Iang Koht Kekeidwei Nan Ahnsou Apwal Pwukat

“Enok kin iang Koht kekeid. E ahpw sohrala pwehki Koht ketikihsang ih.”​—SENESIS 5:24.

1. Soangen kahpwal dah kan me kin wiaiong atail ahnsou en suwed?

AHNSOU apwal akan! Mahsen pwukat inenen kawehwehda mwahu pahr akan en pingiping oh mahwen me aramas mihlahr loale sangete ni ahnsou me Wehin Mesaia tepida nan pahr 1914. Nan erein ahnsowo pwon, aramas akan mihier nan “imwin rahn akan.” Soangen kahpwal akan me duwehte duhpek kan, soumwahu kan, rerrer en sahpw akan, oh mahwen kan lelohng aramas akan ni wehieu me sohte mehkot pahrekiong. (2 Timoty 3:1; Kaudiahl 6:1-8) Soangen kahpwal akan pil kin lelohng irail me kin kaudokiong Siohwa. Ni soangsoangen irair akan, kitail koaros pahn kin nantihong powehdi kahpwal akan oh irair kamasepwehk kan en atail ahnsou. Apwal en mwohni, pingiping nanpwungen wehi kan, tiahk en mwersuwed, oh soumwahu kan iei ekei soahng kan me kin kahrehiong mour en apwal.

2. Soangen kasongosong oh kalokolok dah kan me sapwellimen Siohwa ladu kan kin lelohng?

² Patehng met, sapwellimen Siohwa ladu tohto kin lelohng kalokolok kan ehu mwurinte ehu pwehki Sehdan kin mahweniong irail akan me kin “kapwaiada kosonned en Koht kan, oh me loalopwoatohng padahk me Sises ketin kadehdehier.” (Kaudiahl 12:17) Oh mendahte ma kaidehn kitail koaros me sohte kin lelohng soangen kalokolok, ahpw Kristian mehlel koaros kin nannanti pelian Sehdan me Tepil oh ngehn me e kin kauwehkihla mour en tohn sampah kan. (Episos 2:2; 6:12) Kitail anahne kakehlailih atail pali ngehn ahnsou koaros pwe kitail en dehpa pwupwudiong pahn manaman en ngehn wet, pwehki kitail kin diar met nan wasahn doadoahk, nan sukuhl, oh pil nan wasa teikan me kitail kin patehng irail oko me sohte kin perenki kaudokiong Siohwa ni ahl me pwung oh mehlel.

Iang Koht Kekeidwei, Kaidehn en Iang Wehin Sampah kan

3, 4. Ni soangen ahl dah me Kristian kan kin weksang sampah wet?

³ Nan senturi keieu, Kristian akan pil kin pelian kehlail ngenen sampah wet, oh met kin wiahiong irail arail en inenen weksang irail oko me mih likin mwomwohdiso en Kristian. Pohl kawehwehda wekpeseng wet ni e ntingihdi: “Eri, ni mwaren Kauno, I kehkehlingkihong kumwail: kumwail dehr kin idawehn mouren me rotorot akan, me ar lamalam sohte ekis katepe mie, oh nan kapehdirail inenen rotorot. Re sohte iang ahneki mour me kin sang rehn Koht, pwehki ar mihmi nan rotorot douluhl oh nan ar nan kapehd keptakai. Solahr arail namenek, re kin pein pangala pein irail ong nin tiahk suwed kan, oh wia ni ngidingid soangen tiahk samin koaros.”​—Episos 4:17-19.

⁴ Ia uwen mahsen pwuko ah nohn sansal ni ar kin kawehwe duwen ahn sampah irair en rotorot mosul en ngehn oh tiahk​—nan mwehin Pohl oh pil nan atail ahnsou! Duwehte nan keieun senturi, Kristian akan rahnwet sohte kin ‘iang weweidwei duwehte me wehin sampah kan kin wia.’ Weksang met, Kristian kan kin ale kapai tohrohr en iang Koht kekeid. Ekei aramas kak peidek ma e pwung kitail en koasoia me tohn sampah tikitik oh soh unsek kak iang Siohwa kekeidwei. Ahpw, Paipel kin kasalehda me e kak wiawi. Laudsang met, Siohwa kin kasik aramas en iang Ih kekeid. Nan senturi kewaluh B.C.E., soukohp Maika ntingihdi mahsen sarawi pwukat me mahsanih: “Iet me Siohwa ketin kupwurki kitail en wia: kitail en wia dahme pwung; kitail en poakohng kadek; oh kitail en iang Koht kekeid ni lamalam aktikitik.”​—Maika 6:8.

