Ia Duwen Ei Pahn Kakohng Ei Pahtou?

“I PEHM me I anahne koledi ei pepehm,” Mike kawehwehda ni eh tamanda mehlahn eh pahpao. Ong ih, en koledi eh pepehm ih mwomwen ohl kin wia. Ahpw mwuhr e tehkada me e sapwung. Eri ni ahnsou me kompoakepahn Mike eh pahpa kahlapo mehla, Mike eseier dahme e pahn wia. E nda: “Ma sounpar kei samwalahro, I pahn kakete pikir pwopweo oh nda, ‘Ohl tohrohr.’ Ahpw met I doahklang peho oh nda, ‘Kasalehda omw pepehm. E pahn sewese iuk. Ma ke men I en kohkohla, I pahn kohkohla. Ma ke men I en mihmi, I pahn mihmi. Ahpw dehr masak en kasalehda omw pepehm.’”

MaryAnne pil pehm me e anahne koledi eh pepehm ni ahnsou me eh pwoudo mehla. E nda: “I uhdahn kin pwunodki ma met pahn wia mehn kahlemeng mwahu ong meteikan, kahrehda I sohte mweidohng pein ngehi en kasalehda ei pepehm. Ahpw mwuhr I esehda me ei mwomwen nannanti kehlail mwohn meteikan sohte kin sewese ie. I tepida medemedewe ei irairo oh nda, ‘Sengiseng ma ke men sengiseng. Dehr song en mwomwen kehlail. Kasalehda omw pepehm koaros, pwe ken kak nsenamwahula.’”

Eri Mike oh MaryAnne koaros nda me kitail en Pahtou ma kitail men! Oh ira koaros pwung. Dahme kahrehda? Pwehki pahtou kak sewese kitail en kasalehda atail pepehm. Kasalehda omw pepehm kak sewese iuk en saledeksang soahng kan me kin katoutouwih iuk. Atail wehwehki ni pwung ia duwen emen eh kak kasalehda eh pahtou pahn sewese kitail en wehwehki me e sohte sapwung en kasalehda atail pahtou ni saledek. Met pahn sewese kitail en saledeksang soahng kan me kin katoutouwih kitail.

Mehlel, kaidehn koaros pahn kin kasalehda mwomwen pahtou tehieu. Soahng kan me duwehte ma emen me kitail kin poakohng uhdahte mehla de me sousoumwahu oh mehla pahn kak kamwakid pepehm en aramas. Ahpw ehu ire me kin mehlel iei: En kolokol omw pahtou kin kak kauwehla omw pepehm oh roson en paliweromw. E pahn mwahu ma ke kasalehda omw pahtou. Ia duwe? Paipel kin audaudki kaweid mwahu kan ong ire wet.

Ia Duwen Omw Kak Kasalehda Omw Pahtou?

Koasoiong meteikan kin sawas laud. Mwurin mehlahn nah seri ehk ko oh pil kahpwal teikan me e lelohng, ohl en mahsie me adaneki Sohp koasoia: “I pwangadahr momour. Komwi ketin karonge ei kaulim ni lingeringer.” (Sohp 1:2, 18, 19; 10:1) Sohp solahr kak koledi eh pepehm. E anahne kasalehda eh pepehm; e anahne “kaulim.” Duwehte met, Shakespeare, sounntingiada sipai men, ntingihdi nan sipai me adaneki Macbeth, me ke anahne kasalehda omw pahtou, pwe ma ke sohte kasalehda, e pahn kak kauweiukala.

Eri ni omw kin koasoia omw pepehm kan ong kompoakepahmw mehlel men me kin rongorong kanahieng oh wehwehki omw pepehm, met kak kansenamwahwihiukala. (Lepin Padahk 17:17) Ni omw pahn ntingihedi omw pepehm kan oh dahme ke kin lelohng, met kin kalapw kamengeihala omw wehwehki oh kamwahwihala mepwukat. Oh ma me rongorong uhko pil iangehr pahtouki mehlahn emen me e kin poakohng, oh e pil powehdier soangen kahpwal wet, mwein ke pahn kak alehdi sang reh ekei kaweid mwahu kan duwen omw pahn kakohng kahpwal wet. Ni ahnsou me nah serio mehla, emen nohno kawehwehda dahme kahrehda e sawas en koasoiong lih emen me pil lelohng kahpwalohte. E koasoia: “En ese me mie emen me pil lelohng soangen irairohte ahpw nannanti oh kehlail oh soandi mwahu nan eh mour, kin kakehlaka ie.”

