Ia Duwen Atail Kak Tohrohr Sang Sampah?

1. Ire kesempwal dahieu Sises ketin kasalehda nipwong mwohn eh pwoula?

NIPWONGO mwohn eh pwoula, Sises ketin kasalehda uwen eh nsenohki dahme pahn wiawihong sapwellime tohnpadahk kan. E ketin kapakapki ire wet oh patohwanohng Semeo: “I sohte peki rehmwi pwe komwi en ketikinirailsang nin sampah, ahpw pwe komwi en ketin perehsang irail Me Suwedo. Duwehte ngehi me kaidehn kisehn sampah, pil ih duwen irail, kaidehn irail kisehn sampah.” (Sohn 17:15, 16) Nan kapakap wet, Sises ketin kasalehda sapwellime limpoak laud ong sapwellime tohnpadahk kan oh kesempwalpen dahme e mahsanihong ekei irail nipwongo mwowe: “Kaidehn kumwail kisehn sampah.” (Sohn 15:19) E sansal, me e inenen kesempwal ong Sises me sapwellime tohnpadahk kan en tohrohr sang sampah!

2. Ia wehwehn “sampah” me Sises mahsanih duwe?

² Lepin lokaia “sampah” me Sises mahsanih kin pid tohnsampah me sohte ahneki nanpwungmwahu rehn Koht. Irail kin mi pahn manaman en Sehdan oh ahneki eh irair kan me duwehte roporop oh aklapalap. (Sohn 14:30; Episos 2:2; 1 Sohn 5:19) Ni mehlel, “limpoakohng sampah wet wehwehki imwintihti ong Koht.” (Seims 4:4) Ahpw, ia duwen irail koaros me men dadaurete ni limpoak en Koht ar kak tohrohr sang sampah ehu me re kin mihmi loale? Kitail pahn tehkpene ahl limau pwukat: (1) En lelepek ong Wehin Koht me Krais kin ketin kaunda oh soupoupali ong palien politik kan. (2) En pelianda irair en sampah kan. (3) En kanahieng mwomwen atail likou oh kapwat. (4) En keieu kesempwalki atail nanpwungmwahu rehn Koht. (5) Pwuhriong nan tehtehn mahwen koaros.

KOLOKOL ATAIL LELEPEK OH SOUPOUPALI

3. (a) Ia sapwellimen Sises madamadau ong palien politik kan en ahnsowo? (b) Dahme kahrehda kitail kak nda me sapwellimen Sises tohnpadahk me keidi kan kin papah nin duwen meninkeder kei? (Pil menlau kilang dahme ntingdi pah.)

³ Sises sohte ketin iang pidada palien politik kan ni ahnsou me e ketiket sampah. E kin ketin wenowohngete en kalohki Wehin Koht me iei koperment en nanleng me e pahn ketin kakaun nin duwen Nanmwarki men. (Daniel 7:13, 14; Luk 4:43) Ihme kahrehda e kak mahsanihong mwohn Kepina en Rom, Pontius Pailet: “Ei wehi, kaidehn kisehn sampah wet.” (Sohn 18:36) Sapwellime tohnpadahk lelepek kan kin kahlemengih ih ni arail kin lelepek ong ih oh sapwellime Wehio, oh ni arail kin kalohki Wehio nan sampah pwon. (Madiu 24:14) Wahnpoaron Pohl ntingihdi: “Kiht, meninkeder en Krais kei. Eri, se peki rehmwail ni ngidingid, ni mwaren Krais, kumwail en wekila sang ni imwintihti ong ni kompoakepahn Koht.”a​—2 Korint 5:20.

4. Ia duwen Kristian mehlel koaros ar kin kasalehda arail lelepek ong Wehin Koht? (Menlau kilang koakon “Tepin Kristian akan Kin Soupoupali.”)