Iaduwen oh Dahme Kahrehda Kitail en Iang Koht Kekeid?

5. Iaduwen aramas soh unsek en kak iang Koht kekeidwei?

⁵ Iaduwen atail pahn iang Koht me keieu roson oh sohte sansal kekeidwei? E sansal me met sohte pahn wiawi duwehte atail kin iang aramas akan alialuhwei. Nan Paipel, lepin mahsen “kekeid wei” kin wehwehki “en alasang soangen wiewia ieu.”a Ni atail pahn tamataman met, eri kitail en wehwehki me aramas emen me kin iang Koht kekeid kin idawehn elen mour ieu me Koht me ketin koasoanehdi oh kupwurki. Wiewia met kin kahrehda kitail kin weksang pali moron en aramas teikan. Ieite elen pilipil en met ong Kristian emen. Pwekihda? Mie kahrepe tohto.

6, 7. Dahme kahrehda kitail kak ndahki me iang Koht kekeid me kin wia elen mour me keieu mwahu?

⁶ Keieu, Siohwa me ketin kapik kitailada, iei Ih me utupen atail mour oh E ketikihda mehkan koaros me kitail anahne pwe en kolokol ohng kitail atail mour. (Kaudiahl 4:11) Ihme kahrehda, Ih kelepw me sapwellimaniki pwung en koasoanehdi ong kitail ia mwomwen atail en kekeidwei. Patehng met, iang Koht kekeidwei iei ahl me keieu katapan me kitail kak diar. Siohwa ketin koasoanehdi ong irail me kin iang Ih kekeid koasoandi en mahkpen dihp, oh E pil ketikihda koapworopwor en mour soutuk. Samatail limpoak pil kin ketikihda kaweid me kin sewese irail akan me kin iang Ih kekeidwei nan elen mour me kak pweida ahnsou wet, mendahte arail wia aramas soh unsek kei oh kin koukousoan nan sampah ehu me mihmi pahn manaman en Sehdan. (Sohn 3:16; 2 Timoty 3:15, 16; 1 Sohn 1:8; 2:25; 5:19) Pil ehu kahrepe me kahrehda kitail en kin iang Koht kekeidwei pwehki sang ni atail kin pwungki wia met, e kin wahdo meleilei oh miniminpenehn mwomwohdiso. ​—Kolose 3:15, 16.

⁷ Dahme keieu kesempwal iei met: nin doken atail kin iang Koht kekeid, kitail kin kasalehda ihs me kitail kin uhki ong me pid ire kesempwal me pwarada nan mwetuwel en Ihden​—ireo iei me pid ihs me sapwellimaniki pwung en wia kaunepen lahng oh sampah. (Senesis 3:1-6) Kitail men kasalehda sang atail elen mour me kitail kin uhki mehlel Siohwa, oh kitail kin eimah oh kalohkiseli me Ih kelepw me sapwellimaniki pwung en kaunda lahng oh sampah. (Melkahka 83:18) Kahrehda, atail wiewia kan kin pahrekiong atail kapakapki me mwaren Koht en sarawihla oh kupwure en pweida. (Madiu 6:9, 10) Ia uwen erpit irail oko me piladahr en iang Koht kekeidwei kin kasalehda! Irail kak koapworopworki me irail weweidwei nan ahl pwung, pwehki Siohwa “kin sapwellimaniki erpit ni unsek.” E sohte kak ketin sapwungala.​—Rom 16:27.

8. Iaduwen mwehin Enok oh Noha duwehte atail ahnsou?

⁸ Iaduwen ah pahn kak wiawi aramas emen en kak mourki mour en Kristian pwehki irair en sampah ah nohn apwal oh pali moron en aramas ahr sohte kin men papah Siohwa? Kitail kak ese pasapengpen peidek wet ni atail kin kilang duwen ohl lelepek kan en kawao me kin kolokol arail lelepek ong Siohwa ni ahnsou kan me inenen apwal. Meh riemen nanpwungarail iei Enok oh Noha. Ira koaros kin mour nan irair en ahnsou me duwehte atail ahnsou. Wiewia suwed kan kin paraparala wasa koaros. Ni mwehin Noha, sampah kin direkihla wiewia lemei oh tiahk samin. Ahpw, Enok oh Noha kin pelianda ngenen sampah en ara ahnsou oh kin iang Siohwa weweidwei. Iaduwen ara kak wia met? Pwehn sapeng peidek wet, nan artikel wet kitail pahn koasoia duwen mehn kahlemeng mwahu en Enok. Nan artikel en mwurin met, kitail pahn koasoia duwen mehn kahlemeng mwahu en Noha.

