Sises Ketin Iasadahr

Mwurin Sises eh pwoula, ohl kepwehpwe men me adaneki Sosep peki rehn Pailet en mweidohng ih en kihdihsang kahlep en Siseso pohn tuhkeo. Sosep eri kidimkipene kahlepo likou linen kaselel oh mehn kapwohtik oh nekidediong nan sousou kapw ehu. Ih eri katapwurehiong lapalahn takai ehu ni ewen sousowo. Kaunen samworo ko eri ndaiong Pailet: ‘Se perki me ekei nein Sises tohnpadahk ko pahn wahsang paliweren Siseso oh uhd nda me Sises mourdahr.’ Pailet eri ndaiong irail: ‘Kumwail katengehdi sousowo oh sinsile.’

Mwurin rahn siluh, nin sohrahn, lih ekei kohla ni sousowo oh diarada me takaio katapwursangehr. Nan sousowo, tohnleng men padahkihong lih ako: ‘Dehr masak. Sises ketin iasadahr. Kohla oh ndaiong sapwellime tohnpadahk ko ren tuhwong ih nan Kalili.’

Mery mehn Makdala eri mwadang kohkohla rapahki Piter oh Sohn. E ndaiong ira: ‘Mie me wahsangehr kahlep en Siseso!’ Piter oh Sohn eri tangala ni sousowo. Ni ara kilangada me sohte kanengen sousowo, ira pwuralahng ni imwara ko.

Ni ahnsou me Mery pwurala ni sousowo, e kilangada tohnleng riemen loale oh ndaiong ira: ‘I sehse ia wasa irail wahlahng ie ei Kaun.’ Ih eri kilangada ohl emen, oh medemedewe me ih sounmwetuwelo, Mery eri nda: ‘Maing, menlau padahkihong ie ia wasa me ke wahla ih ie.’ Ahpw ni ahnsou me ohlo nda, “Mery!”, Mery eri esehda me iei Sises mwo. Mery eri sengiseng nda: “Sounpadahk!” oh doahkalahng ih. Sises eri mahsanihong ih: ‘Kohla oh ndaiong riei ko me ke kilangiehdahr.’ Ni ahnsowohte, Mery tangala rehn tohnpadahk ko oh ndaiong irail me e kilangadahr Sises.

Kohlahn ni soutik, tohnpadahk riemen wie alialu sang Serusalem kohlahng Emaus. Ohl emen pa iangirahda pohn ahlo oh idek dahme ira koasokoasoia. Ira eri nda: ‘Ke saikinte rong? Rahn siluh samwalahro, kaunen samworo ko kemehla Sises. A met lih ekei ndinda me Sises wie momour!’ Ohlo eri idek rehra: ‘Kumwa sohte kin kamehlele soukohp ako? Irail nda me Krais pahn pwoula oh pwurehng iasada.’ Ih eri pousehlahte kawehwehiong ira iren Paipel kan. Ni ahnsou me irail lella Emaus, tohnpadahk ko ndaiong ohlo en iangirahda. Ni mwengehn soutiko mwurin ohlo eh kapakapki pilawao, ira esehda me Sises mwo. Ih eri salongasang ira.

Tohnpadahk riemeno eri mwadangete kohla Serusalem ni ihmw me wahnpoaron ko pokopokon ie oh ndaiong irail dahme wiawihero. Ni arail mihmi wasao nan ihmwo, Sises pa ketin pwarehng irail koaros. Nin tapio wahnpoaron ko sohte kamehlele me Sises mwo. Ih eri mahsanih: ‘Kumwail kilang pehi kat; kumwail doahke ie. E ntingdier me Krais pahn iasadahsang mehla.’