⁴ Pwehki meninkeder kan kin wiliandi ehu wehi me re kohsang ie, re sohte kin iang pidada politik en wehi me re kin kohla mihmi ie. Irail kin soupoupali. Ahpw meninkeder kan kin utungada wehi me re kin weliwelian. Met kin duwehte sapwellimen Krais tohnpadahk me keidi kan me wia “tohn nanleng mehlel” kei. (Pilipai 3:20) Sang ni arail kin ngoangki kalohki Wehio, re sewesehda aramas rar kei me wia sapwellimen Krais “sihpw teikan” en wiahla “kompoakepahn Koht.” (Sohn 10:16, NW; Madiu 25:31-40) Irail “sihpw teikan” pil kin wiliandi Wehio ni arail kin utung Kristian me keidi kan. Nin duwen pwihn minimin ehu me kin utungada Wehin Mesaia, pwihn riau pwukat kin kolokol ar soupoupali ong palien politik en sampah kan.​—Wadek Aiseia 2:2-4.

5. Ia pil ehu kahrepe me Kristian mehlel kan kin soupoupali?

⁵ Lelepek ong Krais kaidehn ihte kahrepe me Kristian mehlel kan kin soupoupali. Nan Israel en mahs, sapwellimen Koht aramas akan kin kousoan nan ehu sahpw. Ahpw rahnwet, kitail kin wia kisehn pirien en Kristian ehu nan sampah pwon. (Madiu 28:19; 1 Piter 2:9) Kahrehda ma kitail pahn uhki pwihn en politik kan nan ehu wehi, kitail sohla pahn kak kalohki me Wehin Koht kelehpw iei koapworopwor ong sampah. Oh e pahn kauwehla atail minimin en Kristian. (1 Korint 1:10) Patehng met, ni ahnsoun mahwen, met pahn kahrehda kitail en mahweniong iangatail Kristian akan me kitail anahne poakohng. (Sohn 13:34, 35; 1 Sohn 3:10-12) Ihme kahrehda Sises ketin padahkihong sapwellime tohnpadahk kan en uhdihsang mahwen. E pil mahsanihong irail en poakohng arail imwintihti kan.​—Madiu 5:44; 26:52; Menlau kilang koakon “I Kin Kolokol Soupoupali?”

6. Ia duwen atail inou ong Koht eh kin kamwakid atail wiewia ong Sihsar?

⁶ Nin duwen Kristian mehlel kan, kitail inoukidahr atail mour ong Koht, ah kaidehn ong aramas emen de pwihn en aramas akan de ehu wehi. 1 Korint 6:19, 20 mahsanih: “Kaidehn uhdamwail kumwail, pwe sapwellimen Koht; pwe ih me ketin pwainkinkumwailda pwei lapalap ehu.” Kahrehda mendahki sapwellimen Sises tohnpadahk kan anahne kasalehiong “Sihsar” wahu oh pwain daksis kan oh kapwaiada eh kosonned kan me sohte kin kauwehla kosonned en Koht, irail anahne kihong “Koht me uhdahn sapwellimen Koht.” (Mark 12:17; Rom 13:1-7) Met kin pid arail kaudok, limpoak unsek, oh arail lelepek oh peik. Ma anahn, irail pahn perenki tounmeteikihla arail mour ong Koht.​—Luk 4:8; 10:27; wadek Wiewia 5:29; Rom 14:8.

PELIANDA “IRAIR EN SAMPAH”

7, 8. Ihs me kin kamwakamwakid aramas en sampah? Ia duwen elen madamadau en sampah wet eh kin “kamwakamwakid” aramas?

⁷ Pil ehu ahl me Kristian akan kin tohrohr sang sampah iei arail kin pelianda irair suwed en sampah. Pohl ntingihdi: “Kitail kin ale, kaidehn elen madamadau en sampah, ahpw manaman me kohsang rehn Koht.” (1 Korint 2:12, NW) E koasoiaiong mehn Episos kan: “Ni ahnsowo kumwail kin weweidki ahl suwed en sampah wet; kumwail kin peikiong kaun manaman en nan wehwe, iei [“elen madamadau,” NW] me kin kamwakamwakid oh kakaun irail kan me kin uhwong Koht.”​—Episos 2:2, 3.