Enok Kin Iang Koht Kekeidwei nan Ahnsou akan me Inenen Apwal

9. Dahme kitail sukuhliki duwen Enok?

⁹ Enok iei tepin aramas me Pwuhk Sarawi kawehwehda me e kin iang Koht kekeidwei. Pwuhk Sarawi mahsanih: “Mwurin Enok nainekihda pwutak emen me ede Medusala, e iang Koht mehlel kekeid.” (Senesis 5:22) Mwurin Pwuhk Sarawi ah kawehwehda uwen reirei en Enok mour​—me mwomwen reirei ni atail karasadohng reirei en atail mour, ahpw en Enok mour me mwotomwot nin duwen mour en irail mehn ahnsowo​—Pwuhk Sarawi mahsanih: “Enok kin iang Koht kekeid. E ahpw sohrala pwehki Koht ketikihsang ih.” (Senesis 5:24) E sansal me Siohwa ketikihwei Enok sang nan sapwen irail me momour kan oh ketikihong ih nan irair en memeir nan irair en mehla mwohn imwintihti kan arail kak koledi ih. (Ipru 11:5, 13) Likin iretikitik pwukat, ire kan nan Paipel me kin koasoia duwen Enok me malaulau. Ahpw, sang ire kan me kitail sukuhliki oh pil sang wasa teikan, kitail kak nda me mwehin Enok me inenen suwed.

10, 11. (a) Iaduwen wiewiahn mwersuwed ah parapeseng sangehr mwurin Adam oh Ihp sapeiklahr? (b) Soangen kokohp dah me Enok kin kalohkiseli, oh ia mwomwen mwekid en aramas akan ong ih?

¹⁰ Kitail en tamataman me suwed mwadang parpeseng rehn aramas akan mwurin Adam ah wiahda dihp. Kitail sukuhliki nan Paipel me nein Adam pwutak laud, Kain, wiahla tepin aramas me kemehla aramas emen ni ah kemehla rie pwutak Eipel. (Senesis 4:8-10) Mwurin kamalahn Eipel, emen pwutak pil ipwidiong Adam oh Ihp, oh ira kihong ede Sehd. Kitail wadek duwen ih: “Sehd eri wiahda pwutak emen me e kihong ede Enos. Ih ahnsou me aramas akan tapihada kaudok ni mwaren Siohwa.” (Senesis 4:25, 26) E kapahtou wasaht pwe “kaudok ni mwaren Siohwa” wiawi ni elen uhwong padahk mehlel.b Ahnsou werei mwurin ipwidi en Enos, emen kadaudok en Kain me ede Lamek wiahda koul pwoat ong ah pwoud riemen oko me lohkihda me e kemehla mwahnakapw men me kauwehla paliwere. E pil koasoia: “Ma mehmen me pahn kemehla Kain pahn ale kalokolok pak isipak, a mehmen me pahn kemeiehla pahn ale kalokolok pak isihsek isuh.”​—Senesis 4:10, 19, 23, 24.

¹¹ Soangen ire pwukat me wiawi mahs kasalehda me wiewiahn mwersuwed me tepida sangehr rehn Sehdan nan mwetuwel en Ihden mwadangete kaparahpeseng suwed ong kadaudok en Adam akan. Nan sampah ahnsowo, Enok wia soukohp en Siohwa men me ah pahngok sang ni manaman en ngehn sarawi kin pil kamwekid madamadau pil leledo nan atail ahnsou. Sud mahsanih me Enok kohpadahr: “Iet, Kauno pahn ketido oh sapwellime tohnleng sarawi ngedehrie pahn iang, pwe en ketin kadeikada aramas koaros, pwe en ketin kalokehki me dipan akan wiewia suwed koaros me re wiadahr, oh lokaia suwed koaros me aramas seupwoson pwuko wiahiong Koht!” (Sud 14, 15) Mahsen pwukat pahn pweida mehlel nan Armakedon. (Kaudiahl 16:14, 16) Mehlel, ni mwehin Enok, “aramas dipan” tohto rong sapwellimen Enok mahsen en kokohp oh kin lingeringerda. Ahpw, Siohwa kin ketin limpoak oh kadohwanewei sapwellime soukohpo sang nan pehrail!

