Koht Ketin Tamataman Sapwellime Ohl

SISES ketin sengiseng ni ahnsou me kompoakepah Lasarus mehla. Ke lemeleme Siohwa kupwur toutoula ni Sises eh lokolok oh pwoula?— Paipel mahsanih me dahme kin wiawi kak “kansensuwedihada” oh “katoutouwihala” kupwuren Koht.​—Melkahka 78:40, 41; Sohn 11:35.

Ke kak medewe uwen medek me Siohwa sapwellimanki ni eh ketin kilang sapwellime Ohlo mehla?— Sises ketin kamehlele me Koht sohte pahn ketin manokehla ih. Ihme kahrehda e mahsanih mwohnte eh pwoula: “Semei, I mweidalahr [mouriet] nin limomwi kan.”​—Luk 23:46.

Sises ketin kamehlele me e pahn ketin iasada, oh me e sohte pahn ketin mihmihte nan “wasahn me melahr akan” de nan sousou. Mwurin Sises eh ketin iasada, wahnpoaron Piter nda dahme ntingdi nan Paipel duwen Sises: “E sohte lekdekla nan wasahn me melahr akan, paliwere sohte mwerpeseng nan sousou.” (Wiewia 2:31; Melkahka 16:10) Paliweren Sises sohte mihmi nan sousou werei ihme kahrehda e sohte mwerpeseng oh pwohsuwedla.

Ni Sises eh ketiket nin sampah, e pil ketin padahkihong sapwellime tohnpadahk kan me e sohte pahn mehla ahnsou werei. E ketin kawehwehiong irail me e pahn “kamakamala, e ahpw pahn iasada ni kesiluhwen rahn.” (Luk 9:22) Ihme kahrehda tohnpadahk ko sohte anahne pwuriamweila ni ahnsou me Sises ketin iasada. Ahpw ia duwe, irail pwuriamwei?— Kita pahn kilang.

Mpen kuloak siluh mwurin souwas en Nialem me Sounpadahk Lapalapo pwoula nin tuhkehn lokoloko. Sosep, ohl kepwehpwe men me wia emen Tohn Mwoalen Kopwung en mehn Suhs kan kin kamehlele Sises ahpw sohte kin kasalehong aramas. Ni eh esehda me Sises pwoulahr, e kohla rehn Pailet me wia kepina en Rom. E peki ma e kak ale paliweren Sises sang nin tuhkeo pwehn sarepedi. Mwuri, Sosep wahla paliweren Sises ni mwetuwel ehu wasa me sousou ehu mi ie.

Mwurin paliwaro eh kohdiong nan sousowo, lapalahn takai ehu katapwurlahng mwoweo. Sousowo ahpw ritidi. Eri, e lelehr rahn kesiluh me iei Rahn Sarawi. E wie rotorotete oh ketipin saikinte dakada. Ohl ekei wie sinsile sousowo. Kaunen samworo ko me kadarirailla. Ke ese dahme kahrehda?—

Samworo ako pil iang rong ni en Sises mahsanih me e pahn ketin iasada. Eri samworo ko kihdi silepe kan pwehn perehsang sapwellimen Sises tohnpadahk ko en dehr pirapahla paliwaro oh nda me Sises ketin iasadahr. Ni ahnsowohte, wasao ahpw rerda. Marain ehu pir nan rotoroto. Iei tohnleng en Siohwa men! Sounpei ko inenen masepwehkada oh sohte kak mwekid. Tohnleng ko kohla ni sousowo oh katapwurehsang takaio. Solahr mehkot nan sousowo!

Ei, duwehte me wahnpoaron Piter koasoia mwuhr: “Koht ketin kaiasadahr Sises menet sang mehla.” (Wiewia 2:32) Koht ketin kaiasada Sises oh ketikihong ih paliwar ehu me duwehte me e sapwellimaniki mwohn e ketido sampah. E ketin iasada nin duwen ngehn ehu duwehte tohnleng kan. (1 Piter 3:18) Eri pwe aramas en kak kilang Sises, e anahne pwuhriong nan paliwar en aramas. Ia duwe, ih me e ketin wia?— Kita pahn kilang.

Met ketipino tepidahr daker wasa. Sounpei ko samwalahr. Mery Makdala oh lih teikan me wia sapwellimen Sises tohnpadahk kohkohlahng ni sousowo. Irail ndindapene nanpwungarail: “Ihs me pahn sewesehkin kitail katapwurehsang takaio ni ewen sousowo?” (Mark 16:3) Ahpw ni arail lella ni sousowo, takaio kohsangehr. Solahr mehkot nan sousowo! Paliweren Siseso solahr mie! Ni ahnsowohte, Mery Makdala tangala pwehn rapahki ekei sapwellimen Sises wahnpoaron ko.

