Serusalem Ohlahr

SOUNPAHR 10 dower powe sang ni ansou me Nanmwahrki Nepukadnesar wahla mehn Israel sukuhl laud kan Papilon. Eri met kilang dahme wiawi! Serusalem luldahr. Oh mehn Israel kan me sohte kamakamala selidiehr oh wisiklahng Papilon.

Tamataman, pwe ihme sapwellimen Siohwa soukohp kan kin panawihki me pahn wiawi ma aramas kan sohte wekila sang arail wiewia suwed kan. Ahpw mehn Israel kan sohte men rong soukohp ko. Irail tengediongete arail kaudokiong koht likamw kan ah kaidehn Siohwa. Ihme aramas kan konehng en kalokolok. Kitail ese met pwehki soukohp en Koht Esekiel padahkiong kitail duen me suwed kan me mehn Israel kan wiewia.

Ke ese ihs me Esekiel? Ih emen mwanakapw ko me Nanmwahrki Nepukadnesar kalipela Papilon sounpahr 10 mwohn ohla kowahlap en Serusalem. Daniel oh kiseh silimen ko, Sadrak, Mesak oh Apedneko, pil iang kalipalipala ansouo.

Ni ansou me Esekiel mihmihte Papilon, Siohwa kasaleong ih dahme wiwiawi nan ihmwen kaudok Serusalem. Siohwa wiahda met ki manaman. Esekiel mihmihte Papilon, ahpw Siohwa mweidong ih en kilang mehkoaros me wiawi nan ihmwen kaudoko. Oh mehkan me Esekiel kilang me inenen kapwuriamwei!

‘Kilang me saut kan me aramas kan wiewia nan ihmwen kaudoko,’ Siohwa padahkiong Esekiel. ‘Kilang did akan kin audaudkihda mahlen en sineik oh mahn teikan. Oh kilang mehn Israel kan kin kaudokiong!’ Esekiel kak kilang mehpwukat, oh e intingihdi dahme wiawi.

‘Ke kilang dahme kaun en mehn Israel kan kin wia ni rir?’ Siohwa idek rehn Esekiel. Ei, e pil kak kilang met. Mie ohl 70, oh irail pwukat koaros kin kaudokiong koht likamw kan. Irail indinda: ‘Siohwa sohte kilang kitail. E sohlahr mi nan sahpwo.’

Siohwa eri kasaleong Esekiel ekei lih kan ni wahnihmw paliepeng en ihmwen kaudoko. Irail mwomwohd wasao oh kaudokiong koht likamw Tammus. Oh pil kilang irail ohl ko ni wasahn pidelong en ihmwen kaudok en Siohwa! Irail me 25. Esekiel kak kilang irail. Irail kin dairukedi ong pali mese oh kaudokiong ketipin!

‘Aramas pwukat sohte wahunekin ie,’ Siohwa mahsanih. ‘Irail kin wia mehkan me kaidehn ihte suwed ahpw irail pil kohdohng ai ihmwen kaudok oh wia mehpwukat!’ Siohwa eri inoukihdi: ‘Re pahn pehm kehl en ai engieng. Oh I sohte pahn poakeirailla ni ansou me re pahn kasohrala.’

Sounpahrte siluh mwehrin Siohwa kasaleong Esekiel mehpwukat mehn Israel kan pelianda Nanmwahrki Nepukadnesar. Ih eri kohieila peiong irail. Mwehrin sounpahr ehu elep mehn Papilon kan kawehla kehl en Serusalem oh isikada kahnihmwo. Irail aramas tohto mehla de kalipalipala Papilon.

Dahme kahrehda Siohwa mweidong soahng suwed wet en wiawiong mehn Israel ko? Pwehki irail sohte men peikiong Siohwa oh irail sohte kapwaiada sapwellime kosonned kan. Met kasansalehda me e inenen kesempwal ansou koaros kitail en wia mehkan me Koht mahsanih.

Mwehrin kahnihmwo ohla, aramas kei mweimwei ong en mihmi nan sahpwen Israel. Nanmwahrki Nepukadnesar eri kasapwilada emen mehn Suhs me adaneki Kedalaia en wia arail kepina oh apwahpwali aramas pwukat. Ahpw mie mehn Israel mwersuwed kei me kamehla Kedalaia. Met kahrehda aramas kan masak me mehn Papilon kan pahn pwurohdo oh kameirailla pwehki me suwed me wiawiehr. Irail eri idingkiong Seremaia en iang irail tangdihla Isip.

Met kahrehda sahpwen Israel en tehnla sohte aramas oh mahn mand. Impan sounpahr 70 sohte emen kin kousoan nan sahpwo. E tehn kowahlap. Ahpw Siohwa ketin inoukihda me e pahn kasapahldo aramas kan ong sahpwo mwehrin sounpahr 70 imwisekela. Eri erein met, dahme kin wiawiong sapwellimen Koht aramas kan me kalipalipalahng sahpwen Papilon? Kitail pahn kilang.