Dahme Kakehlaka Enok en Iang Koht Kekeidwei?

12. Dahme wiahiong Enok en weksang aramas teikan nan ah mwehi?

¹² Nan mwetuwel en Ihden, Adam oh Ihp rong Sehdan, oh Adam eri pelianda Siohwa. (Senesis 3:1-6) Neira pwutak, Eipel, weksang ira, oh Siohwa ketin kupwure ih. (Senesis 4:3, 4) E kapahtou pwe pali laud en kadaudok en Adam akan sohte duwehte Eipel. Ahpw, Enok, me ipwidi sounpahr epwiki kei mwuri, me pil peik duwehte Eipel. Dahme kahrehda Enok weksang pali moron en kadaudok en Adam akan? Wahnpoaron Pohl sapeng peidek wet ni e ntingihdi: “Pwoson me kapitasang Enok mehla pahn eh imwintihti kan. Sohte emen kak diar, pwehki Koht ketikihsang ih. Pwuhk Sarawi mahsanih me mwohn Koht ketikihsang ih, Enok inenen keniken pahn kupwuren Koht.” (Ipru 11:5) Enok wia emen kisehn “depwek kalaimwun” en sounkadehde kan me momour mwohn Krais ketiket sampah me wia mehn kahlemeng mwahu en pwoson. (Ipru 12:1) Pwoson me kahrehong Enok en kak powehdi oh wiewia tiahk mwahu nan ah mour ni erein pahr tohtohsang 300​—me reireiki pak siluh mour pali laud en aramas nan rahn pwukat!

13. Soangen pwoson dah me Enok ahneki?

¹³ Pohl kawehwehda duwen pwoson me Enok oh sounkadehde teikan kasalehda ni e ntingihdi: “Pwoson, iei kamehlele mehkan me kitail kin koapworopworki de kasikasik, kamehlele mehkan me kitail sohte kak kilangki masatail.” (Ipru 11:1) Ei, pwoson iei kasikasik ni koapworopwor, me poahsoankihda kamehlele me soahng kan me kitail kasikasik pahn pweida. E pidada kasikpe kehlail ieu me kin kamwekid dahme kitail keieu kesempwaliki nan atail mour. Soangen pwoson wet me kahrehong Enok en kak iang Koht kekeidwei mendahte ma sampah me e mihmi loale sohte iang Koht kekeid.

14. Soangen loalokong dah me ahn Enok pwoson poahsoanda powe?

¹⁴ Pwoson mehlel kin poahsoankihda loalokong pwung. Soangen loalokong dah me Enok ahneki? (Rom 10:14, 17; 1 Timoty 2:4) E sansal me e ese dahme wiawi nan mwetuwel en Ihden. Mwein ele e pil rong duwen ia mwomwen mwahu en mour me mih nan mwetuwel en Ihden​—me mwein ele wie miemiehte ahpw inepwihdi sang aramas akan. (Senesis 3:23, 24) Oh e ese duwen sapwellimen Koht koasoandi me kadaudok en Adam pahn kadirehla sampah oh wiahkihla sampah pwon en duwehte tepin paradaiso. (Senesis 1:28) Pil patehng met, Enok inenen kesempwaliki sapwellimen Koht inou en wiahda kadaudok emen me pahn tiakpeseng moangen Sehdan oh kamwahuwihala suwed akan me likamw en Sehdan kahrehdo. (Senesis 3:15) Ni mehlel, sapwellimen Enok kokohp me nekinekid nan pwuhken Sud, oh e kin koasoia duwen ohlahn wahn Sehdan. Pwehki mie ahn Enok pwoson, kitail wehwehki me e kin kaudokiong Siohwa, me “kin ketin katingih irail kan me kin raparapahki.” (Ipru 11:6) Kahrehda, mehnda ma Enok sohte ahneki loalokong koaros me kitail ahneki rahnwet, ah loalokong ahnsowo me itar en poahsoanihada ah pwoson en kehlail. E kak kolokol ah lelepek ni ahnsou apwal akan pwehki e kin ahneki soangen pwoson wet.

