Iaduwen Ke Kak Sukuhliki Duwen Koht

Ke kak sukuhliki duwen Siohwa ni ahmw pahn wadek Paipel. Kawao, Koht ketin piladahr aramas ekei pwe en ntingihdi sapwellime kupwur kan. Nting pwukat kin adaneki Paipel (Pwuhk Sarawi). Rahnwet, kitail kin sukuhliki duwen Koht sang ni atail kin wadek Paipel. Pwehki Paipel kin audaudki mahsen kan me kohsang Siohwa Koht, Paipel pil adaneki Mahsen en Koht. Kitail kak kamehlele dahme Paipel mahsanih pwehki Siohwa sohte kak likamw. “Koht sohte kak ketin wiahda likamw.” (Ipru 6:18) Mahsen en Koht kin audaudki dahme mehlel.​—Sohn 17:17.

Paipel kin wia kisehn sapwellimen Koht kisakis kesempwal kan ong kitail. E kin rasehng kisinlikou ehu me pahpa limpoak men kadaralahng nah seri kan. E kin padahkiong kitail duwen sapwellimen Koht inou en kawiliakapwala sampah wet pwehn wiahla wasahn kousoan kaselel ehu—paradais. E padahkiong kitail dahme Koht ketin wia mahso, oh dahme e kin wiewia ni ahnsou wet, oh dahme e pahn ketin wia ni ahnsou kohkohdo ong sapwellime seri lelepek kan. E pil kin sewesekin kitail en kamwahuwihala atail kahpwal akan oh sewese kitail en diarada nsenamwahu.​—2 Timoty 3:16, 17.

Sounkadehdehn Siohwa kan kin kompoakepahnki Koht; re pahn sewese iuk en wehwehkihla padahk kan en Paipel. Ke kak ndaiong irail me ke men onop Paipel rehrail. Sohte isepen ahmw pahn onop Paipel rehrail. (Madiu 10:8) Ke pil kak iang towehda mihding en Kristian akan. Mihding pwukat kin wiawi nan wasahn kaudok kan me adaneki “Kingdom Hall.” Ma ke pahn iang towehda mihding en Kristian pwukat, ke pahn mwadang kekeirada ni ahmw men loalokongkihla Koht.

Ke kak sukuhliki duwen Koht sang dahme e ketin kapikada. Karasepe ehu, Paipel mahsanih: “Koht kapikada sampah oh mehkoaros me mi pahnlahng.” (Senesis 1:1) Ni ahnsou me Siohwa kapikada “mehkoaros me mi pahnlahng,” e ketin kapikada ketipin. Dahme met kin padahkiong kitail duwen Koht? Met kin padahkiong kitail me Siohwa ketin sapwellimanki kehl mwuledek. Ih kelehpw kak wiahda mehkot me kehlail duwehte ketipin. Met pil kin kasalehda me Siohwa sapwellimanki erpit, pwehki irairen erpit me anahn en kapikada ketipin me kin kihda karakar oh marain oh pil sohte kin kunla.

Sapwellimen Siohwa kapikapikda kan kin kasalehda me e kin poakohng kitail. Medewehla duwen soangsoangen wahn tuhke kan me mie nan sampah. Siohwa kakete wiahda ong kitail soangen wahn tuhke ehute​—de e pil kak sohte douluhl wiahda wahn tuhke kan. Ahpw, Siohwa ketikihong kitail soangsoangen wahn tuhke tohto, ni soangen mwomw tohto, uwe tohto, poh tohto oh nemenemen mwenge tohto. Met kin kasalehda me Siohwa wia Koht emen me kaidehn ihte limpoak ahpw pil kadek, sapan oh kin nsenohki aramas.​—Melkahka 104:24.