⁸ Elen madamadau en sampah me kohsang rehn Sehdan kin kahrehiong aramas akan en sapeikiong Koht oh kamwakid “ineng en uduk, oh mehkan me aramas kin kilang oh ahnehda.” (1 Sohn 2:16; 1 Timoty 6:9, 10) Mie “manaman” en elen madamadau wet pwehki e kin kamwakid ineng suwed oh e sohte kin sansal oh e kin ahnsou koaros kasonge aramas. Duwehte ahng, e kin mihla wasa koaros. Patehng met, e kin “kamwakamwakid” aramas emen ni eh kin kakairada irair suwed kan me duwehte roporop, aklapalap, noahrok, oh irair en uhtohr oh uhwong. Elen madamadau en sampah wet kin ekisekis kakairada irair en Sehdan kan nan loalen emen.​—Sohn 8:44; Wiewia 13:10; 1 Sohn 3:8, 10.

9. Ia duwen elen madamadau en sampah eh kak tepida kekeirda nan atail madamadau oh mohngiong?

⁹ Ia duwe, elen madamadau en sampah wet kak tepida kekeirda nan omw madamadau oh mohngiong? Ei, met kak wiawi ma ke sohte pahn pelianda elen madamadau wet. (Wadek Lepin Padahk 4:23.) E kin kalapw tepida ni soh sansal. Karasepe, sang ni omw kin patehng aramas akan me mwomwen mwahu ahpw sohte kin poakohng Siohwa. (Lepin Padahk 13:20; 1 Korint 15:33) Ke pil kak alehda elen madamadau suwed wet sang pwuhk kan me sohte konehng, nan Internet me kin kasalehda kilel suwed de padahk kan me kohsang irail me kesehla oh uhwongada kaudok mehlel, mehn kamweit kan me sohte konehng, oh mwadong kan me aramas kin siaipene. Ke kak alehda elen madamadau wet sang aramas de mehkot sohte lipilipil me kin kasalehda madamadau en Sehdan oh eh koasoandi kan.

10. Ia duwen atail kak pelianda elen madamadau en sampah?

¹⁰ Ia duwen atail kak pelianda elen madamadau en sampah wet me keper oh dadaurete ni limpoak en Koht? Kitail kak wia met ihte sang ni atail kin doadoahngki sapwellimen Siohwa koasoandi kan koaros me duwehte Paipel, mihting kan, oh soahng teikan, oh kaukaule kapakapki sapwellime manaman. Siohwa uhdahn manaman sang Tepil de eh sampah suwed wet. (Seims 4:7) Ia uwen eh kesempwal kitail en karanih Siohwa ni atail kin kapakap!

KANAHIENG MWOMWEN ATAIL LIKOU OH KAPWAT

11. Ia duwen elen madamadau en sampah eh kin kamwakid en aramas ar kin likouda oh kapwat?

¹¹ Ahn aramas elen madamadau kin sansalda sang ni mwomwen eh kin likouda, kapwat oh mwakelekel en paliwere. Nan sahpw tohto, aramas solahr kin likouda mwahu. Emen ohl koasoia nan TV me lih tohto kin likouda duwehte lih me kin netiki paliwere. Serepein pwulopwul kan pil kin tepida doadoahngki soangen likou kan me kin kasale paliwar. Me tohto pil kin perenki likawih likou me sohte soandi mwahu. Met kin kasalehda irair en uhwong oh sohte wahu.

12, 13. Mehnia kaweid oh ire mehlel kan me kitail anahne doadoahngki me pid atail likou oh kapwat?