Ia duwen ma ke soansuwedki koasoia omw pepehm? Mwurinte mehlahn Sohl oh Sonadan, Depit ntingihada melkahka ieu me kasalehda eh pahtou. Melkahka wet mwuhr wiahla kisehn pwuhken Samuel Keriau nan Paipel. (2 Samuel 1:17-27; 2 Kronikel 35:25) Pil duwehte met, ekei kin diarada me e kin mengei en kasalehda arail pepehm ma re kin ntingihdi. Emen liohdi kasalehda me e kin ntingihdi eh pepehm kan oh rahn kei mwuri e kin pwurehng wadek dahme e ntingihedi. E diarada me met kin sawas laud.

Mehnda ma ke koasoiaiong emen de ntingihdi, omw kasalehda omw pepehm kan kin sewese iuk kadarala omw pahtou. E pil kak sawas kihsang sawehwe. Emen nohno me pahtoukihla mehlahn nah seri koasoia: “Ngehi oh ei pwoud kin rong duwen ekei pwopwoud me kin mweipeseng mwurin mehlahn neira seri, oh se sohte men met en wiawi ong kiht. Kahrehda, ahnsou koaros me se pehm me se lingeringer, men kapwukoahki emenemen duwen met, se kin koasoiapene. I leme se kerenpenehla ni at wia met.” Eri, kasalehda omw pepehm ong meteikan kak sewese iuk en wehwehki me mehnda ma kumwail koaros loaleidki aramas tehmen, meteikan ele pahn kasalehda arail pahtou ni ahl me weksang mwomwen omw pahn kasalehda omw pahtou. Emenemen mie eh ahnsou oh elen kasalehda eh pahtou.

Pil ehu me kak sewese kitail kasalehda pahtou iei sengiseng. Paipel mahsanih me mie “ahnsoun pahtou.” (Eklesiasdes 3:1, 4) Mehlahn emen me kitail poakohng kin kihong kitail ahnsoun sengiseng. Sengiseng iei ehu kahk me anahn pwehn powehdi pahtou.

Lih pwulopwul men kawehwehda ia duwen kompoakepah keren men sewese ih en powehdi eh pahtou ni ahnsou me eh nohno mehla. E nda: “Kompoakepahio kin ahnsou koaros mi mwo ahnsou me I anahne ih. E kin iang ie sengiseng. Oh kin koasoiong ie. E kin mengei ien kasalehda ei pepehm ong ih, oh met kesempwal ong ie. Kahrehda I sohte kin namenek en sengiseng. (Kilang Rom 12:15.) Ke sohte anahne namenengki sengiseng. Ni atail kilangehr, me Paipel kin audaudki karasaras en ohl oh lih pwoson kan, pil iangahki Sises Krais, me kin saledek en sengiseng oh sohte namenengki.​—Senesis 50:3; 2 Samuel 1:11, 12; Sohn 11:33, 35.

Ele ke pahn diarada me omw pepehm en pahtou kan kak pwarada ni omw sohte kasik. Pilen mesomw mwein kak keredi ni omw sohte kasik. Emen liohdi diarada me ni eh kin kohla netinet ni sidohwa (mehkot me ih oh eh pwoud kin kalapw wia) kin kahrehiong ih en sengiseng, keieu ahnsou me e kin doahkalahng ale mwenge kan me eh pwoud kin iouki. Eri kanengamah. Oh dehr pehm me ke anahne koledi omw men sengiseng. Tamataman me soahng pwukat kisehn pahtou me anahne wiawi.

Powehdi Omw Kin Kapwukoahki Pein Kowe

Me ntingdier mwoweo, ekei kin pehm me irail me kin pwukoahki mehlahn emen me re kin poakohng. Met kak sawas en kawehwehda pepehm en pahtou laud me ohl lelepek Seikop kasalehda ni eh kamehlelehda me “mahn lawalo” men me kemehla nah pwutak Sosep. Seikop me pein kadarala Sosep en tehk ia iren rie pwutak ko. Ele Seikop alehdi pepehm laud en kapwukoahki pein ih, me duwehte ‘Dahme kahrehda I kadarala Sosep kelehpw? Dahme kahrehda I kadarala ih nan wasa me diren mahn lawalo kan kin mi ie?’​—Senesis 37:33-35.

