Imwin me Suwed Koaros

DAHME ke kilang wasaht? Ei, karis en sounpei pohn oahs pwetepwet kan. Ahpw kilang wasa me re kohkohsang ie. Oahs kan kin tangtangdihdo sang lahng pohn dapok kan! Mehlel me uhdahn mie oahs nanleng?

Soh, mehpwukat kaidehn uhdahn oahs. Kitail ese met pwehki oahs sohte kak tang pohn dapok, kaidehn? Ahpw Paipel koasoaia duen oahs kan nanleng. Ke ese dahme kahrehda e wiahki met?

Pwehki mahs oahs me kin kadoadoahkiong nan mahwin. Ihme Paipel koasoaia duen aramas kan dake oahs sang nanleng kasansalehda me Koht sapwellimenki ehu mahwin me pahn peiong aramas kan sampah. Ke ese dahme wasahn mahwin wet adaneki? Armakeddon. Mahwino pahn kasohrwei me suwed koaros sang sampah.

Sises me pahn tiehng mwowe ni mahwin wet en Armakeddon. Tamataman, Sises iei me Siohwa piladahr pwen nanmwahrki nan Sapwellime kopernment. Ihme kahrehda Sises kin kapwatkihda ninen nanmwahrki. Oh kedlas kasansalehda me e pahn kamehla imwintihti kan en Koht koaros. Kitail pahn pwuriamweiki me Koht pahn kasohrala aramas suwed koaros?

Kitail kilang duen me wiawi nan Poadoapoad 10. Dahme ke kilang wasao? Ei, Nohlik lapalap ehu me kasohrala aramas suwed koaros. Ihs me kahrehda Nohliko? Siohwa Koht. Eri met pil kilang Poadoapoad 15. Dahme wiawi wasao? Sodom oh Komorrah kasohrkihla kisiniei sang rehn Siohwa.

Pakalahng Poadoapoad 33. Kilang dahme wiawiong oahs oh weren mahwin en mehn Isip kan. Ihs me kahreong pihlo en pwildo oh kamwopihrala? Siohwa. E ketin wia met pwen pere sapwellime aramas kan. Kilang poadoapoad 76. Ke pahn kilang me Siohwa pil mweidong sapwellime kan, mehn Israel, en kasohrala pwehki arail wiewia suwed.

Ihme, kitail en dehr pwuriamweiki me Siohwa pahn poronehdo sapwellime karis sang nanleng pwen kasohrwei sang me suwed koaros sampah. Ahpw medemedewe ia pahn wehwehn met! Pakala pali en mwuhr oh kitail pahn kilang.