¹² Nin duwen sapwellimen Siohwa ladu kan, kitail men mwomw mwahu. Met wehwehki en likawih likou me soandi mwahu, mwakelekel oh konehng. Ahnsou koaros kitail en ‘likoumwahuda . . . ni wiewia mwahu’ nin duwen me konehng ohl de lih “poadidi kan.” Kitail sohte kin song en kahrehiong aramas akan en tehk kitail, ahpw kitail kin keieu nsenohki en “dadaurete ni limpoak en Koht.” (1 Timoty 2:9, 10; Sud 21) Kitail men ‘atail lingan en mihmi loalatail me kesempwal mehlel mwohn silangin Koht.’​—1 Piter 3:3, 4.

¹³ Pil tamataman me mwomwen atail kin likouda oh kapwat kak kamwakid ia duwen aramas ar pahn medewehki duwen kaudok mehlel. Mwomwatail en dehr kasalehda me kitail kin pohnmwahso ahpw en kasalehda atail wauneki Koht oh ahn meteikan pepehm oh madamadau. Kitail anahne kesempwalki kadeikpen loalen meteikan laud sang mwomwen atail men kapwatda. Me keieu kesempwal, kitail men kawauwih Siohwa oh sapwellime aramas akan oh kasalehda me kitail wia sapwellimen Siohwa ladu kei me kin wia soahng koaros “ong ni kalinganpen Koht.”​—1 Korint 4:9; 10:31; 2 Korint 6:3, 4; 7:1.

14. Me pid duwen mwomwatail oh en mwakelekel, peidek dah kan kitail en idek rehtail?

¹⁴ E keieu kesempwal kitail en likouda oh kapwatda mwahu oh pil mwakelekel ni ahnsou me kitail kin iang kalohk de towehda mihting en Kristian kan. Ke kak idek rehmw: ‘Ia duwe, mwomwen ei kapwat oh mwakelekel kin kadipikelekelih meteikan? Meteikan kin namenengki ei kapwat? Ei pepehm ong ia duwen ei men likouda oh kapwatda kin kesempwal sang ei kak ahneki pwukoa kan nan mwomwohdiso?’​—Melkahka 68:6; Pilipai 4:5; 1 Piter 5:6.

15. Dahme kahrehda Paipel sohte kin kihda kosonned oaritik kan ong likou, kapwat oh en mwakelekel?

¹⁵ Paipel sohte kin kihda kosonned oaritik kan ong ia mwomwen Kristian akan ar pahn likouda, kapwatda oh en mwakelekel. Siohwa sohte kupwurki kihsang atail saledek en pilipil de doadoahngki koahiek en madamadau. E kupwurki kitail en kekeirda pwehn kak doadoahngki kaweid oh ire mehlel kan en Paipel oh en “ahnlahr oh eselahr wekpeseng en me mwahu oh me suwed.” (Ipru 5:14) E keieu kupwurki atail limpoak ong ih oh mehn mpatail en kamwakid atail pilipil kan. (Wadek Mark 12:30, 31.) Ni atail kin wia met, kitail kak likawih soangsoangen likou oh kapwat tohto. Met kin sansal ni atail kin kilang sapwellimen Siohwa aramas akan me kin likawih soangsoangen likou kan ni arail kin pokonpene wasa koaros nan sampah pwon.