Mwein ke pehm me omw soukautih me kahrehda mehlahn emen me ke kin poakohng. Omw pohnese pepehm wet, mehnda ma mehlel de soh, iei mehkot me kin kalapw wiawi ni ahnsou me emen mehla. Omw kin pohnese met kak sewese iuk. Eri, dehr pehm me ke anahne koledi soangen pepehm pwukat. Omw koasoiaiong meteikan omw pepehm pahn uhdahn kak sewese iuk laud.

Kitail anahne pohnese, me mehnda ia uwen atail poakepoake aramas emen, kitail sohte kak kamwakid mwomwen eh mour, oh kitail pil sohte kak doarehsang me kitail poakohngo “paisuwed” me kin lelohng aramas ni soh kasikpe. (Eklesiasdes 9:11) Oh pil, kaidehn pwe ke pil songosong en kahrehda mehlahn me ke poakohngo. Karasepe, ni omw sohte mwadang wiahda koasoandi pwe aramas me ke poakohngo en tuhwong toahkte, ke wia met pwe ke men en soumwahuda oh mehla? Uhdahn soh! Eri wehwehki kowe me pwukoahki eh mehlao? Soh.

Emen nohno esehla ia mwomwen e pahn powehdi pepehm wet mwurin nah serepeino mehla nan aksident en sidohsa. E kawehwehda: “I pehm me ngehi me pwukoahki pwe ngehi me kadarala ih. Ahpw I diarada me e sapwung en ahneki soangen pepehm wet. E sohte sapwung en kadarala ih en iang eh pahpao kohla wia mehkot. Dahme wiawio uhdahn aksident sakanakan ieu.”

Mwein ke kakete nda: ‘Miehte soahng tohto me I mentehno ndahng ih de wia.’ Mehlel, pwe ihs rehtail me kak nda me e wia pahpa, nohno, de seri unsek men? Paipel kin katamankihong kitail: “Kitail koaros kin kalap sapwungala. Me sohte kin sapwungala ni eh lokaia, iei ih me unsek.” (Seims 3:2; Rom 5:12) Eri pohnese me ke pil sohte unsek. Omw medemedewehte “ma I wiahte met” sohte pahn wekidala mehkot, oh ke sohte pahn mwadang en nsenamwahula.

Ma mie kahrepen me ke kamehlele me ke uhdahn pwukoahki mehlahn aramas men, eri medewe dahme keieu kesempwal pwehn katikala pepehm wet, iei sapwellimen Koht mahk. Paipel kin kamehlelehiong kitail: “Ma komw pahn ketin kilelehdi dipat akan, ihs me kak pitsang sapwellimomwi kadeik? A komw kin ketin mahkohng kiht.” (Melkahka 130:3, 4) Ke sohte kak pwuralahng mahs oh wekidala soahng kan. Ahpw ke kak peki sapwellimen Koht mahk ong omw sapwung kan en mahs. Eri, dahme ke anahne wia mwurin mwo? Ma Koht kin ketin inoukihong uhk me e pahn ketin mahkohng omw sapwung kan en mahs, ke sou pil anahne mahkohng pein kowe?​—Lepin Padahk 28:13; 1 Sohn 1:9.

Powehdi Omw Lingeringer

Ia duwe, ke pil kin ahneki pepehm en lingeringer, mwein pahn toahkte kan, nehrs kan, kompoakepahmw kan, de pil me mehlao? Tamataman me met pil kin kalapw wiawi ni ahnsou me emen mehla. Mwein omw lingeringer kin wiawi pwehki omw nsensuwed. Emen sounnting koasoia: “Ma ke ese me ke ahneki lingeringer ahpw ke sohte mwekidki omw lingeringer, met kak sewese iuk en pitsang imwihla suwed.”

Mwein e pahn pil sawas ma ke kasalehda oh ehukihong meteikan omw lingeringer. Ia duwe? E sohte konehng en kasalehda ni mwomw wuk. Paipel kaweidki me kolokol lingeringer kin keper. (Lepin Padahk 14:29, 30) Ahpw ele ke pahn diarada me e kansenamwahu en koasoia me pid duwen omw lingeringer rehn iengomw men me kin wehwehkin uhk. Ekei kin diarada me en eksersais laud ni ahnsou me re lingeringer kin sawas laud en kihsang lingeringer.​—Pil kilang Episos 4:25, 26.

