Siohwa Ketikihda Sapwellime Kosonned kan

SOUNPWONG riau mwehrin arail mwesel sang Isip, mehn Israel kan leldohng Dohl en Sainai, wasa me pil adaneki Orep. Iet wasaht me Siohwa mahsan ong Moses sang nan tuhke lululo. Aramas kan wiahda ihmwarail ihmw likou ko oh kousoandi ansoukis wasao.

Aramas kan eri mi wasao awiawih, ah Moses doudala pohn nahnao. Pohn nahnao, Siohwa mahsanih ong Moses me e mwahuki mehn Israel kan en peikiong Ih oh wiahla Sapwellime aramas tohrohr. Ni en Moses pwurodihdo sang pohn nahnao, e padahkiong mehn Israel kan mehkan me Siohwa mahsaniehr. Aramas kan koaros inda me irail pahn peikiong Siohwa, pwehki irail mwahuki wia sapwellime aramas.

Siohwa pil wia soahng kapwuriamwei ehu. E wiaiong kadoken nahnao en direkihla idiniei, oh ngilen nan sahpwe laud ahpw kohda. E pil mahsandohng aramas kan: ‘Ngehi Siohwa omwail Koht me wah kumwail sang Isip.’ Ih eri kehkehlikiong irail: ‘Kumwail dehpa kaudokiong emen koht likin Ngehi.’

Koht pil ketikihong mehn Israel kan kosonned duau likin met. Aramas kan ahpw masapwehkada kowahlap. Irail padahkiong Moses: ‘Kowe me pahn koasoaiong kiht, pwehki se masak ma Koht pahn mahsandohng kiht se pahn mehla.’

Mwuhri Siohwa mahsanih ong Moses: ‘Kohdahdo pohn nahna wet. I pahn kihong uhk takai patapat riau me I pahn intingihdi kosonned me I mwahuki aramas kan en kapwaiada.’ Moses eri kohdahla pohn nahnao. Impan rahn paisek oh pwong paisek e mihmi pohn nahnao.

Mie sapwellimen Koht kosonned tohto me e ketikihong aramas kan. Moses intingihdi kosonned pwukat koaros. Koht pil ketikihong Moses takai patapat riau. Pohn takai patapat riau pwukat, pein Koht intingihdi kosonned 10 ko me e kasaleongehr aramas akan. Kosonned pwukat adaneki Kosonned Eisek.

Kosonned Eisek ko inenen kesempwal. Ahpw pil mie kosonned tohto me Koht ketikihong mehn Israel kan. Ehu kosonned pwukat ketihtiki: ‘Kowe en poakong Siohwa omw Koht ki mohngiohngomw unsek, omw lamalam unsek, omw mour unsek oh omw kehl unsek.’ Oh pil iet ehu: ‘Kowe en poakong mehn impomw duwehte pein uhk.’ Sapwellimen Koht Ohl, Sises Krais, mahsanih me kosonned lapalap riau pwukat iei kosonned ko me keieu kesmpwal rehn kosonned ko koaros me Siohwa ketikihong sapwellime kan. Mwuhri kitail pil pahn sukuhliki sapwellimen Koht Ohl oh duen ah kin padahk.