Kahrepen Atail Anahne Mahkohng Meteikan

MIE pak me emen wiahiong uhk mehkot suwed me duwehte kamedekihiukala de lokaia lemei ong uhk?— Ke anahne wiahiong ih soahngohte me e wiahiong uhk?—

Pali laud en aramas kin men dupukohng emen me kamedekihirailla. Ahpw Sises mahsanih me kitail en mahkohng irail me wia suwed ong kitail. (Madiu 6:12) Ia duwen ma emen kin kalapw sohte mwahuong kitail? Pak depe kitail pahn mahkohng?—

Ih me Piter men ese. Eri ehu rahno e idek rehn Sises: ‘E itar ma I pahn mahkohng rieio pak isuh?’ Ahpw pak isuh sohte itar. Sises mahsanih me ke anahne mahkohng ih pak isihsek isuh ma aramaso wia dihp ong uhk pak isihsek isuh.

Pak tohto ieu met! Kitail sohte pahn wadek uwen tohtohn pak me aramaso wia dihp ong kitail. Ih met me Sises kupwurki padahkihong kitail: Kitail en dehr song en taman pak depe meteikan kin wiahda sapwung ong kitail. Ma irail pek mahk, kitail anahne mahkohng irail.

Sises kupwurki kasalehiong sapwellime tohnpadahk kan uwen kesempwal en mahk. Mwurin Sises ketin sapengla en Piter peideko, e mahsanihong sapwellime tohnpadahk kan duwen karasaras ehu. Ke men rong duwen met?—

Mie nanmwarki mwahu men me inenen kadek. E kin mweidohng nah ladu kan en peki mwohni reh ma re anahne sawas. Ahnsou lelehr me nanmwarkio men nah ladu ko en kapwungala arail pweipwand. Emen ladu me pweipwandkihong nanmwarkio weren mwohni wenedep (60 million) wisikdo rehn nanmwarkio. Lapalahn mwohni ieu met!

Ahpw laduwo netikihlahr mwohni ko koaros oh e sohte kak kapwungala. Nanmwarkio eri nda me laduwo pahn netila. E pil nda me eh pwoud oh nah seri kan oh soahng koaros me laduwo ahneki en netila oh pweinerail pahn kohwong ih. Dahme ke leme, ia pepehm en laduwo?—

Laduwo kelehpwikihdi mwohn nanmwarkio oh peki reh: ‘Menlau kihong ie ahnsou oh I pahn pwainohng komwi mehkoaros.’ Ma kowe me nanmwarkio, dahme ke pahn wiahiong laduwo?— Nanmwarkio poakehla laduwo. Nanmwarkio eri mahkohng ih. E padahkihong laduwo me e sohte anahne kapwungala eh pweipwando. Laduwo uhdahn perenkihda met!

Ahpw dahme laduwo wia? E kohieila oh tuhwong emen ladu me pweipwandkihong ih weren mwohni epwiki. E ahpw padikpene tepinwereo oh nda: “Mwadang kapwungodo omw pweipwand ong ie!” Ke kak medewehla soangen aramas menet me nanmwarkio mahkikihong lapalahn pweipwand ahpw uhd wia met?—

Ladu semwehmwe men me pweipwandki weren mwohni epwikio. E sohte kak mwadang pwainla eh pweipwando. Ih eri poaridi mwowe oh peki reh: ‘Menlau kihong ie ahnsou oh I pahn pwainohng uhk.’ Ia duwe, ohlo anahne kihong ienge laduwo ahnsou?— Ma kowe ohlo, dahme ke pahn wia?—

Ohl menet sohte duwehte nanmwarkio me kadek. E men ale nah mwohnio ahnsowohte. Ahpw pwehki ienge laduwo sohte kak pwainla, e kesehlong ih nan imweteng. Ladu teiko kilang dahme wiawi oh re sohte pwungki. Re poakehla ladu me selidio. Irail eri kohla padahkihong nanmwarkio dahme wiawi.

Nanmwarkio pil sohte pwungki dahme wiawio. E lingeringerda pahn laduwo me sohte kasalehda mahk. Ih eri ekerodo oh ndaiong: ‘Ladu suwed men kowe! I mahkikihong uhk omw pweipwand koaros ong ie. A dahme ke sohte mahkikihong iengomw laduwo?’

Ladu me sohte kasalehda mahko anahne sukuhlki iren kasukuhl ehu sang rehn nanmwarki mwahwo. Ahpw e sohte wia met. Nanmwarkio eri kesehlong laduwo nan imweteng lao e kak pwainla weren mwohni wenedepo (60 million). Ahpw e sansal me e sohte pahn kak wiahda mwohni pwehn pwainohng nanmwarkio. E pahn mihmi mwo lao e mehla.

Ni en Sises ketin kaimwisekala karasaraso, e mahsanihong sapwellime tohnpadahko: “Ih duwen me Semei me ketiket nanleng pahn ketin wiahiong kumwail, ma emenemen kumwail sohte pahn mahkohng rie sang nan kapehde.”​—Madiu 18:21-35.

Kitail anahne wehwehki me kitail koaros pweipwand laud ong Koht. Ni mehlel atail mour kohsang rehn Koht! Ni atail pahn medewe dahme kitail pweipwandkihong Koht, dahme meteikan pweipwandkihong kitail me inenen tikitik. Dahme re pweipwandkihong kitail kin duwehte weren mwohni epwiki me laduwo pweipwandkihong ladu teio. Ahpw atail pweipwand ong Koht pwehki sapwung me kitail kin wiahda kin duwehte weren mwohni wenedep (60 million) me laduwo pweipwandkihong nanmwarkio.

Koht uhdahn kadek. Mendahki kitail kin wiahda soahng sapwung kan, e kin ketin mahkohng kitail. E sohte kin ketikihsang douluhl atail mour pwehn pwainki atail sapwung kan. Kitail anahne tamataman mehn kasukuhl wet: Koht pahn ketin mahkohng kitail ihte ma kitail mahkohng meteikan. E sou mwahu kitail en medemedewe duwen met?—

Eri ma emen wia mehkot sapwung ong uhk ahpw pek mahk, dahme ke pahn wia? Ke pahn mahkohng?— Ia duwen ma met kin wiawi pak tohto? Ke pahn pil mahkohngete?—

Ma kitail me kin pek mahk, kitail sou pahn men meteio en mahkohng kitail?— Eri kitail anahne pil wiahiong ih. Kitail sohte pahn ndahte me kitail mahkohng ahpw kitail anahne mahkohng sang nan atail mohngiong. Ni atail kin wia met, kitail kin kasalehda me kitail uhdahn men wia sapwellimen Sounpadahk Lapalapo tohnpadahk.