Kahlemengih Mehn Kahlemeng Mwahu en Enok

15, 16. Iaduwen kitail kak kahlemengih mehn kahlemeng mwahu en Enok?

¹⁵ Kitail, duwehte Enok, kin men kaperenda Siohwa ni ahnsou apwal akan me mie nan rahnwet, kahrehda e mwahu kitail en kahlemengih mehn kahlemeng mwahu en Enok. Kitail anahne alehda oh tamataman loalokong pwung me kitail sukuhliki duwen Siohwa oh sapwellime koasoandi kan. Ahpw, kitail pil anahne laudsang. Kitail anahne mweidohng loalokong pwung en kaweid atail mour. (Melkahka 119:101; 2 Piter 1:19) Kitail anahne sapwellimen Koht madamadau en kaweid kitail, oh ahnsou koaros songosong en kaperenda Ih ki atail madamadau oh wiewia kan koaros.

¹⁶ Sohte koasoiepen pil ihs ni mwehin Enok me kin iang papah Siohwa, eri e sansal me e kin kelepw papah Siohwa de e iang kisehn kisin pwihn tikitik ieu. Pil duwehte kitail​—kitail kisehn pwihn malaulau ieu nan sampah, ahpw met sohte pahn kamworuseikitailla. Siohwa pahn ketin utung kitail, sohte lipilipil ihs me pahn uhwong kitail. (Rom 8:31) Enok, ni eimah, kohpada duwen ohl me pahn kohdohng pohn aramas akan me kin dohsang Koht. Kitail pil kin, ni eimah, kalohki “Rongamwahu en Wehin Koht” mehnda ma aramas akan wiahki mehn kepit, de uhwong, de keme kitail. (Madiu 24:14) Enok sohte mour werei duwehte ekei aramas en ah mwehi kan. E sansal me ah koapworopwor sohte mihmi ni sampah en ahnsowo. E kin koapworopworki koasoandi ehu me mwahusang. (Ipru 11:10, 35) Kitail pil kin koapworopworki oh kasikasik pweidahn sapwellimen Siohwa koasoandi. Kahrehda, kitail sohte kin doadoahngki sampah wet ni unsek. (1 Korint 7:31) Ahpw, kitail kin doadoahngki atail kehl oh kepwe kan keieu ong papah Siohwa.

17. Soangen loalokong dah me mie rehtail me sohte rehn Enok, oh dahme met pahn kamwekid kitail en wia?

¹⁷ Enok pwoson me Kadaudok me Koht ketin inoukihdiero pahn pwarada ni ahnsou me Siohwa ketin koasoanehdiong. Met kereniongehr pahr 2,000 sangehr ahnsou me Kadaudoko, Sises Krais, pwarada, oh e ketikihda pweinen dihp, oh riting ong kitail ahlo, oh pil iangahki ong irail sounkadehde lelepek kan me duwehte Enok, pwe ren kak ale mour soutuk. Kadaudoko me iei Sises Krais wiahlahr Nanmwarki en Wehin Koht nanleng ahnsou wet, oh sikensangehr Sehdan sang nanleng kohdihdohngehr sampah, oh kitail kilang kahpwal tohto me pidakihkitailpenehr pwehki met. (Kaudiahl 12:12) Ei, mie uwen loalokong ieu me mihier rehtail me laudsang mehlel dahme mie rehn Enok. Kahrehda, kitail en ahneki pwoson kehlail duwehte ih. Atail koapworopworki me sapwellimen Koht inou kan pahn pweida en kamwekid soahng koaros me kitail kin wia. Kitail en duwehte Enok me iang Koht kekeid, mendahki atail mihmi nan ahnsou suwed kan.

[Nting tikitik me mi pahs]

Iaduwen Ahmw Pahn Sapeng?

• Ia wehwehn en “iang Koht kekeidwei”?

• Dahme kahrehda en iang Koht kekeidwei iei elen mour me keieu mwahu?

• Dahme sewese Enok en iang Koht kekeidwei mendahki e mihmi nan ahnsou apwal akan?

• Iaduwen kitail kak kahlemengih Enok?

[Kilel nan Pali 19]

Woman, far right: FAO photo/B. Imevbore; collapsing building: San Hong R-C Picture Company

[Kilel nan Pali 21]

“Enok kin iang Koht kekeidwei” pwehki e kin pwoson Ih

[Kilel nan Pali 23]

Kitail kin kamehlele me sapwellimen Siohwa inou kan pahn pweida