Lih teiko mihmihte ni sousowo. Irail ahpw medewe: ‘Ia wasa me paliweren Sises mi ie?’ Ni ahnsowohte ohl riemen me likou lingaling pa pwarada. Ira tohnleng kei! Ira ahpw ndaiong lih oko: ‘Dahme kahrehda kumwail raparapahki Sises wasaht? E ketin iasadahr. Kumwail mwadang kohla oh padahkihong sapwellime tohnpadahk ko.’ Eri ke kak medewehla uwen lih oko arail tang marahra! Ni arail tangatang kohla, irail ahpw tuhwong ohl emen. Ke ese ihs ohlo?—

Ohlo iei Sises me pwuhriong nan paliweren aramas! E pil mahsanihong lih oko: ‘Kumwail kohwei oh padahkihong nei tohnpadahk ko.’ Lih oko uhdahn perenda. Irail diar tohnpadahk ko oh ndaiong irail: ‘Sises ketin iasadahr! Se kilang ih!’ Mery padahkihongehr Piter oh Sohn me solahr mehkot nan sousowo. Met ira kohla ni sousowo duwehte me ke kilang nan kilel wet. Ira kilang likou linen me Sises kidikidikihpeneo ahpw ira sohte ese dahme ira pahn kamehlele. Ira men kamehlele me Sises ketin iasada ahpw e apwal ong ira en kamehlele me met mehlel.

Mwuri ekis Rahn Sarawio, Sises ketin pwarohng sapwellime tohnpadahk riemen me kohkohla nan kisin kahnimw kis me adaneki Emaus. Sises ketin iang ira oh mahmahseniong ira, ahpw ira sohte kasawihada ih pwehki e sohte ketin doadoahngki paliwar me e sapwellimaniki mwohn eh pwoula. Ira ahpw kasawihada Sises ni eh konot oh kapakap rehrail. Tohnpadahk ko inenen perenda kahrehda ira mwadangete sapalki mwail tohto pwurala Serusalem! Mwein mwurinte met me Sises ketin pwarehng Piter pwehn kasalehiong me e ketin iasadahr.

Eri, ni soutik en Rahn Sarawio, tohnpadahk tohto kohpene nan pere ehu. Wenihmw ko ahpw ritidi. Ahnsowohte Sises ketin pwarada nanpwungarail nan pereo! Met irail eseier me Sounpadahk Lapalapo uhdahn iasadahr. Medewehla uwen arail perenda!​—Madiu 28:1-15; Luk 24:1-49; Sohn 19:38–20:21.

Erein rahn 40 Sises ketin pwarada ni soangsoangen paliweren aramas pwehn kasalehiong sapwellime tohnpadahk ko me e ketin iasadahr. (Wiewia 1:9-11) Mwurin ahnsoukis, sapwellime tohnpadahk kan tepida padahkihong aramas koaros me Koht ketin kaiasada Sises sang mehla. Mendahki samworo ko keme irail oh kemehla ekei, irail kin kalokalohkte. Irail ese me ma irail mehla, Koht pahn ketin taman irail duwehte eh ketin taman sapwellime Ohlo.

Ia uwen sapwellimen Sises tohnpadahk ko ar weksang aramas tohto rahnwet! Aramas pwukat kin medemedewehte duwen kutohr ong Easter ni ahnsou me Sises ketin iasada. Ahpw Paipel sohte mahsanih duwen mehkot me pid kutohr ong Easter. E mahsanih duwen papah Koht.

Kitail kak duwehte sapwellimen Sises tohnpadahk ko ni atail kin padahkihong aramas akan duwen Koht eh ketin wiahda mehkot kaselel ni eh ketin kaiasada sapwellime Ohlo. Kitail sohte anahne masak mehnda ma aramas nda me irail pahn kemehkitailla. Ma kitail pahn mehla, Siohwa pahn ketin tamataman kitail oh kaiaskitailda duwehte me e ketin wiahiong Sises.

Kitail sou kin peren ni atail ese me Koht ketin tamataman irail oko me kin papah ih oh me e pahn ketin kaiasirailda?— Atail kin ese mepwukat pahn kahrehda kitail en men ese ia duwen atail kak kaperenda Koht. Ke ese me kitail kak kaperenda Koht?— Kita kak koasoia met.