Ong Nan Pere Ehu Me Loakedi

MWEHRIN Piter oh Sohn kohieisang sousouo wasa me kahlep en Sises pwilidi ie, Meri kelehpw me mi wasao. E tapiada sengeseng. Ih eri kilangwong nan sousouo, duen me kitail kilang nan kilel en mwoweo. Eri e kilangada tohnleng riemen! Ira idek reh: ‘Dahme ke sengesengki?’

Meri sapeng: ‘Irail wahsangehr ai Kauno, oh I sehse iawasa re pwilikihdi ih.’ Meri ahpw pirekekela oh kilang ohl emen. Ohlo eri idek reh: ‘Ihs me ke raparapahki?’

Meri lemelemekiong me ohlo iei sounapwali en wasao, oh ele mwein e wahsang kahlep en Sises. Ih eri inda: ‘Ma ke wahsang ih, padahkiong ie wasa ke pwilikihdi ie.’ Ah, ni mehlel ohl menet iei Sises. E aleong paliwar ehu me Meri sohte ese. Ahpw ni ah likweri ih ki pein edeo, Meri esehda me met Sises. Liho eri tangala padahkiong tohnpadahk kan: ‘I kilangehr Kauno!’

Mwuhri ni rahno, tohnpadahk riemen alialu kohkohlahng kisin kahnihmwen Emmaus, oh ohl emen iangala ira. Tohnpadahk ko pahtou pwehki Sises kamakamala. Ahpw ni arail kekeid kohkohwei, ohlo kawehwehda soahng tohto sang nan Paipel me kahreong ira en ekis insenamwahula. Kadekadeo, ni arail uhdi pwen sak, tohnpadahk ko ahpw esehda me ohlo iei Sises. Ni ansouohte Sises salongsang ira, oh tohnpadahk riemen pwukat mwadangete kohieila Serusalem pwen padahkiong wahnpoaron kan duen ih.

Ni ansou me mehpwukat wiawi, Sises pil pwaradohng Piter. Mehteikan perenkihda arail rong met. Eri tohnpadahk riemen ko kohieila Serusalem oh diar wahnpoaron kan. Ira padahkiong irail duen ahn Sises pil pwarwong ira pohn ahlo. Oh ni arail koasokoasoaia mehpwukat, mehkot kapwuriamwei wiawi, ke ese dah?

Kilang nan kilelo. Sises pwarada nan warengen pereo, mehndahki wanihmwo kin ritidi oh loak. Tohnpadahk kan ahpw perenda kowahlap! Kaidehn met uhdahn rahn kaperen ong irail? Ke kak wadek wen tohto en ansou me Sises pwarwong sapwellime werek kan? Ke kin wadek pak limau?

Wahnpoaron Domas sohte iang irail ni ansou me Sises pwarada. Tohnpadahk kan ahpw padahkiong ih: ‘Se kilangehr Kauno!’ Ahpw Domas inda me e pahn anahne en pein kilang Sises mwohn ah pahn kamehlele. Eri, rahn waluh mwuhri tohnpadahk ko pil pokonpene nan ehu pere me ritidi oh loak, oh ansouwet Domas ieiang irail. Ansouohte, Sises pwarada nanpwungarail nan pereo. Met Domas kamehlele.