Iren Mehn Kasukuhl 3

Ihs Sises Krais?

Dahme kahrehda Sises adaneki sapwellimen Koht “mesenih”? (1)

Dahme kahrehda e adaneki “Mahseno”? (1)

Dahme kahrehda Sises ketidihdo sampah oh wia aramasala? (2-4)

Ia kahrepe e wiahda manaman kan? (5)

Dahme Sises pahn ketin wia ni ahnsou kohkohdo? (6)

1. Sises memour nanleng nin duwen ngehn emen mwohn e ketidihdo sampah. Ih me Koht tepin kapikada mwohn mehkoaros, ihme kahrehda e adanekihki Sapwellimen Koht “Mesenih.” (Kolose 1:15; Kaudiahl 3:14) Sises, ih kelepw me Koht pein ketin kapikada. Mwohn Sises ketidihdo sampah wia-aramasala, Siohwa doadoahngki ih en wia sapwellime “sounsawas emen” en kapikada audepen lahng oh sampah. (Lepin Padahk 8:22-31; Kolose 1:16, 17) Koht pil doadoahngki ih nin duwen Sapwellime sounkair men. Ihme kahrehda Sises adanekihki “Mahseno.”—Sohn 1:1-3; Kaudiahl 19:13.

2. Koht kadarodo sapwellime Ohl nin sampah ni ah ketin kasawada mouren Sises sang nanleng ong nan kapehden Meri. Kahrehda Sises sohte ah pahpa ni pali uduk. Ihme kahrehda e sohte iang sohsohki dihp. Koht kadarodo Sises nin sampah pwehki kahrepe silu: (1) Padahkiong kitail dahme mehlelo duwen Koht (Sohn 18:37), (2) kolokol eh lelepek unsek, pwe kitail kak kalemengih (1 Piter 2:21), oh (3) meirongkihla moure pwen kasaledek kitailla sang dihp oh mehla. Dahme kahrehda met kesempwal en wiawi?—Madiu 20:28.

3. Pwehki tepin ohlo, Adam, ni eh sapeikiong sapwellimen Koht kosonnedo, e wiahda dahme Paipelo kin kadaneki “dihp.” Eri Koht ketkiong kalokepen ohlo iei mehla. (Senesis 3:17-19) Pwehki e sohte kapwaiada sapwellimen Koht koasondi kan, e sohlahr mih ni irair en unsek. E tepida mamalahr lao ih mehla. Koaros nah seri kan pil sohsohki dihp wet sang Adam. Ihme kahrehda kitail pil kin mahla, soumwahuda, oh mehla. Iaduwen aramas ahr kak kamourala?—Rom 3:23; 5:12.

4. Sises wiahlahr aramas unsek men duwehte Adam. Ahpw, e wuksang Adam, pwehki e peikiong Koht, edetehn e leliki kasongosong laud ehu. Pwehki e peik e kak meirongki moure nin duwen aramas men pwehn pwainda dihp en Adam. Iei met me Paipelo kin koasoiahki “tomw.” Nein Adam seri kan eri kakehr saledekla sang kadeik en mehla. Koaros me pwoson Sises, dihparail kan pahn lapwada oh irail pahn alehdi mour soutuk.—1 Timoty 2:5, 6; Sohn 3:16; Rom 5:18, 19.

5. Ahnsou Sises ketiket nin sampah, e kamwauhiala me soumwahu kan, kamwenge irail kan me men mwengada, oh kameleileidi melimel kan. E pil kaiasada me mehla akan. Dahme kahrehda e wiahda manaman pwukat? (1) E poakpoake aramas akan me kin lokolok, oh e men sewesehda irail. (2) Eh manaman kan kasalehda me iei ih me sapwellimen Koht Ohl. (3) Mepwukat pahn wia kasalepen dahme e pahn ketin wia ong aramas peik kan ni ahnsou e pahn wiahla nanmwarki men oh kaunda sampah.—Madiu 14:14; Mark 2:10-12; Sohn 5:28, 29.

6. Sises poula oh Koht kaiasada ih nin duwen ngehn ehu, oh e pwurala nanleng. (1 Piter 3:18) Eri, Koht idiada ih en wiahla Nanmwarki men. Ni ahnsou keren, Sises pahn kasorehla wiewiahn mwersuwed koaros oh lokolok kan nan sampah wet.—Melkahka 37:9-11; Lepin Padahk 2:21, 22.

[Kilel kan nan pali 7]

Ahn Sises doadoahk kin pid Padapadahk, wiahda manaman kan, oh toukihda moure ong kitail