Sises Memour

KE ESE ihs liho oh pil ohl riemeno? Liho adaneki Meri Makdalihn, emen kompoakpen Sises. Oh ohl ko me likou pwetepwet tohnleng kei. Pere tikitik wet me Meri kilikilangwong loale iei wasa me kahlep en Sises pwilidi ie mwehrin ah mehla. Met adaneki pwoaren sousou ehu. Eri ahpw ansouwet kahlepo kohsangehr! Ihs me wahsang? Kitail pahn kilang.

Mwehrin Sises mehla, samworo ko indaiong Pailat: ‘Ni ansou me Sises memour e inda me e pahn pil pwurehng iasada mwehrin rahn siluh. Ke pahn ilakihla sounpei kan pwen sinsile sousouo. Eri sapwellime tohnpadahk kan sohte kak en pirapehla paliware oh inda me e iasadahr sang mehla!’ Pailat eri padahkiong samworo ko en kadarala sounpei kan pwen sinsile sousouo.

Ahpw mwadangete ni kasiluh en rahn mwehrin Sises matala emen tohnleng en Siohwa pwarado. E katapwurwei lapalahn takai me pinala sousouo. Sounpei ko ahpw masapwehkada oh sohlahr kak mwekid. Mwuhri ekis, ni arail kilangwong nan sousouo, paliwaro kohsangehr! Ekei sounpei ko kohieila nan kahnihmwo oh padahkiong samworo kan. Ke ese dahme samworo suwed ko wia? Irail pwain sounpei ko pwe ren koasoaia me likamw. ‘Kumwail pahn inda me sapwellime tohnpadahk kan kohdo ni pwong ni ansou me se memeir, oh pirapehla paliwaro,’ ihme samworo kan indaiong sounpei ko.

Ahpw ni ansouohte, ekei lih me kompoakpen Sises kohdohng sousouo. Rahpw pwuriamweila pwehki sohlahr mehkot nan sousouo! Ansouohte tohnleng riemen pwarada me likouki likou lingaling. ‘Dahme kahrehda kumwail raparapahki Sises wasaht?’ ira idek. ‘E iasadahr. Kohla mwadang oh padahkiong sapwellime ko.’ Lih ko eri mwadangete tang! Ahpw ni arail tangwei ohl emen kauhiraildi. Kumwail ese ihs menet? Pein Sises! ‘Kumwail kohla oh padahkiong ai tohnpadahk ko,’ e mahsanih.

Ni ansou me lih ko padahkiong tohnpadahk kan me Sises memour oh re kilangehr ih, e apwal ong tohnpadahk kan en kamehlele. Piter oh Sohn eri tangalahng sousouo pwe ren kilang, ahpw sohlahr mehkot nan sousouo! Ni en Piter oh Sohn pwurasang sousouo, Meri Makdalihn mihmihte wasao. Iei ansou me e kilangwong loale oh kilang tohnleng riemen.

Ke ese dahme wiawiong paliwar en Sises? Koht me kahreong en salongala. Koht sohte kaiasada Sises ong mour ni pali uduk duwehte paliwar me e mehkihla. E ketikihong Sises paliwar ngehn kapw ehu, duwehte tohnleng kan nanleng. Ahpw pwen kasansalehda ong sapwellime kan me e memour, Sises kak aleong paliwar ehu me aramas kak kilang, duen me kitail pahn sukuhliki.