Dahme Kahrehda Kitail Anahne Doadoahk?

DAHME ke keieu mwahuki, doadoahk de mwadong?— E sohte sapwung en mwadong. Paipel mahsanih me Serusalem kin “diren kisin pwutak oh serepein me pahn mwadomwadongseli.”​—Sekaraia 8:5.

Sounpadahk Lapalapo kin ketin perenki kilang kisin seri kan arail kin mwadmwadongseli. Ahpw mwohn e ketido sampah, e mahsanih: “I mi limwah, duwehte sounsawas emen— oh I pil perenkihda ei patopato [rehn Koht].” Tehk me Sises ketin wia soundoadoahk men rehn Semeo nanleng. Oh ni eh ketiket wasao, e mahsanih: “I pil perenkihda aramas akan koaros.” Ei nin duwen me kitail sukuhlkier mwowe, Sounpadahk Lapalapo kin uhdahn nsenohki aramas koaros iangahki me pwulopwul kan.​—Lepin Padahk 8:30, 31.

Ke leme ni ahnsou me Sises tikitik, e kin ketin iang mwadong?— Mwein. Ahpw pwehki e wia “sounsawas emen” nanleng, e pil kin ketin doadoahk nin sampah?— Sises kin adaneki “nein kapinte.” Oh e pil adaneki “kapinteo.” Dahme met kin kasalehda?— Sosep me apwalihada Sises duwehte nah pwutak emen, kin padahkihong ih doadoahk en kapinte. Sises eri wiahla kapinte men.​—Madiu 13:55, NW; Mark 6:3.

Soangen kapinte dahmen Sises?— Pwehki e wia sounsawas koahiek men nanleng, eri, ke sou leme me e pil ketin wia kapinte koahiek men nin sampah?— Medewe uwen doadoahk laud en kapinte men ni ahnsowo. Mweinte Sises kin ketin anahne kohla oh pelehdi tuhke, lupukpene tuhkeo, oh wahdihla ni imweo pwehn wiahda tehpel, sehr oh pil soahng teikan.

Ke leme Sises kin ketin perenki doadoahk wet?— Ke pahn peren ma ke kak wiahda tehpel oh sehr kaselel kan oh pil soahng teikan me aramas kak doadoahngki?— Paipel mahsanih me e mwahu emen en kin ‘pereperenki wahn eh doadoahk.’ Doadoahk kin kahrehda nsenamwahu ehu me ke sohte kak ale sang mwadong.​—Eklesiasdes 3:22.

Doadoahk kin mwahuong atail madamadau oh pil paliwaratail. Seri tohto kin ihte mwomwohd oh kilang kasdo oh mwadongki video game. Irail kin mworouroula, luwetala oh sohte kin uhdahn peren. Oh re sohte kin kaperenih meteikan. Dahme kitail anahne wia pwe kitail en peren?—

Kitail sukuhlki nan Irelaud 17 en pwuhk wet me kihkihwei oh wia soahng kan me pahn sewese meteikan kin wahdo peren. (Wiewia 20:35) Paipel kin kahdaneki Siohwa, “Koht en peren.” (1 Timoty 1:11, NW) Oh kitail wadekehr nan Lepin Padahk me Sises ketin ‘perenkihda eh patopato rehn Koht.’ Dahme kahrehda Sises kin ketin peren?— E ketin kasalehda ehu kahrepe ni eh mahsanih: “Semei kin ketin doadoahk ahnsou koaros, oh pil ngehi, I uhdahn pahn doadoahk.”​—Sohn 5:17.

Sises sohte ketin wia kapinte men erein eh mour nin sampah. Mie doadoahk tohrohr ehu me Siohwa ketikihong ih en wia nin sampah. Ke ese doadoahk dahieu met?— Sises mahsanih: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.” (Luk 4:43) Ekei pak ni Sises eh kin ketin kalohk ong aramas akan, irail kin kamehlelehla ih oh pil padahkihong meteikan dahme e mahsanih duwehte me ke kilang lihen Sameria menet wia wasaht.​—Sohn 4:7-15, 27-30.

