Ohl Aima Men

NI ANSOU me aramas akan tohtohla nan sampah, kereniong koaros kin wia me suwed duwehte Kein. Ahpw emen ohl me weksang irail. Iet ih, ede Ihnok. Ihnok ohl aima men. Aramas akan koaros me mi limwah kin wia mehkan me suwed, ahpw Ihnok kin papahong Koht.

Ke ese dahme kahrehda aramas ko ni ansouo kin wia me suwed tohto? Nna, tamanda, Ihs me kahreong Adam oh Ewa en sapeik ong Koht oh kang sang wahn tuhke me Koht padahkiong ira en dehr kang? Ei, tohnleng suwed men. Paipel kahdaneki menet Sehdan. Oh e kin songosong en kalowehdi koaros en wia me suwed.

Kadekadeo Siohwa Koht mahsanih ong Ihnok en padahkiong aramas akan mehkot me re sohte men rong. Ietet: ‘Koht pahn kasohrala aramas suwed koaros ehu rahn.’ Aramas kan uhdahn mwakarki met. Ele mwein re pil song en kamehla Ihnok. Ihme kahrehda Ihnok anahne en aima padahkiong aramas kan mehkan me Koht pahn wia.

Koht sohte mweidong Ihnok en mour werei nanpwungen aramas suwed pwukat. Ihnok eri mourki sounpahr 365 te. Dahme kahrehda se inda “sounpahr 365 te”? Ahki ni rahn oko aramas mour werei sang aramas en rahnwet. Pwe tamanda nain Ihnok ohlo Meduselah me mourki sounpahr 969!

Eri, mwehrin Ihnok mehla, aramas kan wia susuwedla ansou koaros. Paipel koasoaia me ‘arail lamalam koaros suwed ansou koaros,’ oh ‘sampah kin direkihla lemei oh pei.’

Ke ese ehu kahrepe me sampah direkihla suwed ni rahn oko? E direkihla suwed pwehki Sehdan ahnikiehr ehu ahl en widinge aramas pwen wia me suwed. Kitail pahn sukuhliki met mwuhri.