KEIEU KESEMPWALKI ATAIL NANPWUNGMWAHU REHN KOHT

16. Ia duwen elen madamadau en sampah eh kin uhwong sapwellimen Sises padahk? Peidek dah kan me kitail en idek rehtail?

¹⁶ Elen madamadau en sampah kin widing oh kahrehiong aramas tohto en medewe me re kak nsenamwahu ma re pahn kepwehpwe. Ahpw Sises mahsanih: “Mour mehlel en aramas sohte kin mi ni kepwe kan me e ahneki, mehnda ma e kepwehpwe mehlel.” (Luk 12:15) Sises sohte kin ketin padahngki me kitail en dehr ahneki kepwe kan. Ahpw e kin ketin padahngki me irail kan me kin tehk arail anahn en esehla Koht oh irail kan me sohte kin kedirepwki wiewia kan me sohte uhdahn kesempwal, me wehwehki irail kan me kin keieu kesempwalki arail nanpwungmwahu rehn Koht, kak ahneki mour mehlel oh nsenamwahu. (Madiu 5:3; 6:22) Pein idek rehmw: ‘I kin uhdahn kamehlele dahme Sises ketin padahngki, de “semen soangen likamw koaros” kin kamwakid ei madamadau? (Sohn 8:44) Dahme ei koasoi kan, ei mehn akadei kan, mehkan me I kin keieu kesempwalki oh mwomwen ei mour kin kasalehda?’​—Luk 6:45; 21:34-36; 2 Sohn 6.

17. Menlau kihda ekei kamwahu kan me irail me kin keieu kesempwalki arail nanpwungmwahu rehn Koht kin paiekihda.

¹⁷ Sises mahsanih: “Kupwurokong en Koht me kin dehdehda mwahu sang rehn sapwellime kan koaros.” (Luk 7:35) Nna medewehla kamwahu kan me irail me kin keieu kesempwalki arail nanpwungmwahu rehn Koht kin paiekihda. Irail kin uhdahn nsenamwahu ni arail kin wia doadoahk ong Wehio. (Madiu 11:29, 30) Irail kin kalapw soikala kapwunod kan oh soangen kapahtou kan. (Wadek 1 Timoty 6:9, 10.) Pwehki irail kin itarki dahme re uhdahn anahne, re kak ahneki ahnsou laud ong arail peneinei oh Kristian teikan. Irail kak meir mwahu. (Eklesiasdes 5:12) Irail kin pehm peren laud en kihwei ni soangsoangen ahl tohto. (Wiewia 20:35) Arail ‘koapworopwor en pil kin kekeirda’ oh re kin ahneki meleilei nan kapehdirail. (Rom 15:13; Madiu 6:31, 32) Sohte mehkot kak pahrekiong kapai pwukat!

PWUHRIONG NAN “TEHTEHN MAHWEN KOAROS”

18. Ia duwen Paipel eh kin kasalehda atail imwintihti, eh wiepe kan, oh mwomwen “mahwen” me kitail mi loale?

¹⁸ Irail kan me kin dadaurete ni limpoak en Koht kin perperlahsang Sehdan, me kin song en kihsang Kristian akan arail peren oh koapworopwor en mour soutuk. (1 Piter 5:8) Pohl koasoia: “Kaidehk aramas ekei me kitail mahweniong, pwe ong manaman en ngehn suwed kan en pahnlahng oh ong kaun akan oh me lapalap akan me ahneki manaman, oh pil ong koht akan me kaunda dih rotorot wet.” (Episos 6:12) Lepin lokaiahn Krihk me kawehwehdi “mahwen” kin wehwehki poadoar. Met kin kasalehda me mahwen wet sohte dohsang kitail oh kitail sohte kak rukula. Ahpw kitail anahne pein peiong imwintihti kan. Oh pil lepin lokaia pwukat “kaun akan” oh “lapalap akan me ahneki manaman” kin kasalehda me ngehn suwed kan kin koasoanehdi arail pwihn oh arail wiewia kan pwehn mahweniong kitail.

19. Menlau kawehwehda mwomwen tehtehn mahwen en Kristian.

¹⁹ Kitail kak kana mendahki kitail aramas soh unsek kei. Ia duwen? Ni atail kin pwuhriong “sapwellimen Koht tehtehn mahwen.” (Episos 6:13) Episos 6:14-18 kin kawehwehda tehtehn mahwen wet: “Eri, kumwail onopada! Katengehki lukepamwail kan kateng en me mehlel; kumwail perehki mwaremwaramwail kan perehpen pwung. Kumwail suhtihada kupwur en ngoang en waseli Rongamwahu en popohl. Ahnsou koaros kumwail pahn wa pwoson pwe en wia amwail mehn sansar, pwe kumwail en kak kakunkihla ketieu kisiniei kan sang rehn Me Suwedo. Kumwail pil ale lisoarop [de koapworopwor] en komour oh kedlahs en [“sapwellimen Koht manaman,” NW] iei mahsen en Koht. Kumwail wia mepwukat koaros ni kapakap ngidingid, pekipeki sawas sang rehn Koht. Kapakap ahnsou koaros.”

