en pitsang kahpwal wet ma re sohte pahn ale sawas. Ke anahne ale sawas. Koapworopworki kompoakpahmw kan me sohte pahn uhpalih me ahneki soumwahu en sakau en wai oh sohte men kowe en mihmihte nan kahpwal wet.

Ma me ahneki soumwahu en sakau en wai pahn pwungki ale sawas, met pahn uhdahn mwahu. Met wia tepin kamwahulahn kahpwalo. Sakau en wai kak kohsang nan paliwere erein rahn kei. Ahpw e pahn apwal en kamwahwihala eh madamadau ong sakau en wai.