Mehlel me e kesempwal en kasalehda ni mehlel oh saledek omw pepehm kan, ahpw mie mehkot me ke anahne kanahieng. Mie wekpeseng laud nanpwungen kasalehda omw pepehm oh kasalehda omw nsensuwed ni mwomw wuk. Ke sohte anahne kapwukoahki meteikan omw kin lingeringer oh nsensuwed. Eri kanahieng mwomwen omw kin koasoia omw pepehm kan pwe ken dehr kasalehda ni mwomw lemei. (Lepin Padahk 18:21) Mie mehkot me kak keieu sewese kitail en powehdi pahtou, oh kitail pahn koasoia met.

Sawas Sang Rehn Koht

Paipel kin kamehlelehiong kitail: “KAUN-O kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.” (Melkahka 34:18) Ei, laudsang mehkoaruhsie, omw nanpwungmwahu rehn Koht kak sewese iuk en powehdi omw kin pahtouki mehlahn emen me ke kin poakohng. Ia duwe? Kaweid mwahu kan koaros me kitail alehdier nan pwuhket kin kohsang de pahrekiong Mahsen en Koht, iei Paipel. Omw kin doadoahngki kaweid pwukat kak sewese iuk.

Patehng met, dehr pohnsehse kesempwalpen kapakap. Paipel kin kangoangehkin kitail: “Mweidohng KAUN-O omw kahpwal akan, eri e pahn ketin doareiukala.” (Melkahka 55:22) Ma omw kin koasoiaiong kompoakepahmw kadek men kin kak sawas, ia uwen omw pahn kasalehda omw pepehm loal kan koaros ong “Koht me pwarer en kansenamwahu koaros” eh pahn sewese iuk!​—2 Korint 1:3.

Kapakap sohte kin kansenamwahwihte kitail. Koht kin ketin karonge atail kapakap kan, oh e kin ketin inoukihda me e pahn ketikihong sapwellime ladu kan sapwellime manaman ma re pahn peki ni mehlel. (Melkahka 65:2; Luk 11:13) Oh sapwellimen Koht manaman kak kihong uhk “manaman lapalap” pwe ken kak nannanti ehuehu rahn. (2 Korint 4:7) Tamataman: Koht kin kak ketin sewese sapwellime ladu lelepek kan en dadaurete pahn soangen kahpwal sohte lipilipil koaros me re kin lelohng.

Emen lih me nah seri mehla tamanda ia duwen manaman en kapakap eh sewese ih oh eh pwoud ni ara pahtouki mehlahn neira serio. E kawehwehda: “Nipwong ni at kin mi ni imwato oh se pehm me se sohla kakohng at pahtou, se kin ehupene kapakap ni ngihl laud. Tepin ahnsou me se anahne wia mehkot ahpw nait serepeino sohte iang, duwehte tepin mihting me se kohla mwurin eh mehla, oh pil tepin mihting tohrohr me se iang, se kin kapakapki kehl. Ni ahnsou me se kin pwourda nimenseng oh se pehm me se sohla kakohng, se kin kapakapohng Siohwa en sewese kiht. I sehse kahrepe, ahpw e uhdahn kin apwal ong ie en kin pedolong nan imwato kelehpw. Eri ahnsou koaros me I kin pwurodo ni imwato kelehpw, I kin kapakapohng Siohwa en sewese ie en kak meleilei.” Lih lelepek menet uhdahn kamehlele me kapakap pwukat wia sawas, oh met uhdahn mehlel. Ele ke pil pahn diarada me omw kin kaukaule kapakap pahn pasapengla oh ‘sapwellimen Koht popohl, me inenen laudsang uwen atail dehdehki, ahpw pahn nekinekid mohngiongomw oh pil omw lamalam.’​—Pilipai 4:6, 7; Rom 12:12.

Sawas me Koht kin ketikihda kin uhdahn sewese kitail. Wahnpoaron Pohl koasoia me Koht me kin ketin “sewesei kitail nan atail apwal akan koaros, pwe kitail en pil kak sewese irail kan me kin mihla nan soangen apwal koaros.” Mehlel, sapwellimen Koht sawas sohte kin kihsang pahtou, ahpw e kak sewese kitail en kakohng. Met sohte wehwehki me ke sohla pahn sengisengki de manokehla emen me ke poakohng me melahr. Ahpw ke kak pwurehng nsenamwahula. Oh ni omw kin wia met, dahme ke lelohngo kak sewese iuk en kak wehwehki mwahu oh poakehla ni omw kin sewese irail kan me pil kin pahtouki mehlahn emen me re poakohng.​—2 Korint 1:4.