Ia sapwellimen Sises pepehm ong doadoahk wet? Ke leme e kupwurki wia met?— Sises mahsanih: “Ei kapwaiada kupwur en ih me ketin poaroneiehdo, oh wiahda sapwellime doadoahk, iei me ei tungoal.” (Sohn 4:34) Ia uwen ahmw kin men kang mwenge me ke keieu iouki?— Met kin sewese iuk en ese ia uwen Sises eh ketin perenki wia doadoahk me Koht ketikihong ih.

Koht ketin wiaikitailda pwe atail sukuhlki wia doadoahk en kaperen ong kitail. E mahsanih me sapwellime kisakis ong aramas iei en “pereperenki dahme e koadoahkihadahr.” Eri, ma ke sukuhlki en doadoahk ni ahnsou me ke pwulopwul, ahmw mour pwon pahn kaperen.​—Eklesiasdes 5:19.

Met sohte wehwehki me me pwulopwul men kak wia doadoahk en me laud men, ahpw kitail koaros kak doadoahk. Mwein ahmw nohno oh pahpa kin doadoahk rahn koaros pwehn wiahda mwohni pwe en kak mie kenomwail mwenge oh imwamwail. Oh ke anahne ese me mie doadoahk tohto me anahne wiawihda pwe imwamwail en soandi oh mwakelekel.

Doadoahk dah me ke kak wia pwehn wia kamwahupen ahmw peneineio pwon?— Ke kak sawas ni ahmw pahn sewese kaunopada wasahn mwenge, widen dahl, kesehla kihd, kamwakelehda ahmw pere oh pil koasoanehla noumw mehn mwadong kan. Mwein ke wiahier ekei soahng pwukat. Doadoahk pwukat uhdahn wia kamwahupen peneinei.

Kita pahn kilang ia duwen soangen doadoahk pwukat eh wia kamwahu ehu. Mehn mwadong kan pahn kin koasoansoanla mwurin mwadong. Dahme kahrehda met kesempwal?— Met pahn kahrehda ihmw ehu en soandi mwahu oh kak pil pere sang kahpwal kan. Ma ke sohte koasoanehla noumw mehn mwadong kan, eri ahmw nohno kakete wisik kepwe pedolong nan ahmw pereo oh tiakidi ehu mehn mwadong ko. E kakete dipekelekel oh pwupwudi oh medekla. E pil kakete wisikla imwen wini. Met sou pahn suwed?— Ihme kahrehda ma ke kin koasoanehla noumw mehn mwadong kan mwurin ahmw mwadongki, e pahn wia kamwahu ehu ong koaros.

Pil mie doadoahk teikan ong seri kan. Karasepe, soahng kan me ke kin sukuhlki nan sukuhl. Ke kin sukuhlki wadawad nan sukuhl. Ekei seri kin perenki wadawad a ekei kin nda me re apwalki. Mehnda ma e kin apwal nin tapio, ahpw ke pahn peren ma ke esehla wadawad mwahu. Ni ahmw kin esehla wadawad, mie soahng tohto me ke pahn perenki sukuhlki. Ke pahn pil kak pein wadek sapwellimen Koht pwuhko iei Paipel. Eri ma ke kin nsenohki dahme ke kin sukuhlki nan sukuhl, e sou pahn wia kamwahu laud ehu?—

Mie ekei aramas me sohte kin men doadoahk. Mwein mie emen me ke ese me wia met. Ahpw pwehki Koht ketin wiaikitailda en doadoahk, kitail anahne esehla perenki met. Ia uwen Sounpadahk Lapalapo eh kin ketin perenki sapwellime doadoahk?— E duwehte e kin ketin kang mwenge me e kin keieu iouki. Mehnia doadoahk me e mahsanih duwe?— Iei, padahkihong meteikan duwen Siohwa Koht oh ia duwen arail pahn kak ale mour soutuk.

Eri iet mehkot me kak sewese kitail en perenki doadoahk. Idek rehmw, ‘Dahme kahrehda I anahne wia doadoahk wet?’ Ni ahmw kin ese dahme kahrehda e kesempwal en wia mehkot, ke pahn perenki wia. Mehnda ma doadoahko laud de tikitik, wia doadoahk mwahu. Ma ke kin wia doadoahk mwahu, ke pahn perenki ahmw doadoahk duwehte Sounpadahk Lapalapo.