20. Ia duwen atail irair eh weksang ahn sounpei men?

²⁰ Pwehki Koht me ketikihong kitail tehtehn mahwen wet, e uhdahn pahn perehla kitail ma kitail pahn doadoahngki ahnsou koaros. Kristian akan weksang sounpei kan me kak kommoaldi erein ahnsoukis sang mahwen. Kitail sohte pahn uhdi sang pei lao lel ahnsou me Koht pahn ketin kasohrehla ahn Sehdan sampah oh salihdi ngehn suwed kan koaros nan pwoahr soh kapi. (Kaudiahl 12:17; 20:1-3) Eri, ke dehr uhdihsang omw nannanti en powehdi omw luwet kan oh ineng suwed kan. Kitail koaros anahne “kaloke” de kaiahne pein kitail pwehn lelepek ong Siohwa. (1 Korint 9:27) Ni mehlel, ahnsou me kitail sohte kin pei, ih ahnsou me keieu keper!

21. Ia duwen atail kak kana nan atail mahwen?

²¹ Kitail sohte kak kana nan mahwen wet ma kitail kin likih pein atail kehl. Kahrehda Pohl kin katamankin kitail me kitail anahne kapakap ong Siohwa “ahnsou koaros.” Ni ahnsowohte kitail anahne karonge Siohwa ni atail kin onopki sapwellime Mahsen oh kin kaukaule patehng iangatail “sounpei” kan pwehki kitail sohte kin kelehpw pei! (Pailimwon 2; Ipru 10:24, 25) Irail kan me kin lelepek en wia soahng pwukat pahn kak kana nan mahwen wet. Oh irail pil pahn kak eimah kawehwehda arail pwoson ni ahnsou me uhwong pahn pwarada.

ONOPADA MWAHU EN KAWEHWE OMW PWOSON

22, 23. (a) Dahme kahrehda kitail anahne onopada mwahu en kawehwe atail pwoson ahnsou koaros? Peidek dah kan kitail en idek rehtail? (b) Dahme kitail pahn tehkpene nan irelaud en mwuhr?

²² Sises mahsanih: “Kaidehn kumwail kisehn sampah. Iei kahrepen en sampah eh kin kailongkin kumwail.” (Sohn 15:19) Kristian akan anahne onopada ahnsou koaros pwehn kawehwe arail pwoson ni kadek oh wahu. (Wadek 1 Piter 3:15, 16.) Pein idek rehmw: ‘I wehwehki dahme kahrehda Sounkadehdehn Siohwa kan kin ekei pak wiahda pilipil kan me weksang pali laud en aramas akan? Ni ahnsou me I wiahda pilipil apwal wet, I kin uhdahn kamehlele me dahme Paipel oh ladu lelepek mahsanih me pwung? (Madiu 24:45; Sohn 17:17) Ni ahnsou me I anahne wia dahme pwung mwohn silangin Siohwa, I kin onopada en weksang meteikan oh perenki wia met?’​—Melkahka 34:2; Madiu 10:32, 33.

²³ Ahpw atail ineng en tohrohr sang sampah kin kalapw lelohng kasongosong kan ni soh sansal. Karasepe, nin duwen me kitail koasoiahier mwowe, Tepil kin nantihong kasonge sapwellimen Siohwa ladu kan en patehng sampah wet ni eh doadoahngki mehn kamweit keper kan. Ia duwen atail kak pilada mehn kamweit mwahu kan me pahn kihong kitail nsenamwahu oh nsenmwakelekel? Kitail pahn tehkpene ire wet nan irelaud en mwuhr.